Puede ang bisan ano nga ID sang senior citizen

INDI na gali kinahanglan gid ang OSCA ID, ukon ang ID nga gina-isyu sang Office for Senior Citizen Affairs, para sa senior citizen agud makabakal sang bulong nga may 20 percent discount sa botika.

Nahibal-an ko ini sa isa ka interbyu sang media sa isa ka opisyal nga babaye  sang isa ka ahensya sang gobyerno. Nalipat lang ako ugaling sang iya ngalan kag sang iya ahensya.

Siling niya puede man i-presentar sa botika ang ano man nga ID, katulad sang Comelec ID ukon SSS ID, agud kilalahon ang imo kinamatarong sa 20 percent discount sa pagbakal sang bulong.

Nakabasa man gani ako sa isa ka local nga pamantalaan sa Cebu nga naga-ugyon sa sinang kapareho nga pahibalo angot sa ID nga magamit sang mga senior citizen para sa PhilHealth.

Sa sina nga report, ang PhilHealth public relations officer nga si Atty. KarismaIvee Agraviador nag-athag gid sini.

Siling niya nga ang kinahanglan lang sang isa ka senior citizen agud magpa-rehistro kag maka-benepisyo sa PhilHealth program amo ang magpakita sang bisan ano nga ID, ukon bisan ano nga dokumento nga makapamatuod nga sila senior citizen.

Sa amo man nga report sang local nga pahayagan sa Cebu, si DOH-7 medical officer Dr. Dino Caing nag siling nga ang mga senior citizen sa ila rural health units puede gani makapasakop sa Diabetes and Hypertensive Club nga nagahatag sang libre nga bulong sa ila, regular nga check-up, kag follow-up nga laboratory tests.

Angot diri, napamatud-an ko gid gani nga indi lang gali ang OSCA ID ang puede gamiton sang senior citizen agud makabakal sang bulong nga may 20 percent discount.

Personal ko nahibal-an ini sang nagtuyu ako sa pagbakal sang bulong sa isa ka botika (Rose Pharmacy dira sa Iloilo Supermart) sang sini lang.

Makuha na tani ako sang akon OSCA ID sang nadiskubrihan ko nga nabilin ko gali ini sa balay. Sa masami, ginasulod ko ini sa akon wallet. May kon ano ako nga ginapangita sa akon wallet sang nalipatan ko ini sa lamesa sa kwarto namon ni asawahon.

Hinali na nga nadumduman ko ang media interview, kag namangkot ako sa isa ka nagabantay sa botika kon puede ko magamit ang akon SSS ukon Comelec ID.

May gin pindut siya sa computer kag nag siling: “Puede…” Nagpasalamatako. Wala man ako ugaling makabakal sang bulong ko kay wala sila sina sadto.

***

Sa Mandurriao District Health Center gali may ara na karon sang libre nga diabetes check-up katulad sang sa Cebu. Ugaling naga-problema sila sa karon parti sa libre nga generic nga mga bulong nga puede nila ihatag sa mga senior citizen kag iban pa nga pumuluyo diri.

Sang Enero sining tuig, nag-untat na sila gani sa paghatag libre nga bulong. Sang maghatag sila sadtong Enero 15, 2018, kulang pa gani ang bulong nga ila ginhatag sa masami nila ginahatag sadto.

Sang Marso lang nahibal-an nga may libre na sila nga bulong, ugaling nagpahibalo gid nga basi wala naman sila mahatag sa sunod nga bulan.

Tungod sini, nagpabakal si ugangan nga 80 anyos na sang bulong nga masami ginahatag sang sentro.

Nagpasalamat siya kay indi gid man gali mahal ang bili sang iya mga bulong nga generic sa isa ka generics drugstore nga puro generics lang ang ginabaligya.

Nadiskubrihan man niya nga ang iban nga drugstore nga nagabaligya man sang generic nga bulong mas mahal ang ila pagbaligya sini – mga 200 percent (P3 kontra P6) seguro ang bili ikumparar sa iya gin pabaklan.

Pakilala lang ini nga bisan ang generic nga bulong diri sa aton market-oriented, ukon may kumpetensya sa iban nga drugstore.

Maayo man ina seguro kay makabulig ini sa pagpabarato sang bili sang bulong. Ang problema lang dira seguro kon maglaka ang imbentaryo sang bulong kay iduso sini paibabaw ang presyo. (w_mateojr@yahoo.com/PN)

LEAVE A REPLY

Please enter your comment!
Please enter your name here