SA DIIN ayhan nagkulang ang pamunuan sang syudad sang Iloilo sa pagpahangop sa tawo sang katalagman sa kabuhi nga dala sang COVID-19?
Ngaa nga madamo sa sa gihapon ang nagapati nga indi sila matapikan sang coronavirus?
Sa survey sang Random Access Consultants, Inc., ginapakita nga nagapati ang mga residente sang syudad nga ang matapikan lang sang COVID-19 amo ang mga minor kag tigulang.
Apang sa data sang City Epidemiology and Surveillance Unit (CESU) ginapakita nga ang may pinakamataas nga numero sang natapikan sang sakit amo ang mga nagaedad sang 20-30 anyos. Ginapakita sini nga kadam-an sang mga natapikan sang COVID-19 sa syudad mga nagatrabaho ukon amo ang ara sa gwa sang masami bangud nagapangita sang palangabuhian.
Bangud sini makasiling kita nga wala sang pili ang virus nga tapikan. Ang ginapangita lang amo ang kahigayunan nga makasulod sa lawas sang tawo. Diri na nagasulod ang dapat disiplina sa kaugalingon.
Sugod Hunyo 2 tubtob Nobyembre 5 linibo na ang nagkaladakpan nga wala nagasoksok sang facemask kag face shield ukon eye protector sa pampubliko nga lugar. Ini sa pihak sang malawig na nga panahon nga kampanya kag pahibalo nga may ara sang ordinansa ang syudad.
Ini nga ordinansa indi silot ukon pabudlay para sa atun. Katuyuan sini nga maamligan kita kontra sa makamamatay nga sakit. Ang kaladlawan lang kay mas nahadlok pa sa multa sang ordinansa kun ipaanggid sa mangin halin nga dala sang virus.
Kun tan-awon ang hulag sang pamunuan lokal diri sa Iloilo, wala gid nagkulang ang syudad kag probinsya. Ang duha ka mga opisyal sang pamunuan lokal wala untat sa pagpaminsar sang mga lihok para maamligan ang mga pumuluyo. Ang problema kay nagakumpyansa na kita.
Matuod nga ang kapigaduhon ang nagatulod sa atun nga maggwa bisan may pamahog sang impeksyon. Pero dapat lang nga kun ara kita sa gwa maggamit gid sang proteksyon. Mask, shield, social distancing kag masami nga paghugas sang kamot.
Wala nagkulang ang atun pamunuan lokal. Kita lang ang nagkulang nga sa pamatyagan naton, nagsobra na sa kahugot ang pagsulondan nga ginapatuman.
Tandaan ta nga ang atun paghalong, makaluwas sa atun!/PN
