Si Congresswoman Jam

SANG NAGAUMPISA pa lamang ako sa radio, nakilala ko na ini sa Congresswoman-elect Jam-jam Baronda sa ngalan pa lang. Wala kami sang personal nga pagkitaay bisan man lang pagkumustahanay.

Nakilala ko ang iya ngalan bangud sya ang ikaduha nga batch sang Sangguniang Kabataan (SK). Kami naman ang pioneer.

Sa ti-on sang iya pagpadalagan bilang SK Federation President nakitaan ko na ini sang pagkapolitiko. Mamag-an ang personalidad, manaya-naya ang dala nga aura. Laragway sang isa ka mainabi-abihon nga tawo.

Sang naghambal sya nga magapadalagan bilang kongesista sang syudad sang Iloilo, ang nagsulod sa akun pinsar, masarangan ayhan niya? Ini bangud nga tuman sya ka lamharon kag mahumok ang pagkatawo.

Maka-survive ayhan sya sa kalibutan sang mga barako nga ang masami nga ginasaligan ang pagkalalaki kag pagkabrusko?

Apang ang akun palamangkutanon nasabat sang makaisa ako kaupod ang amon taekwondo jins nakabisita sa Senado kun sa diin political officer sya ni outgoing Sen. JV Ejercito. Nakita ko kun paano siya makigbagay sa mga senador kag kun paano sya tratuhon sang mga ini. Siling ko sa akun kaugalingon, potential nga mangin kongresista sang Iloilo.

Matuod nga ang iya duha ka nangin kasumpong mga abilidadan kag hangkilan sa patag sang lehislatura. Sin-o bala ang malipat sa Iron Lady sang Iloilo nga si former city councilor Perla Zulueta?  Sa tanan nga nakaligad nga konsehal sang syudad, wala pa sang makatupong sang akun paghangad sa iya. Bisan si Congresswoman Jam indi makatupong sa akun pagdayaw kay Zulueta. Apang may mga bagay nga indi gid para sa isa ka tawo bisan ano pa sya ka kwalipikado.

Sa bahin ni councilor Atty. Joshua Alim, sin-o bala ang makasiling nga may mas maayo pa sa iya nga mangin kongresista?

Nasaksihan ko man kun paano sya magdiskurso sa konseho nga wala sang ginatamdan. Apisar nga may mga flaws lang sya sa pulong nga Ingles, apang ang iya kasampaton sa pagdihon sang kasuguan kag pagdepensa sa pelenaryo indi mahikayan.  Kun sya ang nangin congressman sang Iloilo, indi man kita mahuy-an.

Pero ngaa nagdaug si Congresswoman-elect Jam-jam?

Magluwas nga may kwarta nga panggasto, malawig man ang iya paghanda. Ang iya daan nga network wala niya ginpabay-an apisar nga malawig sya nga wala sa politika sa Iloilo. Gani sang sya ang nagakinahanglan na sang ila bulig madasig lang sila nga na-reactivate.

Organisado si Jam-jam. Magluwas nga organisado man ang grupo ni Mayor-elect Jerry Treñas. Sa pagtingub sang ila pwersa, wala duda may tulog ang kontra.

Sa kadalag-an ni Jam-jam ihatag ta sa iya ang kredito. Sya lang ang politiko nga nakita ko nga wala pa nakabutlak ang adlaw nagalibot na sa barangay. Ginpangabudlayan niya sang todo ang iya kadalag-an.

Kun nagdaug man si Jam-jam ina bangud sa iya paghimakas kag maayo nga organisasyon.

Nagdaug si Jam-jam bangud sa iya, indi bangud sa iban nga tawo.

Bisan sya lang masarangan niya nga padag-on ang iya kaugalingon! (jpranco1975@gmail.com/PN)

LEAVE A REPLY

Please enter your comment!
Please enter your name here