SA PAGTAKOP sang termino sang nagapamuno sa isa ka unibersidad ukon kolehiyo, liwat nga ginahanduraw ang iya nahimuan para sa buluthuan.
Ginatakus ang nangin kadalag-an sa patag sang edukasyon sang mga estudyante kag sahi sang pagdumala sa mga manunudlo kag tanan nga tinawo nga iya nasakpan sa sina nga buluthuan.
Ginahatagan man sang kabilinggan ang mga naagom nga kadalag-an sa mga pasinawan ukon pagpangibabaw sang mga estudyante sa mga pasinawan kag ang pagkilala sa mga nahimuan sang buluthuan para sa iya pagpasanyog sang edukasyon kag paghurma sa maayo nga panimuot kag masanag nga bwas-damlag sang mga estudyante.
Sa karon, nagapangita ang Iloilo Science and Technology University (ISAT-U) sang masunod nga presidente nga magadumala sa ila unibersidad. Natapos na ang termino ni Dr. Raul Muyong nga madamo sang nahimo nga kaayuhan sa buluthuan. Nagiyahan niya sing maayo ang faculty and staff kag mga estudyante. Nakilala ang ISAT-U bilang de-kalidad nga buluthuan nga nakapatubas sang madamo nga estudyante nga nagpangibabaw sa mga pasinawan.
Kinahanglan nga ang masunod nga presidente, nga tal-os sa iya, ang makatupong kon indi man makalabaw sa iya mga kadalag-an.
Madamo man ang intresado nga mag-uyat sa renda sang pagdumala sa sini nga buluthuan. Lunsay sila mga sampaton kag nagdedikar sang ila kaugalingon sa patag sang edukasyon. Lunsay sila may pasyon sa pagpasiguro nga ma-edukar ang mga estudyante kag mahatagan sang masanag nga palaabuton.
Apang, isa sa dapat konsiderahon sang mga katapo sang Board of Regents sa pagpili sa masunod nga presidente sang unibersidad amo ang tawo nga may ikasangkol sa pagpadayon sa nasuguran na ni Dr. Muyong.
Ang magatal-os dapat may napamatud-an na sa pagdumala sa unibersidad ukon kolehiyo. May maayo nga reputasyon sa iya naalagaran na nga buluthuan kag kilala nga maayo maghatag sang motibasyon kag inspirasyon sa tanan agud nga malab-ot ang handom kag kadalag-an.
Maathag nga ang ISAT-U ginakilala bilang unibersidad nga may dekalidad nga mga kurso. Sampaton ang mga nagatudlo kag matutom ang mga estudyante kag wala nagapaulihi sa pagpangibabaw sa mga pasinawan.
Isa sa nagahandom nga mangin masunod nga presidente sang ISAT-U amo si Dr. Joel Limson. Siya ang sadto presidente man sang Northern Iloilo Polytechnic State College (NIPSC) nga karon kilala na bilang Northern Iloilo State University. Sa idalom sang iya pagdumala, napasad sini ang school system nga nakahatag gid sang maayo mga benepisyo sa mga manunudlo, mga estudyante, mga ginikanan, kag mga komunidad. Nagapabilin tubtob karon ang ini nga school system sang NISU.
Napilian man nga mangin presidente sang Negros Oriental State University (NORSU) si Dr. Limson sadtong 2016. Ginpalawig ang iya termino kag siya ang nagapungko sa gihapon karon bilang presidente sang NORSU apang kinahanglan na niya nga magbiya sa karon. Sa malawig nga tuig niya nga pagpangalagad, madamo nga kadalag-an kag pagkilala ang naagom sang NORSU. Nakapatubas siya sang masobra 47,000 ka mga graduates sang magkatuhay nga kurso kag madamo sa ila ang nangibabaw sa pasinawan nga lubos nga nagpakilala sa NORSU bilang buluthuan nga may kalidad nga edukasyon kag mga faculty and staff.
Nagapangayo ako sang pasaylo tungod indi ako pamilyar sa iban nga nagapapili bilang masunod nga presidente sang ISAT-U.
Ginapabugal ko lang nga ipakilala sa inyo si Dr. Limson nga mahapos palapitan kag istoryahon, indi bugalon, may kabalaka sa mga manunudlo kag estudyante kag ang handom niya nga mapadayon ang kadalag-an kag pagkilala sa ISAT-U bilang unibersidad nga ‘performer’ kag may dekalidad nga edukasyon.
Kon nabatak niya kag napahamtang sa kadalag-an ang NIPSC (NISU) kag NORSU, wala sang duda nga kaangay sini ang iya himuon para sa ISAT-U.
Indi dapat mag-iraw ang iwag sang edukasyon sang ISAT-U, dapat nga magsustenir ang iya buylo kag dapat maduso ini padulong sa ganhaan sang lubos nga kadalag-an.
Ang kadalag-an sang magadumala sa ISAT-U mangin kadalag-an sang mga estudyante kag faculty and staff. Kadalag-an ini sang syudad kag probinsya sang Iloilo kag tanan nga Ilonggo.
Nagalaum kita ang ang Board of Regents magapili sang masunod nga presidente nga nagalantaw para sa interes sang buluthuan kag mga estudyante. Pilion kuntani nila ang may kabalaka sa buluthuan kag may pag-ulikid sa mga estudyante.
Wala sang malain sa paghandom nga mangin presidente sang unibersidad. Posible nga kwalipikado ang tanan nga intresado sa sini nga posisyon. Apang, kabay pa nga lantawon sang mga magapili sa masunod nga mangin presidente kon sin-o ang may ikasangkol nga mapadayon ang pagdabdab sang kaalam kag pagpabilin sang masulhay nga pagdumala sa iya nasakupan.
Kinahanglan sang ISAT-U ang presidente nga may ikasangkol, may napamatud-an, maayo magdumala, may kabalaka sa mga estudyante kag maayo ang relasyon sa faculty and staff.
Samtang, luyag ko lang magpasalamat kay Dr. Joel Limson, NORSU President, sa pagduso sa akon nga ipadayon ang pag-eskwela kag tapuson ang akon doctorate degree nga Doctor of Management in Public Administration (DMPA). Salamat gid sa imo paggiya kag pagsuporta sa akon. (bertladera@gmail.com/PN)
