PADAYUN ang pagtibuok sang bag-o nga mga kaso sang COVID-19 sa pungsod. Indi malipod nga magadugang man dira ang mataas nga numeo gikan sa syudad kag probinsya sang Iloilo.
Ang pamangkot: Sin-o ang may sala?
Tanan kita may sala. Apang mas labaw gid siguro ang kapaltahan sang gobyerno.
Halimbawa diri lang sa syudad sang Iloilo. Sige ang panawagan sang pamunuan sang syudad nga magsunod ang publiko sa minimum health protocols, indi maggwa sa balay kun indi importante, indi maglagaw bisan diin lang kag kun ano pa nga panugyan. May iban nga nagatuman, apang madamo ang nagasupak sa sini nga panawagan. Ang malain lang kay ang iban sa nagasupak mga kilala pa kag may katungdanan sa gobyerno.
Ginadumili ang indi importante nga pagtililipon. Wala nasakop ang mga pagtililipon para manghatag sang bulig sa mga tawo. Ang problema lang ugaling wala sang ginapili ang virus kun san-o sya manglatun. Indi man sya makasiling nga indi nya paglatunan ang pagtililipon sang gobyerno nga nagapanagtag sang bulig sa tawo. Ang buot ko hambalon kuntani idumili na lang ang tanan nga pagtililipon.
Maathag man kun kaisan nga ini nga exemption ginahingalitan sang mga ara sa pwesto agud maggamit sa pagpangampanya. Diin ka da nga nagakadto ang indi opisyal sang gobyerno apang ginakuno-kuno nga kaupod sa linyada sang nagapungko sa pwesto.
Siling sang mga pumuluyo sang syudad, may nagakape-kape man gani sa ila lugar bisan ginadumili ang mass gathering. Kape-kape dala pakilala sang kaugalingon sa mga tawo. Ti, ang ini nga klase sang pagtililipon okay lang?
Kulang ang sensiridad sang mga nagapungko sa pwesto agud ipatuman ang nagakadapaty sa pagpakigbato sa pandemya. Kun indi pabor sa ila bahin, indi pwede apang kun makaganar sila, okay lang.
Siling gani ni Mayor Jerry Treñas nga ang nagatuluhaw nga bag-o nga kaso sa syudad bunga ini sang mga pagtililipon kag sa kapabayaan sa mga ginaobrahan. Sila mismo nagaako nga matuod nga “super spreader” ang mass gathering bisan ano man ini nga sahi sang pagtililipon.
Ang mabudlay abi sa atun nagakalipat kita sang pandemya kun ara kita sa tunga sang kalipay, kasulhay kag bentaha sa kaugalingon. Daw wala lang sang pandemya kun maka kape-kape sa barangay. Daw wala lang virus kun makatipon-tipon sa mga hinun-anon kag mag-ulayhon sang kampanya.
Maathag man nga ang hulag sang nagapungko ginabanta nga makapabor sa ila reelection. Mas ginatakos ang pagkaepektibo sang hulag kun bala makapabakod sang ila pag-ungot poder.
Nakapoy na ang tanan. Hatagan man kuntani sang nagapungko sa pamunuan sang gobyerno sang maayo nga halimbawa ang mga tawo agud sa ila kaugalingon magtuman bisan wala ginabantayan./PN
