MAGGAMO ang politika sa syudad. Nagsugod lang ini sadtong Marso sang nagdeklarar si Cong. Jerry Treñas nga interesado sya magpadalagan sa pagkaalkalde sang syudad.
Didto na nagsugod ang linyahanay sang mga kapitan nga kaalyado ni Treñas. Halos wala na ginatahod sang mga kapitan si Mayor Joe Espinosa III bangud Treñas sila.
Abi sang tanan makanay ang pamulitika sang syudad sa 2019. Ini bangud nga nagdeklarar na si Treñas nga magapahuway sa politika gani ihatag niya sa bilas nga si Espinosa ang pagpadalagan sa pagkaalkalde sa syudad. Naghibi pa si Treñas sang nagpa-press conference sya sang iya desisyon nga indi na magpadalagan sa ano man nga posisyon sa syudad.
Kun wala naghaboy sang iya kalo sa pamulitika sa syudad si Treñas ayhan indi kaangay sini ang pamulitika subong. Ayhan indi magtuman ka athag ang pagbinahin-bahin sang mga kapitan sa syudad. Indi man siguro mangin hayag ang indi pagrespeto sang mga kapitan kay Espinosa.
Maathag nga maimpluwensya pa gid man si Treñas. Ngaa man? Ini makita sa Pag-ulikid program ni Espinosa kag sa kape-kape ni Treñas. Halos wala sang kapitan nga nagatambong sa Pag-ulikid program ni Espinosa bisan pa nga madamo sang serbisyo nga ginadala ang syudad sa tagsa ka barangay.
Pero sa kape-kape ni Treñas ara sanday kap, pati pa sanday kagawad. Aman pa ang mga Barangay Service Point Officers, Barangay Nutrition Scholars, Barangay Health Workers kag iban pa nga mga opisyal sang barangay.
Sa simple nga pulong si Treñas ang nagbutang sang bagina sa relasyon sang mga kapitan sa city hall. Kun indi magpadalagan si Treñas ayhan indi amo sini ang pagtrato sang mga kapitan sa alkalde sang syudad. Bisan gani ang Sangguniang Kabataan federation president daw wala man nagapangilala sa alkalde.
Bisan ang mga incumbent city councilors daw nagasalangisag man kun kay Treñas sila ukon kay Espinosa. Matuod may nag-commit na kay Treñas nga mga konsehal sang syudad. Pero sigurado ako nagalangot man ang ila buot kay Joe III.
Tani kun si Joe III na lang ang magapadalagan, tawhay ang election sa syudad. Ayhan wala na sang third force ukon fourth force.
Sa sini nga sitwasyon sin-o ang nagpaggamo sang politika sa syudad? Indi ayhan si Cong.? (jpranco1975@gmail.com/PN)
