Tubig, tubig, nga wala sang tubig?

WALA SANG tubig ang syudad pero ang mga opisina kag tawo nga may katungdanan nga maghatag sini sa mga residente nagakinamog pa.

Ginkasuhan sang Metro Iloilo Water District (MIWD) ang Iloilo City Government bangud sang paghatag sang franchise sa Prime Water Infrastructure nga maka-operate kag distribute sang tubig sa syudad nga franchise area man sang MIWD.

Ang kaso nga gin-file sa Office of the Ombudsman ginalakipan sang sand Culpable Violation of the Constitution, Grave Abuse of Authority, Gross Negligence, Grave Misconduct kag Acts Contrary to Law, Usurpation of Authority kag paglapas sang Anti-Graft and Corrupt Practices Act.

Ang mga ginkasuhan amo sanday Mayor Jose Espinosa III, councilors Plaridel Nava, Joshua Alim, Eduardo Peñaredondo, Lyndon Acap, Mandrie Malabor, Liezl Joy Zulueta-Salazar, R Leone Gerochi kag Candice Magdalane Tupas.

Wala nalakip sa kaso sanday councilors Ely Estante, Jay Treñas, Lady Julie Grace Baronda, Liga ng mga Barangay president Ma. Irene Ong kag Sangguniang Kabataan Federation president Leila Luntao bangud sa ila pag-abstain samtang solo nga nagpamatok si Councilor Armand Parcon.

Bilang reaksyon, nanindugan si City Administrator Hernando Galvez nga wala sang poder kag balasehan ang MIWD sa pagpasaka sang kaso. Ini bangud indi naman injured party ang MIWD bangud madugay na nga nadesisyunan sang Korte Suprema nga wala sang exclusivity ang water distribution sa syudad.

Sa bahin naman ni Councilor Joshua Alim, ginakabig niya nga malicious prosecution ang ginpasaka nga kaso sang MIWD. Bangun sini magapasaka man sang kaso si Councilor Alim sa MIWD.

Suno kay Alim indi matarong nga kasuhan sila sang MIWD bangud ang ila tuyo masolbar lang ang problema sa kakulangon sang tubig sa syudad.

Indi lang Prime Water ang gusto magsulod sa negosyo sang tubig sa syudad. Ang Manila Water sang Ayala magasulod man. Kun naaprubahan ang iya sang Prime, wala naman guro sang rason nga balibaran ang aplikasyon sang Manila Water. Sigurado kaso naman ini kun matabo.  Ini na ang ikatatlo kun matabo matapos una  na nga nahatagan sang franchise ang South Balibago Water Resources, Inc.

Maudgay na nga uhaw ang syudad apang ang iban dira, depensa todo sa gihapon sa ila interes. Samtang nagakinasuhay sila, nagapit-os naman ang mga pumuluyo sang syudad sa kakulang sang tubig.

Tani unahon anay bulong ang kauhaw sang mga Ilonggo antes sila magkinasuhay./PN

LEAVE A REPLY

Please enter your comment!
Please enter your name here