MASAMI naton makita ang mga balita tuhoy sa mga nagakadakpan nga mga indibidwal bangud sa pagduso sang ilegal nga druga.
Indi na bag-o sa aton palamatin-an. Nasum-uran na gani ang iban sa sini nga balita tungod magluwas sa alyas lang ang ngalan, buron pa ang nawong kag indi mamurutan.
Nagahibi ang semana kon wala sang may madakpan. Indi lang gamay nga linikit, halos kinilo-kilo na ang marekober sang kapulisan.
Nagapati ang Iloilo Provincial Police Office nga malapit na lang malab-ot ang target nga madeklarar nga drug-cleared ang 1,721 ka mga barangay sa probinsya tungod kutob sang Enero 8, 2026, yara sa 1,720 ang natigayon nga ma-drug-cleared.
Ginatutukan karon ang Barangay Bulaqueña sa Estancia, Iloilo, nga nagapabilin kag isahanon nga wala pa ma-drug-cleared.
Manami pamatian nga naga-epekto ang paghimakas. Apang, indi pwede nga tunlon nga wala ginaligon-ligon ang ini nga mga pahayag.
Kon nagapati ang PDEA kag PNP nga isa na lang ka barangay ang wala pa ma-drug-cleared, ngaa halos kinilo-kilo sa gihapon ang marekober sa tagsa ka may madakpan nga drug personality?
Ngaa padayon nga may nagalusot nga ilegal nga druga? Kon sa mga una nga pagsinapol natumod na ang mga posible nga ginahalinan sini, ngaa asta subong wala sang report nga may nabungkag nga laboratoryo ukon may nadakpan nga mismo ginahalinan sini nga mga ilegal nga druga?
Gina-apresyar naton ang kabakas sang aton kapulisan sa Iloilo Police Provincial Office (IPPO) tungd sa isa ka bulan lang kapin sa 25 million pesos nga balor sang shabu ang narekober kag nadakpan ang 32 ka drug personalities, lakip ang 12 ka high-value individuals.
Milyunes nga balor sang ilegal nga druga ang marekober sa palibot sang probinsya sang Iloilo kag ang masakit sina tungod may duha ka barangay kapitan nga nadakpan nga nagaduso sang ilegal nga druga.
Sa pagtakop sang tuig 2025, naglab-ot na sa 113 sa 180 ka barangay sa syudad sang Iloilo ang drug-cleared. Ginatutukan man kuno sang syudad sang Iloilo nga malab-ot ang target nga tanan nga barangay mahilway na sa ilegal nga druga sini nga 2026.
Ginahatagan sang atensyon ang 67 ka barangay sa syudad sang Iloilo agud nga mahilway na sa ilegal nga druga.
Ginapabugal gid nga sang 2025 may 17 ka barangay ang nadeklarar nga drug-cleared tungod sa 27 ka madinalag-on nga police operations sa fourth quarter sang 2025 kag may 43 ka mga nadakpan.
Sang Pebrero 3 lang, masobra 200,000 pesos nga balor sang ilegal nga druga ang narekober sa Zone 3, Barangay Caingin, La Paz, Iloilo City.
Sa panahon sang Dinagyang, masobra 8.6 million pesos nga balor sang ilegal nga druga ang nakumpiskar sang kapulisan.
Malaba ang listahan kon aton tamdan, wala naga-untat ilabi na nga samtang giansulat naton ini nga panugdaon, padayon ang tiid sang kapulisan sa ila target nga pagadakpon.
Liwaton ko, wala sang kwestyon sa kahugod kag kapisan sang aton kapulisan. Ginahimakasan nila nga madakpan ang mga nagaduso sang ilegal nga druga.
Ang akon lang pamangkot, tubtob san-o ang lagsanay? Ngaa indi matapna antes pa makasulod sa probinsya kag syudad sang Iloilo.
Kon ginapamangkot ang mga nadakpan kon sa diin sila nagakuha sang ila suplay, ngaa indi pagtumbukon ang mayor nga ugat? Ngaa wala sang may nagakadakpan?
Pila na ka sinapol ang aton nabatian tuhoy sa kon paano tapnaon ang ilegal nga druga, may plano nga pabutangan sang x-ray machine ang mga pantalan, may K-9 nga mabantay para matagam ang mga nagapalusot sang ilegal nga druga kag pabaskugon ang intelligence monitoring.
Sa paglipas sang panahon, wala sang report nga may ginpahamtang nga x-ray machine ukon may ginasagod nga K-9 agud magdedikar sa pagbantay sa mga pantalan.
Kon indi seryoso ang gobyerno sa mga ginaduso nga mga solusyon, paano naton matapna ang padayon nga nagadata nga ilegal nga druga?
Ang deklarasyon nga drug-cleared ang isa ka barangay, sa papel lang ina. Pampahamot sa promosyon. Dekorasyon sa dingding kag para patihan nga nagahimakas man ang ahensya. Apang ang matuod, sige ang kamang sang ilegal nga druga. Ngaa? Tungod wala ginasolusyunan ang ginahalinan, ginalagas lang kon makasulod na para kon madakpan, ang makadakop, may batunon naman nga award para ibangil sa pagsaka sang rangko. Para may rason kon paano ginagamit ang intelligence fund.
Tama na nga sarswela. Mangin komitido kag seryoso na dapat ang mga ahensya sang gobyerno nga ipatuman ang mga naistoryahan nga solusyon agud nga matapna ang pagsulod sang ilegal nga druga kag mahagan-hagan ang lagsanay batok sa mga dalakpon.
Paano makakumpas sa operasyon sa pagbaligyaanay sang ilegal nga druga ang isa ka persona nga yara sa sulod sang karsel?
Ang nadakpan nga mga persona sa Santa Barbara, Iloilo nga nakuhaan sang balor 7.5 million pesos nga shabu sang Pebrero 2, nagtuad nga may nagapadihot sa ila nga persona nga yara nahunong sa Bilibid.
Halin pa sadto tubtob karon, may mga madakpan nga ang utok-utok didto sa sulod sang prisuhan, ang ginakuhaan sang suplay didto sa sulod sangh prisuhan.
Makapoy maminsar sang solusyon? Mas mahapos kon sila ang lagson? Para sa medalya kag papel?
Ginasiling nga indi ini masarangan sang kapulisan, dapat yara ang gobyerno lokal kag mga sektor sa sosyudad.
Seryoso, determinado, dedikado. Ini ang kinahanglan agud mauntat ang lagsanay sang kapulisan kag sang mga nagaduso sang ilegal nga druga. (bertladera@gmail.com/PN)
