UNDOUBTEDLY, indi na mapunggan ang aton Rising Tennis Star nga si Alex Eala sa iya pagdala sang kadungganan sang iya mga kasimanwa sa kon diin man dalhon siya sang huyop sang hangin sa World Tour sa global tennis.
Nga kon ang 1923 Pulitzer for Poetry winner, kag playwright, Edna St. Vincent Millay pa ang pahambalon para kay Alex: “Yet there isn’t a train I wouldn’t take, / No matter
where it’s going.” Labi na gid sa padayon man nga suporta sang iya mga kasimanwa, Win or Lose man ang resulta sang iya mga hampang.
“Indi ko handom ang kabantugan,” paathag gani ni Alex, “kundi ang ma-representar ang akon pungsod Filipinas sa akon masarangan nga suportado sang akon mga kasimanwa, kag kon ano man ang mabulig ko sa mga kubos (gamit ang iya dinag-an) kag sa futuro sang mga kabataan sa Tennis diri sa Filipinas.”
***
Masakit pamatian ang pagpakanubo kay Alex Eala sang mga mahisaon, katulad sang mga TV hosts sang ABC network nga ang nakita lang nila ang kakulangan sang aton 20 anyos nga tennis player samtang may napakita naman ini sang sobra-sobra pa gani nga pag-uswag sa iya mga hampang.
In fact, nalutos pa sini ang pila ka WTA players sa top 20 bracket, nga wala man gani ginlauman sang madamo kay yara pa lang sadto si Alex sa WTA (Women’s Tennis Association) ranking nga 140.
Mga mahisaon matuod, kag racist pa tungod indi nila mabaton ang kasubong nga ikasarang sang isa ka Asyano sa tennis, nga sa madugay nga panahon gindominar sang taga-Amerika kag Taga-Uropa.
Kag sa sinang kadalag-an ni Alex luyag gihapon nila itum-ok kag pakalainon si Alex. Gina-stress pa gani nila nga ang naabot niya nga popularidad bangod gid lang kuno sa iya Army of Filipino fans nga gapuno sang gallery kon diin man gahampang si Alex sa World Tennis Tour sang WTA sa US, Europe kag sa Asya.
Ti ano na lang atong mga tumalagsahon nga pagdaug ni Alex batok sa mga WTA top tennis players nga na-encuentro niya? Indi bala ato dalayawon kag tumalagsahon nga mga pagdaug?
Sa mga mahisaon kag racist, be honest naman kamo. Indi man lang ang mga puti kag ang mga itum ang may ikasarang sa sports nga tennis kon matagaan lang sang parehas nga oportunidad ang iban.
Kon wala pa kamo kahibalo, yari ang mga ginpanglutos ni Alex nga indi luyag tagaan importansya sang mga mahisaon kag racist nga TV hosts sang ABC network, samtang sa una pa lang ka tion nangin pro (2025) si Alex nga dala lang ang WTA No. 140 nga ranking:
Sa Miami Open 2025, ginlutos ni Alex diri si No. 2 Iga Swiatek, nga former World No. 1 halin sa Poland sa quarterfinals sadtong Marso 27, 2025 sa straight sets 6-2, 7-5.
Subong man ang Australian champion nga si Madison Keys sa Round 32 (Round 3), 6-4, 6-2.
In fact, nakalab-ot diri si Alex sa semifinals sang Miami Open 2025, nga nagduso paitaas sang iya ranking sa No. 29 halin sa 140.
Ti, indi bilib sina ang mga aswang nga luyag patyon ang lapsag bag-o lubos matawo kag ma-enjoy bisan sang iya bisan mga kasimanwa man lang ining pinasahe nga “talent and skills” nga hatag sa iya sang Ginoo? Aba, kag luyag pa nila updon sa panggus-ab ang mga zombie sa hanay sang pila man ka mahisaon nga mga top seeds!
Sa masunod nga Dubai Championships ginlutos man gani ni Alex si Jasmine Paolini sang Italy, nga World No. 4 sa WTA singles, 6-1, 7-6.
Sa nagligad lang nga Miami Open 2026 sang Marso, ginlutos man ni Alex si Laura Siegenund sang Germany. Dayon si Magda Linette sang Poland, bag-o nalutos kay Karolina Muchova (No. 13) sang Czech Republic.
Unfortunately, tungod sa “cruel” nga roll-over point ranking type nga ginapatuman sang WTA, ang kapaslawan ni Alex nga madepensahan ang iya semifinals rank nga No. 29 sa Miami Open 2025 nanaog sa WTA 46.
Well, normal man lang ini nga nagakatabo sa roll-over ranking labi na kon malugaw-an ang higher-ranked nga player sa pagpabilin sang iya higher seeding, nga mabawi man sang player sa masunod niya nga mga kadalag-an.
Meantime, gapabilin si Alex sa “world’s elite women’s singles players”, nga dala gihapon ang pagkilala sa iya nga “Most popular WTA player” kag No. 1 sa TV ratings.
Sa ining ulihi ni Alex nga hampang sa Linz, Austria nalampasan naman ni Alex ang Rounds 1-3, nga makapadugang naman seguro sang iya WTA ranking. See you later with Alex in Stuttgart, Germany!/PN
