ANG pagkuha sang simpatiya kag boto sang mga botante sang isa ka kandidato halos pareho lang ini sa pagpaninguha agud mabaligya ang isa ka produkto sa merkado.
Una sa tanan, kinahanglan mo anay, kon kandidato ka, mahibal-an ang kapinasahe sang mga botante – personal kag upod sa ila pamilya, ugali bilang Filipino, kinaiya sa ila partikular nga tribu ukon localidad, kag ang ila mga kinahanglanon kag luyag matigayon agud mapa-ugwad ang ila pangabuihi.
Ikaduha, kon nahibal-an mo na ining ila kapinasahe, kinahanglan may programa ka nga angay sa ila pagka-kinahanglan.
Ikatatlo, dapat masaligan ka gid nila sa imo kilala nga personalidad bilang sinsero, matutom nga tawo kag may ihibalo kag ikasarang sa pag-serbisyo sa pumuluyo.
Kon mabakud na ang pagsalig nila sa imo, segurado nga wala sing tentasyon, kwarta man ukon pabor, nga makatulod sa ila agud talikdan ang imo kandidatura.
Kuhaon man lang nila ang kwarta ukon pabor nga ina, kon mapilitan gid sila nga batunon ina, kag botohon ka gihapon tungod ikaw gid ang ila naluyagan kag masaligan.
***
Isa ka political analyst ang nagapati nga, in the long run, ang masalpukay gid sa pagka-Presidente sa ining eleksyon amo sanday VP Leni kag Marcos Jr.
In fact, handom gid man ni Marcos Jr. nga ma-encuentro si VP Leni sa pagka-Presidente sa palaabuton nga Mayo 9, 2022 nga eleksyon. Ina tungod indi niya mabaton nga ginlutos siya ni VP Leni sa pagka-VP sang nagligad nga eleksyon.
Tan-awon ta abe kon ano gid ang possible madangtan sang panghangkat ni Marcos Jr. sa padayon nga pag-seryoso na sang kampanyahanay tubtub Mayo 7, 2022.
Tan-awon ta ini sa apat ka factors nga ginagamit sa marketing sang produkto sa aspeto sang Demographics, Geographics, Psychographics, kag Behavioral nga aspeto sang kampanyahanay.
***
Kon parti sa Demographics, sa kategoriya sang “gender”, daku ang mangin bentaha ni VP Leni kay Marcos Jr. tungod nagaisahanon siya nga kandidato nga babaye sa pagka-Presidente. Kon sa ethnicity naman, halin sa daku nga ethnic group si VP Leni bilang Bicolana. Si Marcos halin man sa daku nga tribu sang mga Ilokano. Basi magpatas sila sa pagkuha sang suporta sandig sa ining ethnicity.
Sa Geographics, malapad na nga mga lugar ang nalab-ut nanday VP Leni kag Marcos Jr. Sa bahin ni Marcos Jr., ina tungod lang sa pagpangampanya sini sa pagka-senador kag Bise Presidente. Si VP Leni nakakampanya sa bug-os nga pungsod kag nangin Bise Presidente nga nakahatag oportunidad sa iya agud makadala sang mga programa kag proyekto sa mga kubos sa madamo nga lugar. Tungod sini, may bentaha diri si VP Leni.
Sa Behavioral nga aspeto, importante sa pumuluyo ang isyu sang korapsyon tungod daku ini nga halit sa kaayuhan sang pagpangabuhi nila. Gani, maupod ini sila sa kandidato nga honesto kag maki-Diyos katulad ni VP Leni.
May highest rating sang Commisison on Audit ang upisina ni VP Leni sa kalimpyo sang record. Samtang si Marcos Jr. indi makalikaw sa isyu sang ill-gotten wealth sang iya ginikanan bilang eredero sang ila manggad. Found guilty man si Marcos Jr. sa tax evasion case sa indi pagbayad sing buwis halin sadtong 1982 tubtub 1985, nga na-confirm sang Court of Appeals sadtong 1997. Basi ma-disqualify pa gani ini tungod sini.
Suportado si Marcos Jr. sang pila ka dynasties nga luyag lang siya gamiton sa ila padayon nga handom nga mapabilin ang ila Authoritarian, corrupt kag malupigon nga pagpamuno sa mga pumuluyo.
Si VP Leni, on the other hand, ginapalabi ang people-power like nga suporta sang mga volunteers nga madamo sini nagalakat lang agud ipabatyag sa iya ang ila mainit nga pagsuporta sa iya kag sa kawsa sang Demokrasya kag Kahilwayan kag “rule of law”, labi na gid sa karon nga madata ang human rights violations.
Luyag man ni VP Leni madampigan ang aton Demokrasya batok sa mga rebelde paagi sa “popular support” sa gobyerno sang mga “napabay-an” sang gobyerno nga indi na kinahanglan ang magpinatyanay.
Sa sining kawsa, suportado man si VP Leni sang maki-Demokrasya nga mga pumuluyo sa pungsod katulad sang mga Ilonggo sa pagpanguna ni Mayor Jerry Treñas kag Gob Arthur Defensor Jr.
Natural lang nga suportado man si VP Leni sang maki-Demokrasya nga mga pungsod katulad sang United States, European Union kag Japan, nga makabulig sa pagpaseguro sang aton soberanya sa West Philippine Sea batok sa China./PN
