[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON | NAGALAGUB’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
Ni ROBERTO ‘BERT’ LADERA
[/av_heading]
[av_textblock size=” font_color=” color=”]
Wednesday, May 24, 2017
[/av_textblock]
[av_textblock size=” font_color=” color=”]
Nagapabilin sa pang-ino-ino sang mga natungdan ang kasakit sang mga tinaga nga ila nabatian, napagkit sa ila balatyagon ang eksperyensya nga wala nila ginalauman. Ang tanan natabu sa tion sang ila kasubo. Ang tanan natabu sa balay sang gamhanan nga Makaaku.
Naglipas man ang inadlaw, nagtahaw man ang mga balatyagon, apang ang inagihan ang nagapabilin nga handumanan.
Padayon nga nagasinggitan ang pamilya Sondia sang ila ginakahidlawan nga hustisya gikan sa simbahan nga ila ginatahod, ginapalangga kag ginadedikaran sang ila pagtuo sa Diyos.
Nagahulat ang pamilya Sondia sa tikang nga pagahimuon sang liderato sang Arsobispo sa Jaro angot sa mga akto nga ginhimo ni Monsignor Maria Juanito Tuvilla sang simbahan sang Sta. Barbara.
May yara sang tagsa-tagsa ka bersyon ang magtimbang nga bahin angot sa kon ano ang natabu, kon ano ang ginsuguran kag kon ano ang nadangatan nga nagresulta sa pagsakit sang balatyagon sang tagsa-tagsa.
Una na nga ginreklamo sang pamilya Sondia ang hinali nga pagpauntat ni Tuvilla sa 16-anyos nga babaye nga nagakanta sang ambahanon nga “Iingatan ka” bangud kuno nga wala ginatugutan sa simbahan ang ini nga lihok kag angay lang nga buhaton sa patyo.
Nagpalapit nga akig kag nagsing-al ang pari, suno sa alegasyon sang pamilya, nga gintunaan sang pagbatyag sang kakulba, nagkurog kag halos madula sa iya kaugalingon sa kahuya ang 16-anyos nga babaye.
Nagdangat sa puisay tubtub nga halos magpangdulom ang pinsar sang subang, sang napatay nga iloy nga amo ang ginmisahan sa simbahan, nga desidido na nga magpapriso kon iya nga matuk-apan ang pari bangud sa iya nga akto batok sa ila.
Nagpaathag si Tuvilla nga may patakaran siya nga ginapatuman sa sulod sang simbahan kag angay nga sundon sang mga natungdan, dapat hugot nga ipatuman kag wala sang makapinagusto lamang agud nga indi pagpamarisan sang iban.
Wala sang may makasupak sa patakaran nga ginapasunod sang simbahan sa iya mga tumuluo. Wala sang dapat nga lapason nga patakaran ang mga tumuluo samtang yara sa sulod sang simbahan. Dapat nga ang tanan magiyahan kon ano ang himuon kag indi sapat nga himuon sa sulod sang simbahan.
Kahibalo kita nga may mga patakaran kag kon may nalipat kag may nakalapas dapat gid bala nga sing-alan?
Sin-o bala ang dapat maghatag sang husto nga giya sa mga nagtalang sang banas? Sin-o bala ang mas may malawig nga pasensya ukon masangkad nga paghangop sa sitwasyon? Ano bala ang pamaagi sa pagsaway sa mga tawo nga nakahimo sang sayop sa mga patakaran sang simbahan?
Sin-o ang mas nakahibalo sang tawhanon nga paghangop? Sin-o ang nakahibalo sang husto nga pamaagi sa pagtunda sa mga natungdan sang ila paglapas sa patakaran?
Mataas ang paglantaw sang mga tumuluo sa kay Monsignor Tuvilla, apang ginpanubo niya ang ini nga paglantaw bangud sa iya mga akto. Kahibalo kita nga tawo lamang siya, nagakalipat sa angay nga pagabuhaton, nahinalian sa iya mga aktwasyon kag posible siya nga makasayop sa iya reaksyon.
Apang isa siya ka Monsignor, gani halos indi mapanas ang natuga nga pilas kag padayon nga nagalagub./PB
[/av_textblock]
[/av_one_full]
