[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’2 ka adlaw nga transport strike kasado na | 100% sang de-pasahero nga dyep ginalauman mauntat-biyahe’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
Ni Ime Sornito
[/av_heading]
[av_textblock size=” font_color=” color=”]
Monday, June 5, 2017
[/av_textblock]
[av_textblock size=” font_color=” color=”]
Syudad sang ILOILO – Kasado na ang duha ka adlaw nga transport strike sa bug-os nga nasyon nga ma-umpisa subong nga adlaw tubtob bwas.
Ginalauman naman nga 100 por siento sang mga de-pasahero nga dyep sa isla sang Panay ang maupod sa lapnagon nga transport strike nga ginkasar sang dalagku nga mga transport groups sa Panay subongman sa iban nga bahin sang pungsod.
Sa interbyu sang Panay Balita kay Raymundo “Boyet” Parcon, presidente sang Iloilo City Loop Alliance of Jeepney Owners and Drivers Association (ICLAJODA), 100 por siento gid sang de-pasahero nga mga salakyan ang maupod sa duha ka adlaw nga untat-biyahe baliskad sang nagligad nila nga transport strike nga may pila ka mga transport groups nga nagbiyahe.
“Ang sa amon under sa ICLAJODA 100 percent nga mauntat kami, dugangan sang ICADA, ICAJODA, PISTON-PANAY, kag CIPJODA. Amo na ang amon na-istoryahan nga maupod gid sa hublag-protesta,” hambal ni Parcon.
Maupod man ang mga operators nga may isa ukon duha ka bilog nga de-pasahero nga dyep.
Ang operator naman sang mga taxi sa isla sang Panay ang indi mag-upod sa untat-biyahe pero suportado nila ang kawsa sang mga transport groups.
Luwas sa mga transport groups, maupod man ang puersa sang nagkalain-lain nga mga sektor kaangay sang Bayan-Panay, Gabriela, Karapatan kag Partido ng Mangagawa.
Kag kadungan sang transport strike, magahiwat sang pamulong-pulong ang mga transport groups sa lima ka mga lugar sa palibot sang syudad.
“May ara kami lima ka mga centers nga puede kadtoan sang mga pumoluyo. Ang una sa Tagbak, ikaduha sa kapitol, ikatatlo sa UP, ikaapat sa ITGSI sa Ungka, kag ikalima sa atubang sang SM City,” dugang ni Parcon.
Ginpasalig man niya nga wala sang matabo nga pang-harass sa iban nga mga drayber nga magdesisyon nga magbiyahe subong kag bwas. Indi nila pagpiliton ang iban nga mga drayber nga mag-upod sa strike.
“Diri sa city amo na nga ginakulbaan kami no kay sa amon grupo wala sing drayber nga mang-harass kay na-declare na kami nga wala inom sa dalan. Kon ara sila indi sila maghaboy sang malain nga sugilanon sa aton utod nga drayber nga nagabiyahe gid man,” pasalig pa ni Parcon.
Ginsulit man sini nga ang kawsa nga ila ginadala indi lang para sa ila mga miembro kundi para sa tanan nga mga transport groups nga indi makasarang magbayad sang minilyon ka pesos kon ipatuman sang gobyerno ang modernization program ukon pag-phase-out sa 15-anyos pasaka nga edad sang mga salakyan.
IPPO MABANTAY SA DALANON
Kadungan sang duha ka adlaw nga transport strike, ang Iloilo Police Provincial Office (IPPO) magapalapta sang ila mga pulis sa mayor nga mga dalanon para indi na masulit ang natabo nga pagpang-harass sang pila ka mga drayber.
Sa interbyu sang Panay Balita kay Chief Inspector Aaron Palomo, tagpamaba sang IPPO, maga-deploy ang mga police stations sang ila mga tinawo sa mga dalan para masiguro nga indi na masulit ang natabo sadtong Pebrero kon sa diin ginhaboy sang bato ang tatlo ka mga drayber sang Calinog Bus Line.
“May deployment kita sang aton personnel sa mga dalanon kag ginhambalan naman naton sila nga mag-provide sang maximum police visibility,” hambal ni Palomo.
Luwas sini, ang puersa sang Task Force on Road Safety ang ma-alerto man para magbulig sa mga pulis nga nagabantay sa dalanon.
Mapalibot man ang IPPO sang pila ka mga trak sa mga dalanon para mag-pickup sang mga pasahero nga posible ma-stranded kadungan sang duha ka adlaw nga transport strike.
Ginahinyo man nila ang lokal nga mga pangulohan nga magbulig man sa pagbantay para mapabilin nga malinong kag matawhay ang duha ka adlaw nga transport strike.
LIBRE SAKAY
May itanyag naman ang gobyerno probinsyal sang Iloilo nga libre nga sakay para sa mga empleyado subongman sa mga pumoluyo nga maapektohan sang transport strike.
Ang mga salakyan sang Provincial Engineer’s Office kag General Services Office ang gamiton sa pagpasakay sa mga empleyado kag pumoluyo nga mapadulong sa syudad.
Lakip sa mga lugar nga padulongan sang mga salakyan sang probinsya amo ang:
* Guimbal Plaza – PEO Service Vehicle No. 16
* Janiuay Plaza – PEO Service Vehicle No. 17
* Maasin Plaza – PEO Service Vehicle No. 18
* Mina Plaza – PEO Service Vehicle No. 19
* Alimodian/San Miguel Plaza -PEO Service Vehicle No. 20
* Pototan Plaza – PEO Service Vehicle No. 22; kag
* Kapitol padulong sa Provincial Equipment Pool sa Sta. Barbara – PEO J.T 1
Gamiton man ang mga van sa pag-pickup sa mga empleyado sa Pavia People’s Terminal sa Ungka, Ticud Terminal sa Baldoza, Oton Plaza, Mohon Terminal, Guimbal plaza, kag Savannah Iloilo.
TRANSPORT STRIKE INDI PANGSABOTAHE SA PAGBUKAS KLASE
Samtang, ginhimutig sang Pinagkaisang Samahan ng Tsuper at Operator Nationwide ukon PISTON Panay Chapter nga pangsabotahe sa pagbukas sang klase ang ila ginkasar nga transport strike.
Sunu kay PISTON Panay President Edgar Salarda, una nga gin-eskedyul ang transport strike sadtong Mayo 22 kag 23 pero ginpa-atras nila bangod nga ulihi na naghatag sang ila “commitment” nga mag-upod diri ang iban nila nga mga miembro.
Ginhambal pa ni Salarda nga ginabutang nila sa adlaw nga may yara trabaho ang untat-biyahe bangod kon ibutang nila sa Sabado kag Domingo indi mabatyagan sang gobyerno ang ila protesta./PB
[/av_textblock]
[/av_one_full]
