GINPATIGAYON ang Confirmation of Charges, ukon Pre-Trial, hearings, sa Crimes against Humanity nga kaso sa ICC batok kay anay Presidente Rodrigo Duterte sa sulod sang apat ka adlaw halin Pebrero 23 tubtub Pebrero 27, 2026.
Natalana ining Pre-Trial hearings sadto pa sang Setyembre 3, 2025 apang na-postpone tungod kay ginpangayo ini sang DefenseTeam ni Duterte, nga gintugtan naman sang International Criminal Court (ICC).
Napasugtan pa gani si Duterte nga indi makatambong personal sa sining hearings as pagpangabay sang lead legal counsel sini nga si British-Israeli lawyer Nicholas Kaufman, tungod sa kuno problema niya sa ikaayong lawas.
Ginrepresentaran ini ni Kaufman sa hearings upod ang ICC-assigned associate counsel nga si Dov Jacobs, nga may pag-ubay man sang pila ka abogado nga mga Filipino ni Duterte.
Ang Prosecution, nga nagduso sang akusasyon batok kay Duterte, ginapangunahan ni ICC Deputy Prosecutor Mame Mandiaye Niang. Kaupod sa Prosecution ni Niang si ICC Assistant to Counsel Atty. Kristina Conti.
Samtang ang mga biktima sang War on Drugs ni Duterte gin-representaran sang Common Legal Representatives of Victims (CLRVs) appointed sang ICC Chamber nga sanday abogado Joel Butuyan, Gilbert Andres, kag Paolina Massidda halin sa Office of Public Counsel for Victims (OPCV) sang ICC.
Ginpasugtan man diri nga maka-participar ang mga biktima sa sining Pre-Trial hearings.
***
Ang purpose sang 4-day Pre-Trial hearings amo ang pag-determinar kon bala may “substantial grounds” sa pagpati nga si Duterte nag-komitir sinang ginaakusar siya nga mga krimen.
Nag-atubangay diri ang Prosecution Team sa bahin sang mga nagaakusar nga mga biktima kag/ukon upod ang ila pamilya kag ila mga abogado, kag ang Defense Team ni Duterte sa ila pagbayluhanay sang mga testimonya kag ebidensya.
Kon ang tanan, ukon pila, sang charges ang ma-confirm, ipasaka na ini sa Trial sa atubangan sang ICC, kon diin madesisyunan na kon bala Guilty ukon Innocent si Duterte.
PROSECUTION
Gin-akusar ni Niang, in open court, si Duterte, 80, bilang “indirect co-perpetrator” sa gina-alegar nga “widespread and systematic” nga pagpatay sang mga suspetsado sa illegal drugs nga natabo sadtong Nobyembre 2011 tubtub Marso 2019 – nga nagalakip sang termino ni Duterte samtang Meyor pa sang Davao City kag sang Presidente na sang Filipinas.
Sunu kay Niang, ang charges nagalab-ot sa 49 ka insidente sang Murder kag Attempted Murder sang 78 ka mga biktima – nga matingub sa tatlo (3) ka counts sang Crimes Against Humanity.
“Merely a fraction” lang ini, sunu pa kay Niang, sang kabug-usan sang pagpamatay sa idalom sang “illegal” nga War on Drugs Campaign ni Duterte nga nagbiktima sang mga 12,000 tubtub 30,000 ka mga tawo.
Sa paghingapos, ginpat-ud ni Niang nga “criminally liable” si Duterte sa ining tatlo (3) counts nga Murder kag Attempted Murder.
3 counts sang Murder kag Attempted Murder
Ang una sa sining tatlo (3) ka counts nga krimen amo ang ginaalegar nga involvement ni Duterte bilang co-perpetrator sa 19 ka Murder nga natabo sa tuig sang 2013 kag 2016 samtang Meyor pa sang Davao City.
Ang ikaduha, angot ini sa 14 ka Murder sang so-called “high value targets” sang 2016 kag 2017 sang Presidente na siya.
Ang ikatlo nagasakop sang katorse (14) ka Murder nga ginkomitir sa tion sang “clearance” operations sang ginaalegar nga lower-level drug users, ukon pushers, sa katung-anan sang 2016 kag 2018.
Matigda nga ginsiling ni Niang nga “Duterte embraced criminality from the beginning of his career.”
Ginlakip man sang Prosecution bilang “co-perpetrators” sa War on Drugs ni Duterte ang masunod:
* Former Philippine National Police (PNP) chief Senator Ronald “Bato” Dela Rosa;
* Sen. Christopher Lawrence “Bong” Go;
* Former National Capital Region Police Office (NCRPO) regional director Vicente Danao;
* Former NCRPO regional director Camilo Cascolan;
* Former PNP chief Oscar Albayalde;
* Former National Bureau of Investigation (NBI) director Dante Gierran;
* Former Philippine Drug Enforcement Agency chief Isidro Lapeña; kag
* Former Department of Justice (DOJ) Secretary Vitaliano Aguirre II.
Sa ila pahayag, ang mga biktima ukon ang ila pamilya nagpadumdum sa publiko nga indi sila dapat malipat as kapintas sang Duterte Regime.
Nagresulta ini, sunu as ila, sa mga 30,000 ka pagpamatay, mga 300,000 ka arbitrary imprisonment, kag ind ma-account nga biktima sang “torture, sexual assault, and other forms of crimes against humanity.”
Gin-ugyunan ini Atty. Butuyan sa pagsiling, sa iya pagpanghingapos, nga ang paghilway sa kay Duterte gabalewala ini sang “Due Process” kag Rule of Law nga magapasanyog pa sang “Gospel of Impunity”, ukon ang paghimo sang illegal nga wala sing silot, sa pungsod.
DEFENSE
Sa tion sang “opening statement” ni Kaufman, siling niya sa ICC judges nga ang mga ebidensya batok kay Duterte “wholly insufficient” kag ang mga charges mga “grievously misplaced and politically motivated.”
Gin-insistiran man niya nga ang natabo nga pagpamatay indi extra-judicial killings (EJK) kag ma-justify bilang “isolated cases” kag kabahin sang self-defense sang mga pulis batok as “nanglaban” nga drug suspects; despite sang “damning evidence” nga sunu sa Prosecution gapakita otherwise sa video kag testimonya sang mga eye-witnesses.
***
Ginpahibalo ni Presiding Judge Iulia Antoanella Motoc nga ang ICC may 60 ka adlaw pagkatapos sang Pre-Trial hearings agud maaktuhan kon ano gid ang panindugan sini. Nga, sa iya man pagpaathag, pwede magresulta sa paghiwat na sang Trial ukon indi na, ukon may appeal pa agud indi anay mahiwat (postpone) ang Trial./PN
