[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’ 7-ANYOS NGA BATA NASAPWAN PATAY SA CR’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”][/av_heading]
[av_textblock size=” font_color=” color=”]
Thursday, June 22, 2017
[/av_textblock]
[av_textblock size=” font_color=” color=”]
Syudad sang ILOILO – Nagapalanig-a na ang bangkay sang pito ka tuig nga bata nga babaye sang nasapwan sa ibabaw sang lababo sa comfort room (CR) sang Old Poblacion Market sa banwa sang Sara, Iloilo ala-1:21 sang kaagahon kahapon.
Ginkilala ang biktima kay Rizza Mae Mercarder, residente sang Brgy. Aspera, Sara kag Grade 3 pupil.
Nakaagom ang bata sang mga lagob sa lawas partikular sa liog, patimaan nga ginkuga tubtob napatay.
Sa interbyu sang Panay Balita kay Chief Ronnie Brillo, hepe sang Sara Municipal Police Station (MPS), ang agi kag partner sini nga tuyo kontani mag-date sa daan nga merkado ang nakasapo sa nagatakilid nga bangkay sang bata. Sa kakulba, nagdalagan padulong sa plaza ang agi kag nagpangayo sang bulig.
Gilayon man nga nagpadulong sa daan nga merkado ang mga ginikanan sang biktima nga naga-obra lang sa peryahan sa plaza kag amo na lang ang pagtalangison sang iloy sang nakita nga patay na ang ila bata.
Sunu pa sa kapulisan nga wala na sang ginasuksok nga panty ang biktima kag luslos naman ang panapton sini sa ibabaw nga bahin sang iya lawas.
“Mga pasado ala-una, may mga agi nga nagkadto sa merkado, ang agi guro nga ni ma-date ni sila. Samtang sumulod sila sa day care sa tunga sang merkado, nakita nila ang bata nga naga-uba na sa ibabaw sang lababo. Sumiyagit ang agi pakdto sa plaza. Nagdalagan ang tanan nga tawo sa crime scene, nakita nila ang bata nga nakauba na kag way panty tapos nakaluslos ang t-shirt nga tiskog na. Amo to nanawag sila sa pulis. Kita naton nga nagpalanig-a na ang lawas,” pagsaysay ni Brillo.
Sa pag-eksamin naman sang doktor sa Sara sa biktima, nadiskubrehan nga may bulbol nga nakita sa kinatawo sang bata apang indi pa nila madeterminar kon ginhimuslan ini.
Antes naman ang insidente, sunu sa mga testigo nakita nila nga nagalakat ang biktima upod ang duha ka suspek nga sanday John Michael Matchenal, 18, sang Brgy. Aldeguer, Sara, kag Jay-r Posadas, 19, sang Brgy. Dungman, San Dionisio pero nakapauli man sadto sa Brgy. Aldeguer, kag nakatrabaho sa peryahan.
Sa pagpati ni Brillo bangod nga kilala sang bata si Posadas nga naka-obra sa peryahan, nag-upod ini sang ginhagad tubtob nga nagsulod sila sa daan nga merkado nga malapit lang sa peryahan mga alas-10 sang gab-i.
Pero posible wala makahibalo ang bata sa motibo sang duha ka suspek rason nga sang gintuyo sia nga himuslan, nagsinggit sia rason nga gintabonan sang mga suspek ang iya ilong kag baba kag ginkuga tubtob napatay.
“Nakita naton ang biktima buta ka pasa ang liog kag baba tapos nagatakilid. Buot silingon gintungtong nila ang buli sang bata sa edge sang lababo. Ginakaptan ang ilong, para indi kasiyagit. Pero natam-an guro amo to nga napatay. Laban-laban ang samad sa liog amo ang cause of death,” dugang ni Brillo.
Sa pihak nga bahin, nadakpan ang duha ka mga suspek sa bulig man sang abyan ni Posadas nga si John Rey Paciente nga nagkumpirmar sang identity sang duha base man sa paglaragway sang mga testigo.
“May witness kita, naghambal sia nga, ‘Sir, nakita namon nga ginaguyod ang bata, pakadto sa merkado, nakilala namon ang suspek sa itsura lang, indi namon makilala sa ngalan. Ini nga suspek, sir, barkada ini sila ni John Rey Paciente.’ Ang ginhimu namon ginpatawag si John Rey tapos ginpamangkot namon sia sang pangalan sang iya duha ka barkada base sa ginhatag nga description sang mga aton witness,” eksplikar ni Brillo kon paano nakilala ang duha ka mga suspek.
Samtang ginasulat naman ining balita, padayun pa ang pag-imbestigar sang Sara MPS sa mga suspek.
Ginahulat man nila ang resulta sang eksaminasyon sa bangkay sang bata para mabal-an kon ginhimuslan ini. Kon makumpirmar nga ginhimuslan, kaso nga rape with homicide ang ipasaka sa duha ka mga suspek pero kon mag-negatibo, kaso nga homicide in relation to RA 7610 ang atubangon sang mga ini./PB
[/av_textblock]
[/av_one_full]
