[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON
ROBERTO ‘BERT’
HABYOG SANG KAWAYAN’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”][/av_heading]
[av_textblock size=” font_color=” color=”]
Nagtakop ang hublag-protesta nga malinong kag wala sang may ginreport nga ano man nga insidente nga nagluntad.
Nangin matalunsay ang pagpahayag sang mga makawala na grupo sang ila hibubun-ot batok sa gobyerno kag ang pagtalupangod nila sa mga kasaypanan kag dapat pa nga obrahon sang administrasyon.
Gikan sa magkatuhay nga lugar, sila ang nagtipon padulong sa isa ka destinasyon, nagpautwas sang ila panindugan, nagpahayag sang mga isyu kag nagtalupangod sa kakulangan sang gobyerno.
Apang antes pa man ang paghiwat sang State of the Nation Address ni Presidente Rodrigo Duterte, siya ang nagpahayag na nga iya pagatugutan ang mga magahiwat sang protesta, sila ang hatagan sang ligwa, sila ang indi pagsumalangon sang pwersa sang kapulisan.
Ginmanduan man ang kapulisan nga indi magdala sang pusil, indi magdala sang batuta kag ipabilin ang ;maximum tolerance’ sa pag-atubang sa mga nagahiwat sang protesta.
Kangay sang kawayan nga nagapaayon sa huyop sang hangin, ang mga pulis ang nagpaanod-anod sa pwersa sang nagaprotesta agud nga wala sang may mabaak, wala sang may mabalim kag wala sang may mahalitan.
Matuod gid man nga kon sumalangon sang pwersa ang isa ka pwersa, mahimo nga magatuga sang indi malauman nga senaryo ukon sitwasyon, mas magasingki ang nagasumalang, kag mas magasingki ang nagapugong.
Mapalad ang mga makawala nga grupo bangud mas may masangkad nga panan-awan ang presidente sa paghangop sa kon ano ang ila hilikuton. Nahangpang sang presidente ang kaimportante sang pagmartsa sa dalan kag pagsinggitan sang kawsa kag adbokasiya.
Ginakilala sang presidente ang paghiwat sang protesta bilang kabahin kag kahulagan sang demokrasya, kag bangud sadto nangin kabahin man siya sa sini nga mga grupo nga nagamartsa sa dalan.
Natun-an na sang administrasyon kon paano sila atubangon kag akomodaron sa ila pag-ilig sa dalan nga wala sang may mahalitan.
Natun-an na sang administrasyon nga bisan ano pa ka bukal sang mainit nga tubig, maabot ang tinion nga ini ang magabugnaw kag posible pa nga maghubas sa kadugay sang pagga-ang sa kalayo.
Kon wala sa aton luyo ang isa ka tawo, masingki ang aton ginabuy-an nga punto, magaras ang mga pulong nga nagakawas sa aton mga bibig, apang kon yara ang iya presensya may gamay kita nga pagkatagam, may yara kita sang reserbasyon kag nagapahanumdom kita sang masunod nga sitwasyon. Mas kalmante kag reserbado ang pagpahayag sang punto, ilabi na kon ang natungdan nagauyat sang mataas nga pwesto.
Kaangay sa natabu pagkatapos sang SONA, ginpadulungan sang presidente ang lugar sang mga nagaprotesta kag didto mismo sa ila entablado siya ang nagpahayag sang iya punto kag ginpalab-ot ang paathag kag kariyo sa mga nagatambong sa rally.
Makita naton ang tuhay nga istratehiya nga ginhimo ni Presidente Rodrigo Duterte. Mas nagdamo ang nagdayaw sa iya kaisog sa pag-atubang sa mga nagaprotesta. Madamo ang nagkambyo sang ila opinyon kag panan-awan sa kon ano nga sahi siya sang presidente.
Sa tunga sang makusog nga hampak sang hangin kag daludo sang tubig-baha, nagapabilin siya sa iya nahamtangan, nagapaanod, kaangay sa habyog sang kawayan./PB
[/av_textblock]
[/av_one_full]
