[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
NI ROBERTO ‘BERT’ LADERA
[/av_heading]
[av_textblock size=” font_color=” color=”]
GINBALIK SA SABAK
Nahilayo sang makadali kag nadula sa poder sang nagadumala sa iya. Kaangay sang isa ka bata nga nagbiya sa luyo sang iya nga iloy kag nagpadulong sa tabok. Ginalantaw ang iya kahimtangan, ginakabalak-an kon ano ang iya madangatan, ginapaligban kon paano siya makatigayon sang iya nga pagpanglakaton.
Kaangay sang ginalauman, gindula ni Presidente Rodrigo Duterte ang Negros Island Region nga gintuga sadto ni anay Presidente Benigno Aquino III.
Nahibaluan nga sadtong Mayo 29, 2015 ginpirmahan ni Presidente Aquino ang Executive Order No. 183 nga nagatingob sa Negros Occidental kag Negros Oriental nga mangin isa ka rehiyon.
Apang sang Agusto 7, 2017, ginpirmahan ni Presidente Duterte ang Executive Order No. 38 nga nagasiling nga ang mga probinsya sang Negros Occidental ang magabalik sa Region 6 kag ang Negros Oriental ang magabalik sa Region 7.
Madamo sang nagkanugon sa natabu. May nagasiling nga gindingutan sang higayon ang Negros Island Region nga makatindog bilang separado nga rehiyon kag makahimu sang tikang nga lubos nga makapatin-ad sa ila.
Kalabanan sang mga nagasiling nga nanugonan sila amo yadtong nga pulitiko nga nagduso nga matuga ang Negros Island Region, yadtong mga ginpasalig sang nagligad nga administrasyon nga buligan sila nga maseparar kag magtindog nga mabakud.
Madamo man sang nalipay nga magabalik na sa sabak sang Western Visayas ang Negros Occidental.
Matuod gid man nga ginduso sadto sang nagligad nga administrasyon nga mapasad ang Negros Island Region ilabi pa nga gingamit nila ini sa kampanya, ginpasalig ang mga pumuluyo nga ihatag sa ila ang ila ginahandum nga mangin hilway, independiente kag may kaugalingon nga direksyon nga paga-usuyon.
Apang ang tanan ginpasalig sa ngalan sang eleksyon. Kon tampad sila sadto, kuntani ginhimakasan nila nga makabalay sang kasugoan agud nga mas mapabakud ang pagtukod sang Negros Island Region. Ginsandig lamang nila sa Executive Order. Nag-angkab nga wala nakadulot ang bingaw nga bangkil.
Ginrason nga wala sang bastante nga badyet nga sarang magamit para sa Negros Island Region rason nga ini ang gindula.
Bisan ang nagpasad sini sadto ang wala sang maathag nga balasehan kag salandigan agud maglawig kag mahatagan sang katumanan ang ini nga handum.
Pakulahaw ang ila pagpasad, ginpatindog sa balas, napuklid sang hinali sa huyop sang makusog nga hangin.
Pagkatapos nga natuga ang Negros Island Region, nangin maayo ang resulta sang eleksyon. Nagdominar sila nga tagduso, halos nahugakom nila ang tanan nga mga boto kag nagpanguna sila batok sa ila kasumpong sa sina nga lugar.
Makaluluoy ang mga nagsaot sa palad, naghabyog sang ila hawak, nagkiay-kiay kag nag-udyakan nga wala sang sonata nga may mabatian.
Pagkatapos sang eleksyon, sila ang nagtipon sang madamo nga tagsakdag sang bag-o nga administrasyon, naglumpat sa partido sang administrasyon kag nagbiya sa partido nga ila gintib-ong.
Gin-imbitar si Presidente Duterte kag nagsumpa sa iya nga partido ang madamo nga mga tawo, ginpakita ang ila pagsuporta, nagkambyo ang ila duag, nag-ilis sila sang ila nga panit, sa paglaum nga ang ila handum matigayon.
Nagahulat ang iloy sa iya anak nga ginbalik sa sabak./PB
[/av_textblock]
[/av_one_full]
