[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
ROBERTO B. LADERA
[/av_heading]
[av_textblock size=” font_color=” color=”]
KAILO SA KADULOM
Sa tagsa ka kadalag-an, madamo ang nagatumpok sa iya luyo, naga-upod sa kasadya, kag nagapakig-ambit sa iya naaguman.
Madamo sang nagapamangkot kon sa diin na ang mga tawo nga sadto halos wala nagabulag sa luyo ni Mayor Jed Patrick Mabilog. Ginapangita ang ila presensya sa sini nga tion agud nga mahibaluan kon ano kadalom ang ila kabalaka sa iya kahimtangan.
Sa sini nga kahimtangan kon sa diin nagapangatubang sang krisis sa iya karera sa pulitika si Mayor Mabilog, wala sang may mabatian nga nagadampig sa iya, wala sang may nagatingog nga nagahatag sa iya sang paumpaw nga tinaga.
Matuod nga sa tion sang kadulom bisan ang imo kaugalingon nga landong ang magabiya sa imo.
Kontani mareyalisar na ni Mayor Mabilog nga indi tanan nga yara sa iya tupad mga tawo nga tamad, nga nagakabalaka sa iya kag handa nga magbulig sa iya sa tion sang piga-piga.
Mangin maathag ini nga leksyon kay Mayor Mabilog nga indi tanan nga nagadayaw sa iya atubang dapat niya nga yuhoman bangod nga ang iban magapagisi sa iya nga dughan.
Kon aton handurawon, sadtong hayahay pa ang panahon, masami nga makita ang mga tawo nga nagadukot sa iya kilid, nagaambit sang tanan nga higayon, kag iya ginatib-ong kaupod sa kadalag-an.
Madamo sa ila ang nagabenepisyo sa kadalag-an ni Mayor Mabilog, madamo sa ila ang nagakaon sa isa ka lamesa, kaupod sila nga nagatambong sa okasyon.
Matuod nga madamo ang luyag nga magpanilong sa gahum ni Mayor Mabilog. Madamo ang luyag magtilaw sa kanamit sang iya naaguman, mga pagkilala kag pasidungog gikan sa mga ahensya sang gobyerno, gikan sa luwas sang pungsod, gikan sa mga asosasyon ukon organisasyon.
Masakit nga kon wala na sang unod, nagapalayo na ang ulod, wala na sang ut-uton, wala na sang kaunon. Bisan ang maanyag nga bulak kon indi mahamot, wala sang magapalapit nga alibangbang ukon buyog.
Diin na ang nagatib-ong sa iya kamot kag handa nga mag-unong sa iya? Diin na ang mga kapartido nga masami nagapila sa iya kilid kag likod? Diin na ang mga tawo nga nagpasalig nga sia ang buligan bangod sila ang iya man ginbuligan?
Makatilingil ang kalinong gikan sa iya mga kaalyado, mga abyan, mga nabuligan kag mga nagpasalig nga magdampig sa iya.
Nagapangibabaw ang kahadlok? Nalipay sa nadangatan? Ukon, nadula ang pag-ulikid kag kabakaka sa iya?
Nahublasan sila sang ila mascara, maathag nga nakita ni Mayor Mabilog kon sin-o ang mga tawo nga madugay na niya nga nakaupod, kon paano sila madula bangod sa katagam, nagalikaw sila nga mabutang sa alang-alang.
Bugtaw na, Mayor Mabilog, sa kamatuoran nga ang mga tawo nga nagsinggitan nga magbulig sa imo ang wala nagabalikid sa imo sa sini nga hugada.
Kabay nga malampuwasan ni Mayor Mabilog ang ini nga pagpanghangkat sa iya nga kabuhi, mga pagtilaw sa iya bilang isa ka tag-alagad sang banwa, kag agud nga makita niya kon ano ka lubog ang lawod sang pulitika.
Makaluluoy si Mayor Mabilog, sia ang nagabatyag sang kailo sa kadulom./PB
[/av_textblock]
[/av_one_full]
