[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ‘ tag=’h3′ style=’blockquote modern-quote’ size=’30’ subheading_active=’subheading_below’ subheading_size=’15’ padding=’10’ color=” custom_font=”]
NI ROBERTO ‘BERT’ LADERA
[/av_heading]
[av_textblock size=” font_color=” color=”]
KANDILA KAG BULAK
Nag-abot naman ang adlaw nga ang aton mga pinalangga sa kabuhi nga nagtaliwan na ang aton naman hatagan sang pinasahi nga pagdumdom.
Makabig nga isa ka sahi sang family reunion ang nagakatabu bangod nga nagakitaay ang halos bug-os nga pamilya, liwat nga nagabalik ang sadto nga mga handurawon, nagahun-anon, kag nagadumdom sa mga nagliligad.
Higayon man ini agud nga mapakilala ang mga ulihing tubo sa mga henerasyon nga nagahinunod na sa sini nga kalibutan.
Manami ang katuyoan kag madangatan sang sini nga pagdumdom nga naandan na naton sa pila ka henerasyon. Apang, sa karon ini ang ginahangkat sang mga pagbag-o, nagakul-aw sa paglipas sang panahon kag ang kinaandan halos daw indi na makilal-an, nagakadula sa aton kaisipan kag panan-awan.
Naanad kita sadto nga makita ang mga pagkaon nga himu gikan sa pilit nga bugas. May suman, valenciana, baye-baye, inday-inday, muwasi, kalamay-hati, kag iban pa. Mga naandan ini santu sa una nga tradisyon bilang pagsidungog sa dagaya nga ani nga sang ulihi nasimbugan sang pagsaulog angut sa pagpati tuhoy kay Shaman ang diyos sang mga patay.
Naglipas ang panahon, may mga ginligwat sa una nga katuyoan kag pagsulog, naandan kag ginsunod, kag sa ulihi namat-an na sang mga ulihi nga henerasyon.
Naghiwat na sang mga costume party, halloween party kag kon ano pa nga kasadyahan nga ginabug-osan sang mga karakter nga yara sa bahin sang kadulom kag mga pagpasimbolo angot sa mga pagpati nga nasugoran gikan sa Europa.
Apisar sang padayun nga mga pagbag-o sa pila ka aktibidades, nagapabilin ang aton mayor nga katuyoan kag ini amo ang pagbisita sa patyo kag pagsindi sa mga pantyon sang aton mga pinalangga sa kabuhi nga una nga nagtaliwan.
Nagahalad kita sang bulak kag pangamuyo, nagadumdom kita sa ila kabuhi, nagapagamuyo kita nga makita nila ang kasanag kag makaupod sila sang aton Makaaku sa iya nga kaharian.
Sa karon nga panahon, nagatuhay na ang pagkaon nga aton ginapreparar. May yara na sang spaghetti, salad, kag kon ano pa nga sahi sang pagkaon nga lisa sa naandan nga mga ginaluto.
Sadto daw piyesta sa patyo apang sa karon ginadumilian na ang sugal, ang makahulubog nga ilimnon kag ang magahod nga mga tukar agud nga mapabilin ang kalinong kag katawhay kag bilang pagrespeto sa mga nagapangamuyo sa mga kalag sang ila mga himata.
Kon sadto halos tubtob sa pagdalom sang gab-i nagapabilin sa patyo ang mga bisita, sa karon sila ang nagasindi na lang kag magpangadi, ginahulat nga maupos ang kandila kag magbiya sa sementaryo kag magsaylo naman sa iban nga patyo kon sa diin may iban pa sila nga himata kag pagkatapos sini nagapauli na sa ila tagsa ka puluy-an.
Ginakabig man nga malawig nga bakasyon sang iban bangod sa pila ka adlaw nga wala sang trabaho kag nagalagaw sila sa iban pa nila nga mga himata.
Nagalipas ang panahon, nagabag-o ang iban nga bahin sang dagway sang okasyon apang ipabilin naton ang katuyoan nga sila aton gid pangadian.
Maghalad sang kandila kag bulak./PB
[/av_textblock]
[/av_one_full]
