[av_textblock size=” font_color=” color=” av-desktop-hide=” av-medium-hide=” av-small-hide=” av-mini-hide=” av-medium-font-size=” av-small-font-size=” av-mini-font-size=”]
[/av_textblock]
[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’CANDIDO Ika-13 kag katapusan nga gua’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=” av-medium-font-size-title=” av-small-font-size-title=” av-mini-font-size-title=” av-medium-font-size=” av-small-font-size=” av-mini-font-size=” admin_preview_bg=”][/av_heading]
[av_textblock size=” font_color=” color=” av-medium-font-size=” av-small-font-size=” av-mini-font-size=” admin_preview_bg=”]
Nagpamalo na ang manok. Mabatyagan ko nga sa gua sining madulum nga bodega nga amon bilangguan, nagapamanagbanag na. Apang magataliwan ako nga indi makakita sang pamanagbanag. Ako tawo, gikan sa abo; kag sa abo, ako magabalik. Ako si Candido Iban, nabun-ag sa pamanagbanag; magataliwan sa pamanagbanag.
Nabatian ko na ang mga tikang sang mga guardia civil nga nagapadulong sa amon nahamtangan. Ginapanan-aw ko na ang ila pagahimuon…
Wala gid ako nagsala. Ginpaarakan nila kami sang luthang. Nagsilinamu ang mga linupok kag ang mga tiyabaw kag singgit sang akon mga kaupod. Kag subong, agud mapat-ud nga patay na sila, isa-isa nga ginatuslok sang bayoneta sang mga guardia civil ang kilid sang akon mga abyan kag kauturan. Wala na sang may naggahud, wala na sang naghulag. Patay na matuod sila. Ako na lang ang nabilin. Indi ako madutlan sang bala.
Tatlo ka guardia ang ari subong sa akon atubang. Ginatuslok nila sang bayoneta ang akon mga kilid kag tiyan, apang indi nila ako mapilasan. Gilayon nga nagapali ang inagihan sang bayoneta. Mabatyagan ko nga ginahadlukan sila sa akon. Nag-isol ang isa, gintayaan ako, ginluthang. Apang nahulog lang ang bala sa akon tiilan. Indi ako madutlan!
“Guardia, kilalaha ninyo kon sin-o ako. Ako si Candido Iban, pinuno nga Katipunero gikan sa Malinao, Aklan. Kon luyag ninyo nga matapos na ini tanan, diri sa akon liug… Pilasi ang akon liug tubtub mahulog ang puti nga bato. Ina ang anting-anting nga nagagahum agud indi ako madutlan sang bala kag bisan ano nga hinganiban. Ginatuad ko ini sa inyo agud kamo mismo ang magpanaksi, agud inyo mapalapta ang mga sugilanon…
“Matuod ang anting-anting!”
***
Sa akon pinalangga kag suki nga mga bumalasa, kabay nga nahatagan ko naman kamo sang kalingawan paagi sa akon sugilanon.
Daku gid ang akon kakunyag nga ipaambit sa inyo ang akon mga sugilanon sa Hiligaynon bangud ako nagapati nga ang matuud nga Campeon sang Pulong Hiligaynon indi lamang nagadicta kon ano ang ginakinahanglan sang pulong, ang spelling o pagbatubatu sini, ang grammar o ang paghiliangut sini.
Para sa akon, ang matuud nga Campeon sang Hiligaynon nagapakita kon ano ang maayo nga mga sugilanon sa aton pulong.
Bilang manunulat, luyag ko lamang nga ipaambit ang mga sugilanon nga nagalaragway sang pagpakigbatu sang tawo, kag ang iya pagtukib sang kaugalingon, sa sining aton, kag sa iban pa nga mga panahon.
Kon kamo napahalipay sang akon mga sugilanon, ipaambit ini sa inyo mga kakilala, kag itudlu sila sa akon website: www.petersolisnery.com kon diin ila pa gid mabasahan ang iban ko pa nga sinulatan, kag ining akon pagbantala sang aton pulong Hiligaynon.
Sa liwat, madamu gid nga salamat!
[/av_textblock]
[/av_one_full]
