UPOD kita sa obserbasyon sang isa ka lokal nga brodkaster nga indi dapat mangin problema sang mga konsehal sang siyudad sang Iloilo ang matagaan sing pick-up ang kada isa sa ila.
“Maga-doble pa gani ang ila pagpaninguha sa pagserbisyo sa mga pumuluyo kon may pick-up,” maabtik niya nga tugda.
UNA nga rason kon ngaa indi mangin problema ining pick-up, ina kay ginhatag ini ni Mayor Treñas nga wala sing pinilian. Ginhatag niya ini sa tanan nga mga konsehal agud mas maayo pa gid ang ila pagserbisyo sa mga pumuluyo.
In other words, wala ini sing pamulitika kay bisan ang mga konsehal sa kontra partido, katulad ni Ed Peñaredondo, Dr. Candice Tupas, kag Mandrie Malabor, maka-benepisyo man tungod mapalawak man nila ang ila pagserbisyo sa mga pumuluyo gamit ang dugang nga salakyan.
Ugaling lang kay nagpamalibad ining tatlo sa pagbaton sini. Okey lang kuno sa ila nga gamiton lang ang ila kaugalingon nga mga salakyan.
IKADUHA, “good” kon makaserbisyo gid man gihapon sila sing maayo, sunu sa ila, gamit ang ila personal nga salakyan. Pero, obviously, mas maayo pa gid ang mahimo nila sa dugang nga pick-up, sunu gani sa nasambit ta nga brodkaster.
IKATATLO, okey man ina ang concern nga indi magbaton sining pick-up sa punto nga magamit pa ang kwarta sa ginbakal sang pick-up sa kinahanglanon sang siyudad sa aton karon problema sa COVID-19.
Ang pamangkot ugaling: Mapabay-an bala ang kinahanglanon sang mga pumuluyo sa ining aton karon problema sa COVID-19 kon matagaan sila sing dugang nga inisyatibo gamit ang pick-up?
Well, depende ina sa paghaum-haum na sang mga pumuluyo.
Sunu kay meyor, madamo naman nga mga bagay ang nahimo sang gobyerno sang siyudad para sa aton problema angot sa COVID-19, nga may bulig man sang gobyerno nasyonal.
May nakahanda naman nga kwarta ang siyudad – in fact, naka-order na ini – agud ibakal sang bakuna (vaccine) para sa mga 600,000 ka vials nga makasabat sa kinahanglanon para sa herd immunity.
Maibanan na gani ang galasutuhon diri tungod sa mga donasyon nga bakuna, nga nagalakip sang halin sa COVAX paagi sa World Health Organization (WHO).
Ang COVAX isa ka paghugpong sang mga 64 ka manggaran nga mga nasyon agud maka-deliver sing libre sang “safe and effective” nga vaccine sa mga 92 ka kubos nga mga pungsod, lakip na diri ang Filipinas, para sa “fair distribution” sang mga vaccine sa tanan nga pungsod.
Una sa sining COVAX-donated vaccine amo ang iya sang AstraZeneca. Gina-administer na ang mga ini, upod sa Sinovac nga gin-donar sang Tsina, sa karon sa aton mga health workers kag mga frotnliners, kon diin malapit na sa isa ka milyon ang nabakunahan.
Malawak naman ang kampanya sa pagpabakuna sang gobyerno sang siyudad tubtub sa tanan nga kabarangayan. Madasig ang pagpang-rehistro sang mabakunahan nga mga pumuluyo, nga ginahimo na gani sang iban nga barangay sa kada pamalay.
May nahatag naman si meyor nga dugang nga mga salakyan sa aton kapulisan agud makahulag man sila sing maayo sa pagbantay sa mga nagalabag sang ginapatuman nga minimum health protocols, katulad sang paggamit sa publiko sang face mask kag face shield kag ang pagpatuman sang social distancing.
Ang mga pribado nga establicimiento may request man upod sa kay meyor agud mahatagan sang ila share nga vaccine halin sa gobyerno nasyonal paagi sa public-private partnership.
Sige man ang pagpanghatag sang bulig (subsidy) sa mga naapektuhan nga mga pumuluyo sang siyudad kag sang gobyerno nasyonal.
Kon may kulang pa dira, isa na seguro ang sa bahin na lang sang Konseho paagi sa mga ordinansa kag mga resolusyon nga makapasanyog pa ang pagbulig sa mga pumuluyo.
Pero, may nahimo na bala sini ang mga konsehal nga indi lang sang sagad reklamo kay meyor, nga mapasalamatan man sang mga pumuluyo?
In fact, ang mga konsehal, paagi sa ila inisyatibo, pwede man gani maghulag sunu sa ila personal nga ikasarang agud makabulig.
Kag diri makabulig dugang ang pick-up nga ginahatag ni meyor kon luyag nila gamiton. Kwarta ini sang mga pumuluyo ang ginbakal sa sining pick-up kag kon may pasalamatan kamo, indi na bale seguro si meyor kundi ang mga pumuluyo na lang kay ila ini kwarta./PN
