INDI naton ma-intiendihan kon ngaa ginpataas sang Malacañang ang quarantine level sang siyudad kag sang probinsya sang Iloilo halin sa MECQ pa-ECQ tubtub Hulyo 31.
Ang ECQ, ukon Enhanced Community Quarantine, amo ang pinakamataas nga level sang CQ. Sunod dira ang Modified ECQ.
Ginadumilian sa ECQ ang mga pumuluyo sa paggwa sa ila mga puluy-an, luas sa pagpatigayon sang mga essential nga kinahanglanon kag isa lang sa pamilya ang matugutan. Limitado man ini sa may edad 18-65 anyos lang. Skeletal lang man ang mga empleyado. Dapat mag-face mask, mag-social distancing, kag hygienic practice ang pagginawi sa puluy-an kag sa publiko.
Ngaa bala amo gid ina ang classification naton? Panghingabot, ukon pang-“bully”, na ina ya!
Amo-amo man gihapon ang lakat sang panglaton sang COVID-19 kag gataas gani ang recovery sang mga pasyente. Manubo man kaayo ang kaso nga “severe”, wala pa sa 3%, kag galab-ut ang “mild” nga kaso sa indi magnubo sa 90%. Manubo man kaayo ang death rate nga pwede ikibit abaga kag risguhan sang maisug nga mga Ilonggo nga nakig-away sa mga sumalakop bisan binangon lang ang ginauyatan.
Sa siyudad kag probinsya sang Iloilo wala man gapalya ang quality healthcare program diri. Bastante ang kadamuon sang mga hospital beds kag wala man ginakulang ang mga doktor kag mga nars nga handa sa ano man nga matabo.
Gani, dapat tani amo man gihapon ang quarantine level nila sa MECQ lang, agud ligwa gawa gihapon ang panghulag sang tawo kag pagpangita nila sing kabuhian.
Kon sa akon lang, pwede na gani seguro ang Iloilo sa GCQ nga less strict sangsa MECQ, tutal sige man ang pangbakuna sang mga pumuluyo nga galab-ut na sobra 100,000 sang populasyon sang siyudad nga mga 500,000. Madasig man nga nagaalabot ang mga bakuna.
Mas less strict naman ang Modified GCQ (MGCQ) sangsa GCQ kon diin na-assign ang Aklan, Capiz, Negros Occidental kag Guimaras.
***
Nakasiling gani si Antique Governor Rhodora Cadiao nga daw gina-“bully” ang siyudad kag probinsya sang Iloilo sang Malacañang. Labi na gid kay ang gin-assign lang sa Antique amo ang GCQ samtang diri sa Antique gani na-detect ang mapintas nga Delta variant.
Tungod bala kay reklamador si Mayor Treñas sa iya pagkabalaka sa iya mga pumuluyo?
Normal sa Demokrasya ang magreklamo kon may ireklamo ka kay ang mga pumuluyo ang matuod-tuod nga gobyerno kag indi kon sin-o ang naga-mayor-mayor dira nga opisyales. Sa diktadurya lang nga pangginahom nagakatabo nga kipot baba ang mga pumuluyo tungod sa kahadlok.
Indi bala Senyor Roque? Kag indi ka malipat nga daw may gana ka man magdalagan sa pagka-senador.
***
Sa ECQ total lockdown na ina ya, nga halos indi tanan makahulag kag makapangabuhi! Aba, magutman ina kami diri sa siyudad kag probinsya sang Iloilo!
Daw indi man bala makasarang na ang gobyerno sa pagpakaon sa mga tawo? Ti, ngaa indi pagtugtan ang sige pagpangabuhi sang tawo sa idalom sang MECQ? Tutal, sa luyag naton ukon indi, unay sa lawas ang risgo. Ang importante mapakaon naton ang aton pamilya samtang naga-amlig man kita.
Ti, mapakaon mo kami nga mga Ilonggo sa sining ginpahayag mo nga ECQ namon nga classification? Mga 150,000 ka food packs kag cash assistance ang kinahanglan namon diri sa kada semana. Kaya nyo?
Andam ka lang nga nagapilit gid ipatulon sa amon ang ECQ kon magutman kami nga mga Ilonggo tungod sining waslik poder ninyo nga pang-“bully” sa amon. Malapit na baya ang eleksyon.
Wae ina ya sang mga manggaranon kay gasulobra pa ang ila sinuptan ukon “savings”. Pero indi man naton ina sila mabasol tungod ginpangabudlayan man nila ina.
Indi bala high school klasmit Gop Lokomal? Balo na karon si Gop kag nakapangasawa liwat sang kapareho nga Hindu nga nagapahayon-hayon na lang sa ila “savings” sa sining panahon sang COVID-19 sa isa ka subdivision sa Makati.
***
Kon ang ginapaligban sang gobyerno nasyonal amo ang Delta variant, nga madasig kuno manglaton, gakadlaw lang gani ang mga taga-radyo sini.
Matuod may kaso sang Delta variant sa West Visayas. Ang duha sini ugaling na-detect lang sa Pandan, Antique. Mga 250 ka kilometro ini sa Iloilo kag mas malapit pa sa Aklan, siling gani nila. Pero GCQ ang Aklan kag ang Antique!
Bato lang Mayor Treñas kag Gov. Defensor para sa mga pumuluyo, a!/PN
