BY THE WAY, wala ta seguro ma-emphasize gid ang isa ka health measure nga dapat ipanugyan agud maaway sing maayo ang Covid-19 kag mga variant sini.
Amo ina ang pagpaligo sa pag-abot sa balay agud malimpyuhan ang kaugalingon sang nagatalabid nga mga Covid virus. Nga daan sa pag-abot sa balay dayon ta sug-alaw kag maghakos sa aton magagmay nga mga kabataan, labi na gid sa karon nga nagadala na sing “severe” nga igu ang delta variant bisan sa mga kabataan.
Palihog indi kita malipat sini.
***
Panindugan ni anay Presidente NoyNoy batok sa korapsyon: “Kung walang corrupt, walang mahirap!” Kag ginapa-imbestigar gid niya ang mga kaso sang korapsyon.
Natandaan ta pa ang pag-expose sang “undeclared wealth” ni anay Supreme Court chief justice Renato Corona, ang “misuse” sang pork barrel funds kag ang ma-anomaliya nga mga transaksyon ni Janet Napoles angot sa pork barrel sang mga myembro sang Kongreso. Subong man ang kwestyonable nga “delay” sa pagtagaay bulig sa mga biktima sang Super Typhoon Yolanda.
Ang reaksyon naman ni Presidente Duterte sa mga kaso sang korapsyon amo ini – ang pagpahalin lang sa mga nasuspetsahan sa Bureau of Immigration, Dept. of Agricuclture kag iban pa nga mga opisyales nga wala man lang ginpasakaan sing kaso.
In fact, sa lugar nga ipa-imbestigar ni Presidente ang pag-expose sang COA sang “misused” kag “unused” nga mga pondo dira sa Dept. of Health kag PhilHealth sa idalom ni Dr. Duque ginsingganan lang niya ini nga “mag-resign lang kon luyag na niya”.
Aba binilyon na nga kwarta sang pumuluyo ang indi maathagan kon diin nagkadto, nga gin-kwestyon man sang Senado, singganon lang mag-resign kon luyag sini?
Sa kadamo sang ebidensya sa palpak nga mga transaksyon nga nakita sang COA kag Senado, dapat tani, Mr. President, nga pasakaan gid sing kaso sa Ombudsman ining si Doc Duque. Ano siya si Mr. Macho nga pwede panginmatyan sang mga badong-badiday?
In fact, dapat manguna si Presidente Duterte “by example” sa away kontra korapsyon, paagi sa pagpahayag sang iya Statement of Liabilities, Assets and Networth (SALN), nga tubtub karon indi niya luyag ipahayag.
Masadya (nga indi masadya!) pa kay gusto pa kuhaan ni Presidente ang COA sing trabaho.
Siya na lang kuno ang magpa-audit sa mga anomaliya sang iya mga tinawo sa gobyerno. Ipa-audit man niya kuno ang COA! Kag ina kon magdaug na siya sa pagka-VP sa 2022 nga eleksyon!
Daw seguro niya magdaug ba. Kulang pa siya sa katulad ni Senador Sotto, Manila Mayor Isko, kag Senador Pacquiao nga ginatulod man sang iban nga magdalagan sa pagka-VP, tungod wala sing ma-isyu kontra sa ila.
Siya iya putos sang mga human rights cases kag “incompetence” sa iya pagdala sang mga kaso sa korapsyon kag mismo sa pagpadalagan sang gobyerno batok sa Covid.
Kontra man siya sang mga kababaehan tungod sa iya wala pagtaha sa ila. Imagine ginakadlawan lang niya ang pag-rape sa isa ka madre nga gina-respeto naton! Wala man maluyagan sang madamo ang iya pagtawag sing “stupid” sa Diyos.
Kag ngaa siya gid ang magpa-audit sang COA? Indi niya trabaho ina. Kag indi na kinahanglan ang isa pa ka ahensya agud bantayan ang COA.
Ang COA isa ka independent constitutional body nga gintukod agud bantayan ang paggamit sang kwarta sang mga pumuluyo. Kag may kaugalingon ini nga division agud bantayan ang ano man nga anomaliya dira mismo sa COA. Isa ka division nga daw Military Police nga ang trabaho amo ang pagbantay sa kalokohan sang pareho nila nga mga soldado.
Indi man gani trabaho sang Kongreso kag sang Husgado (judiciary) ang mang-audit sang mga transaksyon sang mga ahensya sang gobyerno sa idalom sang Principle of Separation of Powers.
Ang labot lang sang Senado amo ang pag-imbestigar paagi sa Blue Ribbon Committee kag mag-rekomendar sa Executive (Presidente) agud aksyunan ining mga akusasyon, luas sa kon ano nga kasuguan ang ila mapasar angot diri. Ang Husgado naman amo lang ang magpamatbat kon nakasala ang mga akusado kag tagaan sing sentensya nga dapat ipatuman sang Executive.
Samtang ang fourth estate (media) yara man agud magpahibalo sa mga pumuluyo sining ila nadiskubrihan nga mga anomaliya agud maaktuhan na sang aton mga prosecuting kag enforcement authorities kag sang Husgado. Okey?!/PN
