LUYAG naton talupangdon diri sing una ang ginpahayag ni Senador Kiko Pangilinan angot sa “partial victory” sang 37 ka petitioner batok sa Anti-Terrorism Law nga ginhulugan na sing pamat-ud (ruling) sang Korte Suprema sang sining ulihi lang.
Gin-sponsor ining kasuguan sa Senado ni Senador Ping Lacson nga ginpirmahan dayon ni Presidente Duterte sang pag-abot sini sa iya.
Angot ining pahayag ni Senador Pangilinan sa kinamatarong sang aton Hilway nga Pumuluyo sa aton Demokrasya, labi na gid ang kinamatarong sa Hilway nga Pagpahayag (Freedom of Expression), “due process”, kag ang universal human rights, sa kabug-usan, sa idalom sang Bill of Rights.
Ginpahangop ni Senador Pangilinan sa iya pahayag nga nagapasalamat siya sa ining “partial victory” sang Hilway nga Pumuluyo batok sa Anti-Terrorism Law. Ugaling, ipasaka gihapon nila ang ila Motions for Reconsideration sa Korte Suprema agud madula na sing lubos ang dalit sining kasuguan sa Kahilwayan kag “Rule of Law” sa pangabuhi sang mga pumuluyo.
“Luyag naton ang isa ka kasuguan nga naga-protejer sang mga pumuluyo batok sa terorismo, indi ang kasuguan nga naga-terrorize sa ila,” siling pa gani niya.
Ining “partial victory” sang mga Hilway nga mga Pumuluyo nagalakip sang paathag (qualifier) sa exception sa idalom sang Section 4. Ginapat-ud diri nga wala nalakip sa “acts of terrorism” ang mga “… advocacy, protest, dissent, stoppage of work, industrial or mass action, and other similar exercises of civil and political rights”. Gin-botohon ini sang mga SC justices sing 12-3.
Gin-deklarar man sang SC nga “unconstitutional”, voting 9-6, ang pagtugot sa Anti-Terrorism Council sa pag-adopt sang mga pangabay sang iban nga “jurisdictions or supranational jurisdictions” sa pag-designar kon sin-o ang mga “terrorists”.
Ang luyag pa itulod sang 37 ka petitioners sa ila Motions for Reconsideration amo ang ila pagpamatok sa mga pila pa ka provision sang Anti-Terrorism Law nga naga-apektar sa “due process” kag iban pa nga kinamatarong sang akusado, nga nagalakip sa “arrest, detention, designation by Anti-Terror Council, freezing of funds, (etc)”.
***
Sa liwan nga hitabo, ang Rappler nagbalita nga may nakuha sila nga screen shot sa isa ka Facebook post nga naga-requirer sa mga student scholar sang Passi City Government sa pagsuksok sang pula nga T-shirt kag magpasakop sa political caravan sang BBM-Sara tandem sa Iloilo.
Ining political caravan sang BBM-Sara tandem ginhiwat sadtong Disyembre 11 halin sa Taft North, Iloilo City tubtub sa Passi City. Wala diri makaupod si Marcos Jr. kag Davao City Mayor Sara Duterte-Carpio.
Ngaa kuno, ugaling, gina-requirer gid ining mga student scholar sa pag-upod sa political caravan sang BBM-Sara tandem?
Indi man kuno kinahanglan obligahon gid ining kabataan agud sug-alawan ining duha ka kandidato kay indi man sila scholars sining mga kandidato nga kinahanglan pakitaan sing respeto kag pagpasalamat sa ila pag-abot.
In fact, wala man kita sing nahibal-an nga luyag mismo nanday Mayor Stephen Palmares kag Vice Mayor Jesry Palmares nga sug-alawan sila sining mga kabataan sa ila pag-abot.
Kon sa luyag-luyag lang basi, pero lain ina ya kon obligahon mo sila. Indi ini sila dapat entrahan sang pamulitika kay ang tuyo lang sang gobyerno sa ila amo ang pagpatuon sa ila nga may suporta sang gobyerno tungod sang ila kapinasahe nga kinaalam, nga sang ulihi mapuslan sila sang bug-os nga komunidad kag indi lang kon sin-o nga pulitiko.
Ang katulad nila daw mga civil service employees nga ginasagud sang gobyerno pero indi ginatugutan sa pagkampanya sa kon sin-o nga mga kandidato sa eleksyon kay ang ila serbisyo para sa tanan kag indi kay kon sin-o lang nga pulitiko.
Gani, indi bagay nga obligahon ini sila sa pamulitika ni Passi Mayor Stephen Palmares kag Vice Mayor Jesry Palmares sa ila pagsug-alaw sa ila kandidato nga sanday BBM kag Davao City Mayor Sara Duterte-Carpio sang Partido Lakas CMD. Si Mayor Palmares amo ang chairman sang Lakas CMD sa probinsya sang Iloilo.
Well, nakuha man naton ang bahin ni Vice Mayor Palmares angot sining reklamo nga gina-obligar ining mga student scholar sa pag-upod sa political caravan sang BBM-Sara tandem. Boluntaryo lang kuno ang hingyo sa ila nga mag-upod sa sining kahiwatan. Ginpasalig man niya nga indi maapektuhan ang scholarship sang mga kabataan bisan pa ang pila sa ila nakapautwas man sang ila reklamo. Good to know that!/PN
