INDI kumporme si Pedro, nga aton abyan, sa panawagan ni BongBong Marcos nga mag-“unite” ang mga pumuluyo agud mapadaug siya sa eleksyon sa Mayo 2022.
“Ano kami mga esklabo nga sunud-sunuran lang sa ila amo!” siling gani ni Pedro.
Kon matabo ini paagi sa ila manggad kag pamahog, daw katulad lang kuno ini sadtong pagpasunod ni Diktador Marcos sa mga pumuluyo sa iya luyag paagi lang sa pag-alsa sang kamot agud indi ka makabalibad sa kahadlok.
“I-disqualify na gid lang bala ini sang Comelec!” panugyan gani ni Pedro.
Sa nahibal-an na sang kadam-an, may disqualification (DQ) case ini si BongBong Marcos nga gin-file sa Comelec sang madamo nga grupo tungod sa indi pagbayad sini sang income tax halin sadtong 1982 tubtub 1985.
In fact,napamatud-an ini sang husgado tubtub sa Court of Appeals. Ginbaton na gani sini ang iya kasal-anan kag wala na mag-apelar pa sa Korte Suprema agud indi na madugangan ang iya sentensya.
Butang ta pa nga malutsan niya ining iya DQ case, although nagapati ang madamo nga mga abogado, lakip na ang retirado kag nangin Acting Supreme Court Justice Antonio Carpio, nga ma-disqualify gid siya sang Comelec.
Ti, sa ano gid bala nga mga bagay nga dapat mag-“unite” ang mga pumuluyo agud padag-on siya sa eleksyon?
Okey ina ang pagpanawagan sang isa ka kandidato – ukon bisan sin-o man gani – nga mag-ugyon ang mga pumuluyo kon kaayuhan man lang ang katuyuan sini.
Bag-o ugaling mag-ugyon ang kon ano man nga grupo sang mga pumuluyo sa iya panawagan, kinahanglan hibaluon ta anay kon paano niya ini matigayon sa aton Hilway kag Demokrasyahanon nga pangabuhi.
Una sa tanan, indi lang sa lider, kundi, nga mas importante, sa matarong nga kawsa nga mapasugtan sang mga pumuluyo sa ila hilway nga pamensaron. Indi kay paagi sa tatlo ka G – guns, goons and gold – nga masami gamit sang mga dynastiya nga sobra ang kwarta kag may private army, katulad sang pagkilala sang madamo sa Marcos family.
Ikaduha, dapat siya ang may pinaka-mabungahon gid nga hingyo para sa mga pumuluyo. Imposible!
Butang ta pa nga wala sing pilian ang mga botante sa ginatanyag nga mga program del gobierno.
So, sa Ikatatlo nga rason, kinahanglan tan-awon gid anay sang mga pumuluyo ang klase sang pagkatawo sang mga kandidato. Sin-o gid bala sa ila ang may mas matarong, ukon “less evil”, nga pagkatawo?
Partikular sa kay BBM, matarong bala ang pagkatawo sini kag masaligan agud itib-ong ang kaayuhan sang mga pumuluyo?
“indi!” siling ni Pedro. Kwestyonable kuno ang pagka-honesto ni BBM. In fact, “found guilty” siya sa indi pagbayad sang iya mga buhis halin sadtong 1982 tubtub 1985, samtang wala sini nga problema ang iya mga kasumpong.
Kabahin man siya, bilang eredero nga wala man lang sing reklamo sa ill-gotten wealth sang iya mga ginikanan, nga napamatud-an sang Korte Suprema, nga ang tanan wala pa mabawi sang gobyerno, nga wala man ang iya mga kasumpong sing kasubong nga isyu.
Nahadlok man si Pedro sa pamatasan nga natun-an ni BBM halin sa iya sobra ambisyoso nga amay, nga samtang matapos na ang iya pagpungko sa poder sadtong 1973 sunu sa kasuguan, gin-medyosan gid niya nga mapabilin sa poder paagi sa martial law. In fact, sunu gani kay anay Defense Secretary Juan Ponce Enrile, gin-peke lang ang pag-ambush sa iya para tagaan rason ang martial law.
Sobra na man kuno kadugay ang ila pamilya sa poder, nga halos tanan sila na ang hari sa Ilocos Norte tubtub karon. Balik naman gani sila sa pila ka pwesto nasyonal kag luyag pa mag-presidente liwat. “Pabusla man ang iban ay!” siling ni Pedro.
Nahadlok man si Pedro sa matabo kon magdaug si BBM. Na-intuan na gani kuno si Presidente Duterte agud kilalahon nga baganihan si Diktador Marcos.
Gani, gaduda si Pedro nga kon magdaug ini, madula na ang tanan nga legasiya sang gindaug naton nga Demokrasya. Madula na ang Edsa Shrine. Madula ang ngalan ni Ninoy sa NAIA. Madula man nawong nanday Ninoy kag Cory sa P500 bill kag basi ibulos pa si Diktador Marcos. Segurado nga ligwaton man sini ang kasaysayan sa tulun-an sang mga kabataan agud malimtan na ang kalainan sang martial law. “Huwag po!”/PN
