Ang parol kag ang aton pagtin-ad sa siyudad

SANG Sabado sang gab-i, gin-selebrar sang siyudad sang Iloilo ang “one of a kind” nga pag-iwag – sugod a las seis sang gab-I – sang mayor nga mga dalanon sini sang 1,600 ka dalagku nga mga traditional Christmas lanterns, ukon parol.

Ginkakunyagan ini sang mga pumuluyo nga nagguluwa gid sa ila puluy-an kag kon diin makatangla, ukon makalaaw, sa mga poste sa tunga sang dalanon agud makita ang pinasahi sini nga kasanag.

Subong man agud batyagon ang maalungayon sini nga kainit sa pagpasanag sa sulod sang lighted electric bulb, samtang daw mga sulu (torch) ini nga nagaraya sa kalabaon sang dalanon padulong sa pwede ta masiling nga altar sang isa ka diyosa sang kagayon.

Ang iban nagginutok pa gani sa paggwa sa mga malapit nga mga mall kag magsid-ing sa mga bintana sang mga condo agud makita ang mga ini sa ubay sang Ninoy Aquino Avenue kag sa malapit nga Megaworld Business District sa Mandurriao, kag sa iban pa nga bahin sang siyudad.

Sunu gani sa pila ka old naton, ang kadamuon kag ang makahulugan nga pagpasundayag sining mga dalagku nga mga parol wala pa mahimo tubtub san-o sa panahon sang Paskwa sa sini nga siyudad. Kongrats kay Mayor Jerry P. Treñas!

Sa ila pagtan-aw, pagbalikid man ini sa matahum naton nga kahapon kon san-o ang ining humble (hamak) nga parol amo ang pinakaali nga bagay sa ila pag-selebrar sang Paskwa, imol ka man ukon manggaran.

Padumdum man ini sa tanan sang bituon nga nagtunda sang pagbun-ag sang aton Ginuo Hesukristo sa hamak nga sitwasyon sa panuguan sang mga hayop pag-abot sang kagab-ihon ukon mangitngit nga panahon.

Maathag nga pagpakilala ini sang aton Ginuo sang iya pag-ugyon kag pagsimpatisar sa mga labing kubos nga anak sang Diyos sa duta sa iya manifestacion bilang Amay, Anak kag Ispiritu Santo.

Ang pagpasanag sang mga parol sang siyudad isa man ka patunda sang pasalig sang bug-os nga pagpaninguha sang gobyerno sang siyudad sa idalom n Mayor Jerry P. Treñas agud matagaan sing masanag nga palaabuton ang aton mga pumuluyo.

Syempre, indi kay sa pagpaninguha lang sang gobyerno, kundi upod man sa pag-ugyon kag paghimulat sang tanan – gobyerno, mga negosyante, mga mainunungon  nga hublag sosyal, kag sang mga pumuluyo, sa kabug-usan, sa isa ka hublag katilingban para mapatin-ad ang pangabuhi sang tanan sa isa ka siyudad nga malinong kag malipayon.

***

Pinasahi ang kadakuon kag kadamo sining mga parol nga himo sa kawayan kag putos sa plastic agud indi mahalitan sang ulan. Mga 6 ft.x 6 ft. ang kadakuon sang kada isa sini kag may pareho nga desenyo kag kumbinasyon nga duag nga makapa-igpat sang bisan ang naga-ugdaw na nga balatyagon.

Mapabilin nga nagasiga ining mga parol tubtub Enero sang sunod nga tuig, 2020, ulayhon sa pagselebrar man sang madinuagon nga Chinese New Year sa sina man nga bulan para sa kaayawan sang aton pumuluyo lakip na sang mga mga turista kag imbitado naton nga mga bisita.

***

Nagapanguna sa ining pag-selebrar sang pagpasiga sang mga parol sang Sabado amo ang aton palangga nga senador nga si Senador Franklin Drilon, si Iloilo Governor Arthur Defensor Jr. sang probinsya sang Iloilo, lokal nga mga opisyal sang siyudad sa pagpanguna ni Mayor Treñas, kag iban pa.

Gapanguna sa private sector sa sining kahiwatan ang Philippine Chamber of Commerce & Industry Iloilo sa pagpamuno ni PCCI-Iloilo president Atty. Joebert Peñafloida kag Dr. Sandra Sarabia-Gomez bilang PCCI-Iloilo chairperson.

Gin-aku ang pagdirihir kag pag-gasto sa pagpa-ubra sang mga parol sang Zonta Club of Iloilo City II upod sa mga

PDL (Persons Deprived of Liberty), ukon inmates sang Bureau of Jail  Management and Penology (BJMP)-Iloilo City District Jail male dormitory sa Ungka, Disrict of Jaro.

Ang nag-disenyo sang mga parol amo si Vidette Ong sang Zonta Club.

Ang kada parol may badyet nga P1,500, nga ang P900 makadto sa kabudlay kag materyales, nga tulungaon sang mga PDL nga nag-ulubra sini, nga makadto naman sa ila pamilya sa panahon sang sining Paskwa. ([email protected]/PN)

LEAVE A REPLY

Please enter your comment!
Please enter your name here