Ano ang trabaho sang mga executive assistants?

TUMAN ka budlay ang trabaho sang isa ka local chief executive kaangay sang alkalde sang syudad sang Iloilo nga isa ka highly-urbanized city.

Kadamo sang alatubangon kada adlaw kag mga proyekto nga dapat ipatuman. Ini nga mga katungdanan indi na maarapalan sang alkalde gani kinahanglan nya nga magkuha sang mga kabulig nga ginatawag executive assistants (EAs).

Aras a poder sang alkalde ang mag0hire sang EAs. Wala man sang limit ang kadamuon bangud ini nasanto man sa maalam nga pagbana-bana sang alkalde kun bala ini hustuhan lang ukon nagasobra na.

Maluwas nga kinahanglan gid man ang EAs para sa pagpatuman sang trabaho nga indi na matatapan sang alkalde, ini nga mga posisyon indi mahimutig nga lugar para sa political accommodation. Ngaa man nga akumodasyon politikal? Kun tan-awon mo ang mga ngalan nga sa masami ara sa EAs lunsay ini sila malapit kag mabaskog nga sumalakdag sang isa ka kandidato.

Diri sa syudad sang Iloilo madamo sang nangin EAs si Mayor Jerry Treñas nga nangin mabaskog niya nga kabulig sa nakaligad nga election. Sila mga anay kapitan sang barangay, anay EA man sang syudad kag himata. Kunsabagay indi na kita maka-question kun sin-o man ang i-appoint ni Treñas bangud prerogative niya ini bilang alkalde.

Pero nahibaluan nyo bala nga ang sweldo sang mga EAs nagapalanglapaw?

Halimbawa may apat ka E’s nga nagasweldo sang P83,406 kada bulan; may indi magnubo sa anom nga nagasweldo sang tag P65,319; may ara man nga nagaswedlo sang tag P51,155 samtang ang iban P35,942 kag ang pinakanubo P27,755.

Ini nga numero inisyal lamang bangud may iban pa nga wala makuha ang ila payroll ukon voucher sang ila sweldo. Matandaan nga sa una nga adlaw ginpakilala ang indi magnubo sa 18 ka executive assistants. Pero samtang nagadugay may mga posisyon pa nga ginadihon para sa ila.

Wala man sang problema kay madamo man sa ila ang nagatrabaho sang husto. Kaangay sang in-charge sa barangay nga makita man ang trabaho. Ang sa torismo nga todo kayod man para sa syudad sang Iloilo.

Ugaling may iban nga EAs nga duplication lang sang trabaho sang department head ang ila posisyon. Ang ila trabaho, ginaobra naman sang department heads, ngaa kinahanglan pa sila sa sina nga opisina?

Ngaa amo gid ni sila ka damo?

Kunsabagay makita man ang mga programa sang syudad para sa “level up Iloilo.” Kun sa hulobaton pam “There’ a lot of work ahead of us.”

Ang atun lang kuntani, kun sang una ginapunggan ang job hires nga ang sweldo P400 kada adlaw ukon halos makakuha sang P8,000 kada bulan, ngaa hilway kita mag-hire sang EAs nga nagapalanglapaw ang sweldo? Abi ko wala  kwarta ang syudad hambal sang city treasurer?

Sa pihak sini, may pagsalig kita nga sa liderato sang atun alkalde malambot naton ang “next level” basta kalimtan ta na ang dalit sang politika.

Move on na kita, mga bes! ([email protected]/PN)

LEAVE A REPLY

Please enter your comment!
Please enter your name here