BATA pa, politiko na.
Ini ang nagakadapat nga paglaragway kay Sangguniang Kabataan (SK) federation president Leila Luntao kun basehan ang iya mga akto sugod sang napili-an siya sa posisyon.
Kun matandaan sang tanan, ginaalegar nga si Luntao kandidato ni Cong. Jerry TreƱas sa pagka SK federation president kontra kay Marie Antonette Gallos nga ginlutos niya sang tuman lang kagamay ngaĀ argin.
Nakasaksi kita sa election kag didto pa lang mabatyagan na nga tama ka politikado nga bata si Luntao. Wala man lang gani sya nagtindog kag nagpangamusta sa iya ginlutos nga kasumpong nga si Gallos bilang tanda sang pagkamapainubuson.
Pila ka adlaw matapos sya napilian bilang SK federation president, nakita na sya nga nagbisita sa opisina ni TreƱas kaupod sang mga kandidato sa pagkakonsehal sang kongresista. Ambot kun ano ang iya purpose sa pagkadto didto.
Wala man sya nagtambong sa mass oath taking sang mga SK officials kay Mayor Jose Espinosa III. Pero mabaton naton ini kay ceremonial na man lang ang pagsumpa nila kay nakasumpa na sya kay TreƱas.
Hunyo 30 nagtambong sya sa flag ceremony sang city government bilang ex-officio member sang city council. Amo lang yadto ang pila sa mga higayun nga nagkitaay sila ni Mayor Espinosa. Wala man sya naka-courtesy call sa alkalde antes nagsugod sang opisina sa city hall. Wala man lang sya nagpadala sang emisaryo agud maproseso ang pagkaayo sang ila opisina; ang resulta nagaopisina na sya, nagakinay-ag pa ang iya hulot. Wala man sya gani nakapalapit sa City Department of Interior and Local Government antes nag-assume sang office.
Makaligad ang pila ka adlaw nagpadala sya sang sulat sa alkalde nga nagapahibalo nga nag-assume na sya sang palangakuahn bilang ex-officio member sang city council. Isa ka sentence nga sulat, wala man lang sang pagtamyaw sang pagtahod ukon courtesy.
Kun basehan ang mga senaryo maathag nga may ginasandigan si Luntao. Kaangay nga wala sya nagapangilala sang amay sang syudad. Bata pa, politiko na. Bata pa, kabalan na. Masyado nga makatiliplang ang matam-is nga yuhum.
Maathag nga sa reklamo sang mga SK officials, poderoso gid si Luntao. Dugangan pa sang iya chief of staff nga daw poderan pa ang opisyal. Indi makamiting sang pribado ang mga SK officials kay Luntao kag mamati gid sya. Hay nano, pinadala ka ni sin-o?
Simple lang ang atun mensahe kay Luntao. Balta ka pa agud maglusong sa lunang sang dinamak nga politika. Indi ka magpaggamit sa mga garok nga politiko. Tindugan mo ang katungdanan sa pagtiglawas sa mga kabataan sang syudad.
Indi ka maghulag santo sa dikta sang imo patron. Hulag ka suno sa nagakadapat para sa mga kabataan.
Tandaan mo, bata ka pa agud mangin trapo! (jpranco1975@gmail.com/PN)
