NAPAYUHUM ako sang nabatian ko ang iya ngalan. Babaye nga version ni Boknoy.
Kyut pamatian sang iya ngalan, siling ko sa kaugalingon ko. Indi kinaandan nga ngalan.
Nakapahanumdum gani ako sang akon mga tinuig sang bata pa ako nga wala sang libog sa nagakalanabo sa palibot. Wala labot kon maakigan basta makahampang lang upod sa iban nga mga bata.
Ang matuod sina, nabatian ko lang ang iya ngalan. Gikan sa indi malayo nga distancia sa isa ka hulot napamatian ko ang inagihan sang bata.
Si Boknay ehemplo sang isa ka bata nga nagahandum sang isa ka masadya kag mapinalanggaon nga pamilya. Gamay pa lang siya ginapasapasa sya sang iya mga pariente didto sa Mindanao. Wala niya nakilal-an ang iya amay kag biniyaan sya sang iya iloy sa iya mga pariente. Ugaling kay ginakulang man ang iya mga himata, ginasaylo saylo siya sang puluy-an.
Pila ka tuig ang nagligad, ginbalikan siya sang iya iloy kag ginkuha agud dal-on sa Iloilo upod sa iya bana (nga padrasto ni Boknay) kag sa iya stepbrother.
Daw sa indi matungkad ang kalipay ni Boknay nga sang ulihi may pamilya na sya nga tawgon kag magapalangga sa iya. Ugaling ang ina nga handum nasandig sa iya man nga iloy nga daw sa nagsalig sang iya dalamguhanon sa hangin. Kasubong bala sang hinalay nga ginlupad sang hangin bangud ang iloy ni Boknay nagsalig sa pangako sang bana nga wala man sang makuha nga kaayuhan sa iya.
Bangod bata pa, nabutang sa kon ano nga indi kaayaaya nga pagkahimtang si Boknay. Sa iya lamharon nga edad nga onse anyos daw luyag na lang niya nga maghamtong na nga indi na lang magsalig sa iya iloy (nga nagasalig man sa iya bana).
Ahay…daw wala na niya matandaan kon san-o nagsugod apang namulalungan na lang niya nga ginasinggitan kag ginasakit sang iya padrasto ang iya iloy kon magpuli nga hubog. Nagapamintas kag nagapamahug kon indi paghatagan sang kuarta nga ginapangayo niya.
Wala nadugayan kag nagsaylo na sa kay Boknay ang pamintas sang iya tataytayan. Ginhan-usan sya sang punta nga sanga sang santol sang namalibad sya sa pagsag-ob ang tubi. Indi lamang agi sang hampas sa likod kundi pati ang mata niya naglagod sa igo sang hanot.
Nasundan pa gid yadto nga pamintas nga kon pamangkuton, may nakahanda na nga sabat si Boknay nga ang manghod nya ang may kahimuan.
Kon masakit ina nga batyagon sang isa bata ang pagpamintas, indi lamang gale amo sadto ang ginahimo sa iya.
Sa ila balay, may mga kahigayunan nga ginahimuslan pa sya. Wala sya sang may masugiran sa mga ginahimo nga pasulitsulit nga paglugos sa iya sa dako nga kahadlok sang pamahug nga patyon ang iya manghod kag iloy. Naisip niya nga maayo na lang nga mapatay sya sang sa halos wala na katapusan nga paglugos sa iya sang padrasto niya.
Madumduman niya ang bangirit sang kadalag-an sang isa ka halimaw sa tagsa makatapos sang iya pagpautwas sa bata nga mabilinan pa sang ka rigna sang iya danlak.
Daw kasubong bala nga ginabutong sya paidalom nga madulom ang paglaum nga makabutwa pa.
Naluwas gid man sa bangungot nya si Boknay kag gindala siya sang Bantay Bata sa iya bag-o nga puluy-an sa CAMELEON. Didto nakaginhawa siya sang husto gikan sa pagpamintas.
Didto sa CAMELION nangin bahin siya sang lima ka tuig nga in-house program para lubos niya mabag-o ang iya panan-awon kag malimtan ang mapait nga nagliligad sa kamot sang iya rapist nga stepfather. Amat-amat nga nakita niya ang iya pagkatawo
Natandog ako sang estorya ni Boknay nga nagapanindugan kontra sa pagpamintas, labi na ang pagpanglugos. Ang kasaysayan kag paghimakas ni Boknay nga malampuwasan ang masakit niya nga inagihan akon nahisayran sang mismo iya gin-estorya sa isa ka forum nga ang tinutuyo pag-untat sang rape.
Si Bok isa na karon ka advocate kontra sa pagpamintas. Ayhan nalampuwasan na niya ang iya inagihan apang indi nya luyag nga kalimtan bangud in ang mabakod nga kamatuoran sa pagpaki-away kontra sa mga perpetrators sang kakahasan kontra sa kabataan.
Si Boknay isa lang sa mga pamatuod nga ang biktima sang rape kadam-an mga bata. Kadam-an sang mga rapist kilala sang biktima – ila himata, tiyo, tatay, utod ukon lolo.
Sa masunod nga edisyon, aton naman hisayron ang statistics sang rape diri sa rehiyon./PN
