‘Brinkmanship’ kontra Tsina?

SALAMAT kay wala nagpamuyayaw si Presidente Duterte sa iya State of the Nation Address (SONA) sadtong Lunes, Hulyo 22.

Seguro nadumduman gid man niya sang ulihi ang gintudlo ni ma’am niya sa Good Manners and Right Conduct (GMRC) sa eskwelahan.

Kon may nabatian ako nga pamuyayaw (nga mga P.I.) sa lip-reading ko lang ato namurutan sa daw ginhutik niya sa pila ka okasyon sa iya sobra isa ka oras kag tunga nga SONA.

Ginpahigad man niya ang iya pamuyayaw kontra sa mga Obispo kag mga pari sang Simbahan Catolica nga ang Diyos (Amay, Anak kag Ispiritu Santo) gintawag niya nga “stupid” ukon “bobo”.

Pasalamat siya kay ining Diyos, pati ang mga tumuluo sini nga mga Kristiyano, kilala sa pagka-mapatinawaron sa pagtudlo mismo ni Hesukristo nga Diyos Anak. Ginpabay-an lang gani Niya ang mga buyayaw sa iya, pagkastigo, pagdupla kag pagbitay sa krus tubtub mapatay.

Kon iban nga tumuluo sang lain nga relihiyon ang ginpatungdan niya sini basi natutdan na siya sing buhi.

Indi man kita sugot sa pagbalik sang death penalty. Indi ta na pagdugangan pa ang sige-sige gani nga pagpamatay sa drug war, nga ang madamo dapat lang tani mapriso.

***

Of course, ginadayaw naton si Presidente Duterte sa iya political will agud ipatuman ang pila niya nga ginpangako sang nagligad nga 2016 nga eleksyon, nga iya man ginmensyonar sa iya SONA. Universal education, universal health care, dugang nga mga sueldo, pagpataas sang pension, pagpa-regular sang mga empleyado sa pribado nga negosyo, ang padayon nga away sa krimen kag droga, korapsyon kag iban pa. 

Bilib kita sa iya wala pagpasin-o sang dapat pahalinon nga katrabaho sa gobyerno tungod sa ila mga kapaslawan sa serbisyo. Lakip na gani ang mga tawo nga nagbulig sa iya todo-todo sang panahon sang kampanya.

Wala pili halin sa mga political appointees tubtub sa mga career service nga mga empleyado sa gobyerno, nga samtang ang naulihi indi madale-dale makakas sa serbisyo sa idalom sang Civil Service Law. Namedyosan gihapon niya ini mabulag sa iya kilid tungod sa suspetso sang kamalamalahan, katulad sang sobra 60 ka mga opisyales kag empleyado sang Customs.

Sa iya indi kinahanglan nga pamatud-an gid nga guilty sila agud mabulag sa pwesto. Bastante na sa iya ang “plain view” nga pagpamatuod nga “probably guilty” sila. Wala naman problema dira kay wala man sila gina-dismiss. Sige man ang ila sueldo samtang nagaatubang sang ila mga kaso.

Normal man lang ina nga ginahimo gani sang mga lokal nga mga executive. Ang indi nila mauyunan magtener sa pwesto gina-detail nila ini sa iban nga pwesto ukon trabaho.

***

Nahangpan naton ang tindug ni Presidente Duterte sa iya SONA ang indi ipilit ang aton kinamatarong sa West Philippine Sea tungod man sa counter-claim sang Tsina, kag makig-negosasyon lang diri para sa interes sang kada isa.

Sa nasiling ko sadto diri sa aton kolum pwede man kita mag-share sang benepisyo sa diin may pareho nga claim ang Filipinas kag Tsina katulad sang isa ka joint venture.

Pwede man kita mkapangisug nga panginmatyan naton ang Pag-asa Island kay aton ini kag yara man mabulig ang MDT, sa diin indi ang Tsina makatandug sa aton tungod sa pagpahilabot sang Estados Unidos.

In fact, nahimo na ini ni Presidente Duterte a la “brinkmanship” sa diin namahog na ang Filipinas nga padalhan sing suicide misyon ang Pag-asa kon salakayon gid man kita sang pwersa sang Tsina.

Well, wala nagpadayon ang Tsina sa hingyu sini nga pahugon kita palayo, indi katulad sang natabo sa Scarborough. Naisip seguro sang Tsina nga tuod-tuoron sang Estados Unidos ang pagbulig sa Filipinas kon salakayon na sini ang Pag-asa.

Pwede man naton sabton ang plano sang Tsina nga butangan sing missile ang pila ka isla nila dira sa WPS batok sa Filipinas kag sa mga nagalabay nga mga barko sa South China Sea.

Ano abe kon bweltadahan man naton sang pagtukod sang mga missile sa isa ka isla naton dira sa bulig sang Estados Unidos? Tan-awon ta abe kon sigehon pa nila ang inang plano nga mga missile.

Luyag gani seguro ini sang political opposition nga maki-Estados Unidos.

 “Brinkmanship” ini kon tawgon. Pahog kontra pahog agud mapunggan ang pagka-agresibo sang Tsina./PN

LEAVE A REPLY

Please enter your comment!
Please enter your name here