BETTER LATE BUT BETTER PREPARED. Amo ini seguro ang sa pensar sang kampo ni anay Davao City Mayor Rodrigo Duterte sa pagpadalagan sa iya sa pagka-Presidente sadtong eleksyon sang Mayo 2016.
Una anay nagbutang sila sing placeholder nga kandidato sa tion sang Filing of Candidacy (Oktubre 12-16, 2015), kag ugaling ginduso sang PDP-Laban ang kandidatura ni Duterte bulos sa ginpa-withdraw nga si Martin Dino sang malapit na ang deadline sang Substitution Period sadtong Disyembre 10, 2015, nga wala ginhimo sang iya mga kasumpong.
Ambot kon ngaa ginpasugtan man ini nga klase sang Substitution Rule sang Comelec kay samtang kilala na nga butigon ang kadam-an ta nga mga pulitiko, ginatudluan ta pa sila sa pagbinutig pa gid.
Imagine, himo ka anay sang peke nga kandidato agud malimbungan indi lang ang mga kasumpong kundi pati na ang mga pumuluyo!
Amo man ini seguro ang rason kon ngaa napaslawan si Duterte. Binutig gali ang iya pangako nga tapuson ang problem sa droga sa anom (6) lang ka bulan, kag ang dalagku nga mga krimen kag korapsyon. Naglala pa gani!
***
Sa ining palaabuton nga eleksyon sa Mayo 2022, amo man gihapon ang game plan sang kampo ni Duterte – may placeholder nga mga kandidato kag ugaling magduso sang segurado na nga mga kandidato sang Partido PDP-Laban kon diin tsirman si Presidente Duterte.
Sa ini nga kampanyahanay ugaling, ang kampo ni Duterte ang yara sa “defensive” kag ang political opposition naman ang yara sa “offensive” sa mayor nga proposition nga “Dapat bala saligan pa liwat ang grupo ni Duterte sa pagdala sang ryenda sang pang-gobyerno?”
Syempre, ang ideya sang away sang Duterte Camp amo nga ipabilin gihapon ang PDP-Laban kag mga alyansya sini sa poder.
Sa bahin sang political opposition, nga ginapangunahan ni Vice President Leni Robredo, nangin hayag sila dayon parti sa ila mga kandidatura sa pag-file pa lang sang ila candidacy – tubtub Oktubre 8, 2021- nga wala na maghulat sang Substitution Period sa deadline sini sa Nobyembre 15.
Si VP Leni nagliwat lang sang iya kandidatura bilang “Independent” sa Filing of Candidacy, although suportado gihapon sang Liberal Party nga sadto ginapangunahan niya. Ginpakitaan man siya sing daku nga suporta sang madamo nga mga pumuluyo nga nagahinugyaw gid sa iya paglibut-libot sa pungsod.
***
Ti, ano ang makapadaug nga game plan para sa Duterte Administration kay karon yara na ini sa “defensive”?
Sa karon, dalagku gid ang problema sang Duterte Camp. Buka na ang PDP-Laban Party sa Cusi Wing kag Pacquiao Wing, samtang gaatubang man sang mabug-at nga salabton sa mga pumuluyo.
Wala magdalagan ang anak ni Duterte nga sa Davao City Mayor Sara sa pagka-Presidente kundi pagka-VP lang sa idalom sang Lakas-CMD.
Ngaa ayhan sa pagka-VP lang kay sa inisyal nga survey nagapanguna si Sara? Tungod seguro kay mabug-at ang mga kasumpong sa pagka-Presidente. Kag sa pagka-VP lang ang nakita nila nga may kadalag-an ini “in the long run”.
May problema ugaling sa pagduso sa iya bilang ka-tandem ni Bongbong Marcos sang Kilusang Bagong Lipunan (KBL) nga nagadalagan sa pagka-Presidente. May mabug-at kuno ini nga bagahe, sunu mismo kay Presidente Duterte.
Ining bagahe ni Bongbong amo seguro ang padayon nga isyu sang ila ill-gotten wealth, nga sunu sa Supreme Court nagalab-ut sa $658 ka milyon samtang ang known lawful income sang mag-asawa nga Marcos tubtub lang sa $304,372.43. Found guilty man sang tax evasion si Bongbong sa indi pagbayad sing buhis halin sa 1982 tubtub 1984.
Isa ini sang daku nga isyu ni VP Leni batok kay Bongbong bilang nagapanguna nga kandidato sa pagka-Presidente sang political opposition.
Indi man makasiling si Bongbong kag mga utod niya nga wala sila labot sa ill-gotten wealth sang ila mga ginikanan. Bilang mga eredero, na-enjoy kag ma-enjoy man nila ining ill-gotten wealth sang ila ginikanan.
May daku man nga isyu si Presidente kay Bongbong. Siya bala ato ang kandidato nga may bisyo sang droga nga cocaine?
Isa pa, may kandidato man sa pagka-Presidente si Presidente Duterte nga si Bong Go sang PDP-Laban Cusi Wing.
In fact, nagagwa nga ang bottom line sang game plan sang Duterte Camp sa national scene amo lang ang pagpadaug kay Sara sa pagka-VP kag sang ila mga kandidato sa pagka-senador, lakip na si Presidente Duterte nga nagadalagan man sa pagka-senador. Mabudlay seguro mapadaug ining ila handom./PN
