Eksena nga makagalana

KAANGAY sang singkal sang init sa tungang-udto nga nagatahaw pag-abot sang sirom, kaangay sang ibwal sang kalayo nga nagahuyang matapos maubos ang iya ginalamon. Ini ang kainit sang pulitika nga nagaluntad sa syudad sang Iloilo.

Sadtong nagpahayag si Cong. Jerry Treñas nga ginaduso siya sang mga punong barangay nga magpadalagan bilang alkalde sa syudad sang Iloilo nga iya ginapalayag sa mga katapo sang media, kaangay sang kaging nga papel kag layag nga dahon, nagmakot ang impormasyon kag nag-ibwal. Ginbalikid ini sang mga iya mga kasumpong kag kritiko, ginpakamalaut, kag ginbasyahan sang ila magkatuhay nga panan-awan sa kon ano ang motibo.

Naglawig sang halos duha ka semana ang init sang sugilanon, ginpaamakan sang sitwasyon kon sa diin ginpatawag sa city hall ang pulo ka mga salaligan ni Treñas, nagtulod ini sa ila nga maghaboy sang ila resignation, nagpautwas sang ila mga rason kag panindugan sa publiko nga nagakatingala sa nagapug-ok nga asu sa ila balatyagon.

Madamo sang mga ginpatawag sa Legislative District Office nga mga punong barangay kag mga opisyales sang barangay lakip na ang mga tanod kag mga sidewalk vendor. Ginakabig nga nagatipon sang pwersa si Treñas, ginatukib kon sa diin sila magadampig, ginahimulsuhan ang ila katampad sa mga nagadumala sa banwa.

Sa pihak nga kudal, padayon man ang ila panghimulso, padayon man ang pagpatawag sa mga tawo agud nga matakus kon sa diin napatuhoy ang ila balatyagon kag paminsaron.

Bisan ano ka daku sang kalayo, magatahaw ini sa husto nga kondisyon kag tyempo. Kag sa sini lang, nagpahayag na si Mayor Jose Espinosa III nga maayo ang ila relasyon nga magbilas, kaangay kuno sila sang “one big happy family.”

Kon aton tul-iron ang sitwasyon, ang nagakatabu isa lang ka pamaagi agud matakus kon ano kadamo ang nagasuporta kay Espinosa kag kay Treñas, kag agud mahibaluan ang pulso sang pumuluyo.

Luyag lang nila nga ayagon ang sitwasyon agud nga magtuhaw ang may huyog nga magpadalagan batok sa ila, agud nga mahibaluan kon ang kadamuon sang nagasuporta sa ila ang labaw sa kadamuon sang mga nagasuporta sa ila mga kontra sa pulitika.

Kon tingbon nila ang ila tagsakdag, makalabaw ayhan ini sa tingob man nga tagsakdag sang oposisyon?

Bangud sa nagakatabu sa magbilas, may yara ayhan sang magasimpatiya? Mapukaw ayhan nila ang naga-ulikid sa ila? Matandog ayhan nila ang mga nagapalangga sa ila pamilya agud nga magtingob kag agud nga maghimo sang depensa agud nga mapukan ang ila mga kontra?

Ang ila hibagay daw kaangay sang upas sang damang, ginatumpukan, ginapustahan, kag ang mga yara sa malayo nagakaganyat nga mag-usyoso kag magtubong sa sitwasyon.

Wala sang tawo nga indi matingala ukon magbalikid nga may nagapug-ok nga asu.

Kon nagtuga man sila sang sitwasyon kaangay sini, maathag nga may yara lang sila nga ginaayag. Ang ila akto indi makatuga sang pilas sa ila dughan, wala sang tinaga nga dalitan nagakawas sa ila baba.

Maathag nga ang tanan padugi agud nga magsulhay ang dalan.

Nagtuga sila sang eksena nga makagalana./PN

 

LEAVE A REPLY

Please enter your comment!
Please enter your name here