GINDAUG sang ordinaryo nga congresswoman nga si Leni Robredo si Ferdinand Marcos Jr., nga may daku nga ngalan bilang senador, sa ila encuentro sa pagka-Bise Presidente sadtong eleksyon sang Mayo 2016.
Kag ina bisan pa nga napierde sing daku ang kandidato ni Leni sa pagka-Presidente, samtang nagdaug sing daku ang kasumpong nga si Duterte nga dapat tani nagtib-ong kay Marcos Jr. batok kay Leni pero wala.
Nagpakita lang ini nga ginboto sang mga pumuluyo si Leni tungod sa iya gid kapinasahe kag kon ano kahuyang nga kandidato si Marcos Jr. kay pierde siya bisan todo bulig pa sa iya si Duterte.
In fact, wala man naglain ang kapinasahe sang pagkatawo ni Leni agud indi saligan sang mga pumuluyo sa mas mataas na nga pwesto. Kon isipon gani, mas makasarang pa siya kay Marcos Jr. bilang abogada kag tapos sa Economics. Napakita man niya ang iya ikasarang bilang Bise Presidente bisan wala sing bulig sang administrasyon ni Duterte kay yara siya sa oposisyon.
Napakita niya ini nga ikasarang sa pagbulig sa mga kubos bisan sa diutay nga budget sang iya upisina tungod sa iya kapisan kag sa bulig sang iya mga abyan sa NGOs nga nagapati sa iya kawsa.
Samtang si Marcos Jr. wala sing nahimo kundi mag-waslik poder, katulad sang indi pagbayad sing buhis halin sadtong 1982 tubtub 1985. Nagbutig man ini sa sa pag-aku nga siya ang author, samtang indi, sang isa ka importante nga kasuguan angot sa territorial sovereignty sang Filipinas. May pagka-arogante man ini sa indi pagpasakop sa mga natalana nga mga debate nga daw may ginatago (kag may ginatago gid man!) nga baho, katulad sang indi pa mauli nga ill-gotten wealth sang ila pamilya nga na-confirm sang Korte Suprema.
***
Pero ngaa daw si Marcos Jr. pa ang paborito sang pila ka political survey? Nag-reklamo gid gani ang mga kasumpong ni Marcos Jr. Suspetso nila nga lutong macau ining pila ka mga survey.
Kon sa bagay, wala gid man sing perfecto nga survey, labi na gid kay sa mga political survey diri sa Filipinas ang respondent wala pa sing isa ka porsyento sang mga botante.
Sa masami, ining mga survey tubtub lang sa pila ka libu sang respondents, katulad sang 2,000 lang ka libu samtang ang botante nagalab-ut na sing 65 ka milyon sa palaabuton nga Mayo 2022 nga eleksyon.
Ang malain pa gid kay ang mga respondent possible halin sa mga “army of trolls” nga binayaran sang madaya nga mga kandidato ang ila serbisyo sa social media kag sa mga dalanon nga ma-identify bilang mga “political barker”.
***
Gani, to be fair sa kay VP Leni, yari ang resulta sang survey sang Catholic Educational Association of the Philippines (CEAP).
May total respondents ini nga 3,089. Ginpagwa ini sang CEAP sang sini lang, kon diin nagapanguna si VP Leni sing may 52.57% batok sa 24.4% lang ni Marcos Jr.
Nagasunod si Manila Mayor Isko Moreno nga may 9.61%, Sen. Ping Lacson nga may 3.53%, Sen. Manny Pacquiao nga may 0.87% kag si Ka Leody de Guzman nga may 0.26%.
Nanguna man si VP Leni sa survey sang Veritas Truth Survey sa survey sini sadtong Enero 2022, kon diin nagkuha si VP Leni sing 42%.
Tanan nga rehiyon sa pungsod naghatag sing pinakataas nga boto sa sining survey sa kay VP Leni, luas lang sa Central Visayas, Northern Mindanao, Davao, Soccksargen, kag Caraga.
Si VP Leni nanguna sa survey batok sa iya mayor nga kasumpong nga si Marcos Jr. sa 11 ka rehiyon samtang nanguna si Marcos Jr. sa apat lang ka rehiyon.
Nanguna si Vp Leni sa Region I – Ilocos Region, Region II – Cagayan Valley, Region III – Central Luzon, Region IV A – CALABARZON, Region IV-B – MIMAROPA Region, Region V – Bicol Region, Region VI – Western Visayas, Region VIII – Eastern Visayas, Region IX – Zamboanga Peninsula, NCR – National Capital Region, CAR – Cordillera Administrative Region.
Samtang sige man ang mga pag-endorso kay VP Leni sang mga dean kag mga propesor sa law, mga ekonomista, mga religioso katoliko katulad sang mga madre, mga pari kag mga Couples for Christ, mga non-catholic nga katapo sang National Council of Christians in the Philippines (NCCP), mga kabataan, retirado nga mga opisyales, mga entertainer, kag ang madamo nga grupo sang mga kubos./PN
