NAGABALIK sa honasan ang tanan nga basura nga ginhaboy sa kalalawran. Ginadala sang anod, ginaduso sang balud, ilabi na kon wala nagalugdang kag nagalutaw bangud nga mamag-an.
Kaangay man ini sa tanan naton nga mga akto sa mga nagliligad nga nagabalik sa karon nga panahon kag kon kaisa nagatuga sang pagtublag sa aton kasubong sang maranhig nga nagabangon-bangon.
Matuod nga imo gid masaboran gintimpla mo nga bulong kon imo man nga tumaron, nagalatay sa imo tutunlan, nagapanalunton sa imo kaugatan kag nagatagring ang imo nga dulunggan.
Indi na kita matingala sa nagakatabu sa magbilas bangud sa karon masaku na ang ila pag-eskrima, nagatay-og na ang magtimbang nga bahin kag mas nagakadalman ang nag-una bangud nga ginatantyar siya sang ulihi nga ginaharog niya.
Mas nagapintas na si Mayor Jose Espinosa III bangud nga mas kahibalo siya kon paano iguon sa balatyagon ang iya nga bilas nga si Congressman Jerry Treñas. Ginapunggulan niya sang kamot paagi sa pagkwa sa iya mga salaligan agud nga makumpulan kag mapiang ang iya paghulag sa iya congressional office.
Mas nagapin-ot ang dughan ni Treñas bangud nga ang iya madugay na nga ginasaliga, bisan pa sadtong alklade pa siya, ang ginkwa sa iya nga luyo, ginpadistansya sa iya kag ginapabatyag sa iya kon paano madulaan sang mga tawo nga amo ang iya salandigan sa pagpalakat sa iya nga opisina.
Ginapabatyag ni Espinosa kay Treñas nga ini ang balatyagon sang ginadalukan sang higayon, sang ginakwaan sang oportunidad, sang ginataban ang damgo nga makaserbisyo.
Mas maayo gani nga ginaayag ang magbilas bangud nagatukal ang ila alukaba, makita ang mga ginatago nila, nga may mga dapat limpyuhan sa ila hulot nga ginahukmungan.
Kon wala sila nag-eskrimahay, indi matadlong ang mga tiko nga bagay, mga polisiya nga dapat ipatuman, mga patakaran nga dapat patas kag alalangay para sa tanan.
Tapos na panahon sang pagpamentaha sang iban nga empleyado nga kon maghulag daw mga gamhanan kag indi mapukan sa ila ginatindugan.
Wala man ang mga empleyado nagdahum nga matabu sa ila ang ini nga sitwasyon, nagabatyag man sila sang kahuya, sang pag-alang-alang kag kabalaka sa ila mangin kahimtangan.
Matuod nga nagakadunlan gid man ang maasab magtulon nga nagakalipat magligon-ligon. Kon indi matunawan, nagaka-impatso. Kag ini ang nagakatabu sa tunga sang City Mayor’s Office kag Congressional Office.
Nagabatyag na sang kasakit si Treñas sa mga nagakatabu. Sa tuyo niya nga pahuyangon si Espinosa, ilaon nga magpalapit sa iya kag kilalahon siya bilang amo ang dominante sa ila, mas pa gid nga naglayo ang balatyagon ni Espinosa, mas nagbaris, mahumok sa ibabaw apang matalom sa idalom.
Samtang nagahilapit ang piniliay, mas madamo pa sang mga hitabu nga dapat bantayan, mas madamo nga mga suldado ang magkalapukan, mga tinyente nga magkalapilasan bangud nga ang ila mga heneral ang padayon nga nagapakig-away.
Posible wala lang matakus ni Treñas ang madalom nga pinsar kag balatyagon sang iya nga bilas rason nga nagkabus siya sa pagtantyar, kag sini iya na ginatumar ang iya gintimpla nga bulong. (bertladera@gmail.com/PN)
