KADAMUAN sang mga kurso nga sadto sa Luzon lang maagom, ilabi na sa Metro Manila, bangud didto ang sentro sang tanan sa pagpangabuhi kag mga dalagku nga kolehiyo kag unibersidad.
Apang karon, indi kinahanglan sang mga Ilonggo nga magpadulong sa malayo nga lugar agud lamang makaangkon sang kalidad nga edukasyon tungod madamo na sang mapilian diri mismo sa syudad kag probinsya sang Iloilo.
Matudlo naton ini sa abanse nga panan-awan sang mga lideres kag mga nagapalangga sa puturo sang mga Ilonggo.
Isa sa naglanog nga balita ang tuhoy sa tuyo nga pagtan-ay sang Iloilo Science and Technology University (ISAT-U) sang kurso nga Bachelor of Science in Meteorology (BS Met) nga pinakauna sa Western Visayas.
Bangud ini nga may yara na sang kagamitan nga sarang matun-an sang mga mahuyugon sa meteorology kag mabuksan sini ang higayon sa mas madamo pa nga mga pagtukib sa mga bagay nga makabulig sa pagpatin-ad sa pagpangabuhi sang mga Ilonggo.
Nahibaluan nga ginhiwat ang inagurasyon nga ginpatigayon sang Department of Science and Technology (DOST) kag sang iya mga partner agencies angot sa Iloilo Satellite Ground Receiving Station (GRS) sa Dumangas, Iloilo.
Madugay na ini nga ginpatigayon ni 4th District Board Member Rolando Distura sadtong alkalde pa siya sa banwa sang Dumangas. Katumanan ini sang iya paghimakas bilang disaster manager kag sang iya pagpalangga sa mga pumuluyo sa banwa sang Dumangas nga malikaw sa halit sang kalamidad ukon makabatu sa hangkat sang panahon.
Nangin madinalag-on ang ginhiwat nga inagurasyon nga ginpangunahan ni DOST Undersecretary for Research and Development Dr. Leah Buendia, Japan International Cooperation Agency (JICA) Chief Representative Mr. Sakamoto Takema, Prof. Yukihiro Takahashi sang Hokkaido University, Dumangas Mayor BJ Biron, 4th District Board Member Hon. Rolando Distura, Mr. Jerry Bionat gikan sa Provincial Government of Iloilo, Iloilo Science and Technology University (ISATU) President Dr. Raul Muyong, Jr., DOST- Advanced Science and Technology Institute Dr. Franz De Leon, Philippine Space Agency Director General Dr. Joel Joseph Marciano, Jr. , kag DOST VI Regional Director Engr. Rowen Gelonga.
Ang pagtukod sang Ground Receiving Station isa ka kolaborasyon sang mga ahensya. Target sini nga makapiyan-piyan sa naga-igsister nga ground receiving stations sa Metro Manila kag Davao sa pagbaton sang datus kag mga imahe gikan sa Philippine microsatellite, Diwata-2.
Ang impormasyon gikan sa GRS magamit sa pag-imprubar sang weather forecasting, paganghanda para sa mga kalamidad, kag sa pagbulig sa mga manugpanguma kag manugpangisda, kag iba pa.
Ginalantaw ni Distura ang daku nga bulig nga mahatag sang GRS tungod may higayon kita nga malantaw ang mga sitwasyon sa aton palibot sa bulig man sang Diwata-2 nga nagalabay sang apat ka beses sa isa ka adlaw sa kahawaan sang pungsod.
Isa sa natigayon sini nga bulig amo ang paghatag sang imahe sa nasakpan sang oil spill sa Mindoro. Maathag nga nakita ang kasangkaron sang oil spill kag nabuligan sini ang mga nagahimakas nga mapunggan ang padayon nga paglapta sini padulong sa iban pa nga mga lugar.
Suno kay Distura, makabulig man ini sa paglantaw kon diin nga bukid ang nakalbo na kag kon ano ini kalapad. Makita man ang mga suba kon nagligwat ang iya kurso ukon nagkitid ukon nagsangkad. Kag, madamo pa nga mga bagay ang mahibaluan sa bulig sang sini nga mga instrumento.
Kon may kagamitan, may higayon nga ini matun-an kag posible mapasangkad pa gid ang mga ihibalo sa mga bagay may angot diri.
Lauman naton nga magatuhaw ang mga madamo nga estudyante nga intresado sa meteorology bangud sa presensya sang sini nga kagamitan nga makabulig sa ila pagtuon.
Kaangay man ini sa iban pa nga kurso na nangin dekalidad diri sa aton sa Iloilo. Bantugon kita sa kurso nga edukasyon bangud madamo kita sang kolehiyo kag unibersidad. Nangibabaw kita sa kurso nga medisina kag nursing bangud madamo man kita sang ospital. Mga hangkilan nga manugbantala (broadcaster/journalist) bangud madamo kita sang news outlet (radio/television stations kag print media).
Kag madamo pa nga kurso nga nagapangibabaw ang mga Ilonggo bangud sa available nga kagamitan nga matun-an kag makabulig sa pagpasanyog sang kaalam.
Ginasiling nga mas abanse ini kaysa sa una nga duha ka GRS tungod nga ini ang pinakaulihi nga GRS nga naplastar sa pungsod.
Tungod sa klaro kag abanse nga panan-awan ni Board Member Rolly Distura, nakita sini ang kaimportante sang nasambit nga kagamitan para sa pagpangapin sa pumuluyo, naghatag sang dungog sa banwa sang Dumangas kag probinsya sang Iloilo, kag nagbukas sang bag-o na kurso para sa mga Ilonggo. (bertladera@gmail.com/PN)
