WALA sang may makapugong sa pursigido nga handom sang mga atleta nga ang bulawan nga medalya sa 2019 WVRAA ila nga maagom.
Padayon nga nagaani sang mga medalya ang mga delegado gikan sa syudad kag probinsya sang Iloilo sa halos tanan nga sports events sa nagapadayon nga hinampang sa Roxas City, Capiz.
Apisar sang pila ka kahimtangan, kaangay sang problema sa tubig nga gilayon man nga nasolusyunan, problema sa ikaayong-lawas sang mga atleta nga posible namag-uhan sa init sang panahon ukon pagbulubag-o sang klima, kag may mga nagkalalipong sa tagiti sang init, apang ang tanan mga menor nga problema nga gilayon man nahatagan sang pag-atipan kag wala lubos nga nagakasablag sa pag-agom sang mga bulawan nga medalya.
Bisan pa nga ginlibod sang kapitolyo ang ila kahangawa sa bug-os nga probinsya nga mabutang sa alang-alang ang mga atleta bangud wala naaprubahan ang 2019 annual budget sang kapitolyo kag diri nasandig ang allowances kag iban pa nga pondo nga kinahanglanon sang mga delegado, apang ang mga inosente kag wala sang hinalung-ong sa pulitika nga mga estudyante ang wala natublag. Nagpadayon ang pagsagrab sa ila balatyagon nga dapat mangin madinalag-on kag ang bulawan nga medalya ila nga matipon.
Nakakita man gali sang medyos ang kapitolyo kon paano mabuligan ang mga atleta paagi sa paghimo sang ila katungdanan santu sa angay nga pagsulundan. Nagtuon man gali ang kapitolyo sa pagtuman sa proseso kag nakabati sa panugyan nga gintuad sa ila sang Commission on Audit.
Wala man sang pyerdihon ang nagadumala sa kapitolyo kon nagatuon sila magpamati kag magsunod sa rekomendasyon sang COA. Wala man sang may nagapanag-iya sang solomente sa kaalam. Dapat nga buhinan lang ang bugal kag indi magwangal agud nga makapaminsar sa kon ano ang angay nga buhaton.
Lantawa bala ang mga inosente nga kabataan, mga atleta nga ang solo nga handom amo nga madaug ang ila kasumpong apisar sa kon ano man nga kondisyon ukon kahimtangan nga ila nasalapuan.
May yara sang pahak ang sapatos, ginpatapikan lang sang rugby agud nga makipot ang nganga kag agud nga magamit sa pagdalagan kag malutos ang kasumpong.
Kaangay sa mga atleta, ang mga pulitiko dapat maghimo sang paagi kon paano magserbisyo. Ipakita ang ikasarang antes magreklamo. Dawaton ang bulawan agud makatuad sang pinasahi nga kahimtangan kag inagyan padulong sa kadalag-an.
Tuhay ang mga pulitiko, wala pa kasugod ang hinampang apang nalutos na ang ila bugal, naghuyang na ang ila ispirito, kag daw nadulaan na sang paglaum nga mangin madinalag-on.
Kuntani mangin inspirasyon sa mga nagadumala sa kapitolyo ang kasupog sang mga atleta sa pagsumpong sa ila pangontra apisar nga kulang sila sa hinganiban.
Ang kulang sa materyal ukon kagamitan ang mga atleta apang ginpuno nila sang determinasyon kag handom nga mangin madinalag-on rason nga ang medalya ila naagom.
Leksyon nga dapat sundon, mas maayo pa ang mga bata nga atleta wala nagahibi sa kon ano ang kulang sa ila, apang ang nagadumala sa kapitolyo una pa ang tiyabaw antes magpadihot sang angay nga buluhaton.
Determinasyon ang armas agud maagom ang kadungganan sa tunga sang kakulangan./PN
