Kitaay kita sa Iloilo

NAKATAMBONG ako sang opening sang isa ka economy hotel kag nangin isa sa mga dinapit nga bisita si Tourism regional director Helen Catalbas.

Iya ginpanginbolahan ang Spaces by Eco Hotel sa ila pagsulod sa syudad sang Iloilo. Makadugang sila sa dako nga backlog sang mga hotel rooms nga kinahanglanon samtang ginaposisyon sang syudad sang Iloilo ang kaugalingon bilang nagapanguna nga distinasyon sang Meetings, Incentives, Conventions and Exhibits (MICE).

Ang Iloilo Convention Center may kapasidad nga 3,000 ka tawo at one time. Magapatindog naman ang isa pa ka developer sang convention center nga makaakumodar sang 4,000 ka tawo. 

Ini nga mga developments tuman ka makagalanyat. Dako nga bagay ini sa ekonomiya sang syudad.

Subong man siling ni Atty. Calatbas, kulang pa ang atun hotel rooms sa syudad sang Iloilo. May ara lamang kita sang 4,000 ka hotel rooms. Buot hambalon kulang ina kay maluwas sa mga participants sa events, may mga torista nga nagakinahanglan sang hotel rooms. Panawagan ni Catalbas, dapat may mga magapatindog pa sang dugang nga hotels sa syudad sang Iloilo.

Paathag sang mapisan nga Department of Tourism (DOT) director, ang mga organizers sang MICE wala lang nagatan-aw sang venue, kundi labaw sa tanan sang akomodasyon. Bisan pa may venue kun wala sang akomodasyon, indi magdayun ang organizers.

Diri na nagasulod suno kay Catalbas ang ginasiling nga “build and they will come.” Matuod ina, antes kita mag-baligya, dapat ara na ang produkto.

Ang “Meet You in Iloilo” campaign matahum. Positibo gid ka tama. Pero dapat lang masigurado nga “When I meet you in Iloilo, I have a home to stay,” ‘di bala?

Ang atun gobyerno tuman ang paghimakas nga mabaligya ang Iloilo indi lang sa lokal kundi pati na sa internasyonal. Gani dapat nga ang pribado nga sektor mangin dako nga bahin sini nga handum.

Pero indi man pagkalipatan ang atun trapiko. Indi man kita makaperpekto nga wala sang paggutok, pero dapat i-manage lang sang husto.

Kun sa pagkaon, madamo na sang come-on ang Iloilo. Kinahanglan na lang natun nga pasanyugon ang atun mga pasilidad.

Palihog lang gale ako check sang mga CR sa terminals!

***

P.S. Maayong pagbasa sa suki sang Panay News nga si Toto Hector Espinosa. Sa kay Sir Fred Villanueva salamat sa pagbasa sang akun column. (jpranco1975@gmail.com/PN)

LEAVE A REPLY

Please enter your comment!
Please enter your name here