[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’LABAY MAN AKON ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
BY RUNJI ROCIO JAMOLO
[/av_heading]
[av_textblock size=” font_color=” color=”]
Basa sa ulan, wala may masakyan
BIERNES sang hapon, las sinco. Oras inugpauli. Pila ka minuto pagtakop sang office hours, naghingagaw ako gwa sa opisina sa pensar nga kinahanglan nga makauna na ako sa dalan sa pagbantay sang salakyan.
Pero indi yadto ordinaryo nga Biernes sang hapon nga oras inugpauli. Ang pagpauli sang nagligad nga Noviembre 25 makabig nga dako nga hangkat kay magluwas nga mamunog ang pag-ulan, haluson naman maglabay ang mga pangpasahero nga salakyan.
Sina nga adlaw napaidalum sa Typhoon Signal No. 2 ang syudad sang Iloilo. Bisan na-declare nga wala sang klase sa mga eskuelahan, may yara gihapon opisina ang mga empleyado. Husto sa patunda (warning) sang Pagasa, mamunog ang pag-ulan nga nabatyagan sina nga adlaw.
Beinte minutos… treinta minutos nga pagbantay sa dalan Bonifacio, wala gihapon sang sarang masakyan. Malaka-laka ang labay sang mga depasahero nga jeep kag ang mga nag-agi puro puno man.
Ginpakamaayo ko nga sumalangon ang mga salakyan sa downtown area, amo gihapon ang sitwasyon. Isa ka oras na ang naligad, wala gihapon sang paglaum. Kalabanan mga private vehicles ang naga-agi. Nuventa munitos ang nagligad, wala gihapon sang sarang nga masakyan. Bisan taxi haluson nga nagabyahe.
Mas madamo pa gid nga mga pasahero ang na-alangan. Basa samtang nagapakig-agaw nga makasakay. Sa duha ka oras nga paulan sa higad dalan pati ang payong nga dala daw luyag na nga mag-give up. Wala sang bata o tigulang, wala sang lalaki o babaye. Hala, panagil-ut para makasakay. Di bale na kon ang magtimbang nga kaiping basa basta lang nga makapauli.
Sang ginsubay na sang ginasakyan namon nga jeep ang mayor nga dalanon halin City Proper pakadto sa plaza sang Jaro, makita ang mas madamo pa gid nga pasahero sa higad dalan nga nagabantay man kag nagalaaw-laaw sa unhan. Ang iban daw ara na sa tunga dalan kay tuman ka taas ang tubig baha sa kilid dalan o sa designated loading/unloading area.
Mahinay ang lakat sang salakyan kay nagahalong nga indi mabulyahan sang tubig ang mga na-stranded nga pasahero sa higad dalan. Halin sa mercado sang La Paz tubtub sa atubang sang Benito sa Jaro halus bati-is ang kataason sang tubig baha.
Sa plaza sang Jaro madamo pa gid nga mga pasahero ang na-alangan sa pagpangita sang salakyan nga magadul-ong sa ila sa mga terminal sa Ungka o sa Tagbak. Bisan taxi indi magkuha pasahero kay kuno baha ang alagyan sa CPU (pakadto sa Ungka). Amo man ang rason sang iban sa pakadto Tagbak- nga mataas ang tubig sa atubang sang LTO.
Repeat na ini. Mas o menos duha ka bulan ang nagligad tag-duha ka oras man nga na-alangan sa dalan ang mga pasahero sa pagpauli.
Nga-a?
Wala na nagabyahe ang mga public utility jeepneys (PUJ) kon magtaas ang tubig baha nga nagala-ot sa dalan. Kasubong man sini ang ginahimo sang mga taxi. Suno sa pila ka taxi drivers, mabudlay na nga maguot ang ila salakyan kapin pa sa mga subdivisions o lugar nga mataas ang tubig baha. Wala na sila nagapasimpalad pa sa pagkuha sang pasahero kay basi manabat pa sila sa LTFRB kon mareklamuhan sang pasahero.
May rason man sila nga maglikaw sa kahul-anan bangud ang kon ano nga sablag nga maabtan sa ila salakyan, taxi drivers man ang ginasukot sang ila mga kompaniya. Gani bisan indi pa makalab-ot sang pang-boundary, pilit na lang nila nga ginagarahe ang salakyan para iwas kaltas o mamultahan pananglit magub-an.
Kaangay man sini ang kahimtangan sa mga tricycle nga temprano pa nag-garahe sina nga gab-i. Nagpundo sa higad kag mag-inuman. Pasalamat na lang kita sa mga trisikad drivers nga nagpulaw. Kunop sang manipis nga plastic, wala untat nga nagpanghakot kag nagdul-ong sang ila mga pasahero sa kon diin nga siuk-siok.
Kasubo apang matuod nga kon tag-ulan, nalimtan na sang mga pangpubliko nga salakyan ang ila katungdanan.
Seguro kinahanglan ang mataas nga salakyan sa sini nga mga kahigayunan. Dapat na bala magsulod ang dalagko nga bus sa syudad?
Sa mga kompaniya sang bus, LTFRB, puede bala pasudlan sang dalagko nga bus agud makapauli man ang mga na-alangan? Ang Iloilo City Disaster Risk Reduction Center sarang bala makatan-aw sini? Puede man ayhan maka-field sang mga dalagko nga salakyan ang Iloilo PDRRMC agud mabuligan hakut ang mga pasahero nga nagahingamo nga makapauli sa kabanwahanan bisan hasta terminal lang?
Nagapanuktok kita sa mga natungdan./PN
[/av_textblock]
[/av_one_full]
