[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PAUTWAS! ‘ tag=’h3′ style=’blockquote modern-quote’ size=’30’ subheading_active=’subheading_below’ subheading_size=’15’ padding=’10’ color=” custom_font=”]
BY JOEL FRANCO
[/av_heading]
[av_textblock size=” font_color=” color=”]
Tuesday, October 24, 2017
[/av_textblock]
[av_textblock size=’18’ font_color=” color=”]
SIN-O NAGSILING nga ang Filipino mapinatawaron? Sin-o nagsiling nga kita madali makapaumod?
Sa matuod lang madumot ang mga Filipino. Madinumdumon. Wala nagakalipat.
Ihalimbawa lang naton ang batasan sang aton mga politiko subong. Balos-balos lang indi bala?
Nagsugod ini sa panahon ni Gloria Macapagal-Arroyo. Matapos niya nakuha ang poder kay ousted President Joseph Ejercito Estrada, ginpakasuhan niya ini sang plunder nga nagresulta sang pagbilanggo sang anay presidente kag iya anak nga si Jinggoy. Pero sang ulihi nga bahin na sang iya termino, gin-pardon niya si Estrada sa paglaum nga makuha ang suporta sini sa iya administrasyon.
Sang 2010 nagpungko naman si President Benigno Aquino III. Ang natabu ginpapreso ya man si Arroyo sa kaso man nga plunder. Kaupod nga nakasuhan ang iban nga mga kaalyado ni Arroyo. Nabuyagyag man ang Priority Development Assistance Fund (PDAF) scam kun sa diin napriso sanday Senator Estrada, Sen. Ramon “Bong” Revilla, Sen. Juan Ponce Enrile kag iban pa. Madamo nga mga kongresista ang may kaso man angut sa PDAF scam.
Sa pagdaug ni President Rodrigo Duterte, nakakita sang kasanag si Arroyo. Gin-abswelto sia sang korte suprema. Ang impresyon sang kadam-an nga may impluwensya ini sang Malacañang. Syempre wala sang may mag-ako. Pero bal-an nyo naman nga supporter ni Duterte si Arroyo.
Duha ka bulan na ang nakaligad ginapakasuhan sang Ombudsman sa Sandiganbayan si President Aquino bangud sa kamatayun sang 44 ka katapo sang Special Action Forces (SAF) nga nagsalakay sa kuta ni Zulkifli Bin Hir alyas Marwan. Pero indi lang ini, gina-capitalize subong sang administrasyon ang isyu sang ilegal nga droga agud malagas ang mga indi kaalyado, ilabi na ang kilala nga mga Yellows ukon supporters sang Liberal Party, and partido sang nakaligad nga administrasyon.
Matuod may negligence gid man ang nakaligad nga administrasyon sa away kontra sa ilegal nga droga. Pwero ngaa pila lang ang ginalagas subong? Maathag nga madamo man ang ara subong sa luyo sang administrasyon nga wala ginmitlang, wala ginalagas. Simple lang ang rason: nagsuporta sila kay Duterte sang nagligad nga election kag ang iban madasig nga naglukso partido.
Masubo lang kay ginagamit ang popular nga adbokasiya kontra droga agud malupog ang kontra sang administrasyon.
Sa makapila ka beses ko na ginsiling nga si Duterte lang ang may kaisog nga awayon ang illegal nga droga. Sia lang kag wala na sang iban. Pero ang atun panawagan tani salalama lang kag wala sang pinilian.
Diri gani sa Iloilo ang grabe mag-away sa ilegal nga droga, sang una nagalotgot man sa gatasan sang dorogista kuno. Ambot kun sin-o na sila? Nga sang una masako ang balikbalik agud mangayo suporta sa isa ka kilala nga drogista pero sang wala napaboran nagsunggod na kag ang anay gatasan gintira kag nagsaylo naman sa isa ka dorogista.
Ini bala nga klase sang mga peke nga crusaders ang dapat nga pakdulon agud makabugtaw sa kamatuuran. Ugaling ini man nga mga tawo matanda gid maghampang sang ila baraha ano pa bisan daw juke box na gid pero ginadayaw pa.
Tani ang kadumot indi lang magpili. Kun sin-o ang may kahilabtanan, lagson na kag kasuhan, indi lang paglawag-lawagon sa mikropono ukon pahugpahugon nga patyon.
Tani bala ang kampanya sa droga wala lang upod nga dumot kundi nabalay sa kamatuoran agud wala sang lutsan ang mga hakugan nga sa ilegal nga droga nagkwartahan. (jpranco1975@gmail.com/PN)
[/av_textblock]
[/av_one_full]
