Makatupong ayhan?

PAALAM Iloilo Dinagyang Foundation, Inc. (IDFI), pang-abi-abi Iloilo Festivals Foundation, Inc. (IFFI).

Makaligad ang halos duha ka dekada, ini ang pinakauna nga kahigayunan nga indi na magdumala sang Dinagyang Festival ang IDFI. Isa sila sa mga nangin rarong sang away sa politika sang magbilas nga mayor Jerry Treñas kag anay Mayor Jose III Epinosa. Ang ila boksing sa politika nangin royal rumble na kay madamo na ang nadalahig.

Halos apat ka bulan na lang ang nabilin kag Dinagyang 2020 na. Kun sang ti-on sang IDFI, nakasugod na sang press conference angut sa mga Dinagyang activities, subong nga ti-on sang IFFI ara pa lang sila sa proseso sang konsultasyon.

Sa Lunes, Setyembre 16, ang pagpirma sang Memorandum of Agreement sa tunga sang syudad sang Iloilo kag IFFI. Diri pa lang makasugod ang IFFI sang ila legwork sa pagpanghanda sa festival. Siguro likom sa ihibalo sang media nagahulag naman sila apang bangud nga wala pa sang natabu nga presscon, blangko pa ang media. Ang nahibaluan lang nga wala na sang Kasadyahan contest, sa baylo ang sadsad ukon merrymaking sang mga grupo ang mabulos.

Sa nakaligad nga masobra lima ka dekada sang Dinagyang Festival, naka-level up na ini. Pamatuod sina nga ang tunog sang iban nga mga festivals tunog Dinagyang na. Ang mga hulag sang ila  dancers, daw Dinagyang warriors man.

GInakabig nga talamdan kag balasehan sang lebel sang pagpasundayag sang mga festivals ang Dinagyang. Sa pagkamatuod, sa Aliwan Fiesta kulang ang kahiwatan kun wala ang Dinagyang.

Makatupong ayhan ang IFFI sa nahimo sang IDFI?

Ang bati natun nga wala pa sang subsidy nga nahatag sa mga tribu nga magapasakop sa kahiwatan. Sang panahon sang IDFI, wala pa nakapirma sang MOA, nagapaggwa na sang budget ang foundation para sa paghanas sang mga tribu. Kun ang isa pa ka tribe manager, mala-mala gid subong ang mga kabataan.

Ano ayhan ang matabu sa Dinagyang 2020?

Indi lang kita magkalipat, atun ini festival gani sakdagon ta. ([email protected]/PN)

LEAVE A REPLY

Please enter your comment!
Please enter your name here