ANG selebrasyon sang Paskwa, sadto pa, isa ka malipayon, mabugana kag ginadugukan nga okasyon, labi na gid sa inadlaw nga malapit sa pagkatawo ni Hesukristo nga aton Manunubos sa Disyembre 25.
Nagaalawas ang mga sumilimba sa mga simbahan. Bisan diin may matahum nga mga talan-awon – may parol sa mga pamalay, sa mga dalanon, kag bisan sa mga kakahuyan sa plaza kag kon ano pa nga naga-ingat-ingat nga mga puni sa palibut.
Ang mga empleyado, sa gobyerno kag sa pribado nga palamugnan, may pamaskwa nga 13th month agud magamit sa ila pagselebrar sang Paskwa.
Tungod kay may dugang nga galastuhon, madamo ang mga Christmas party kag kaangay nga mga kahiwatan sa bisan diin nga lugar – sa puluy-an, sa upisina, kag sa mga pagtililipon sa madamo pa nga lugar – kon diin bugana ang pagkaon kag pampainit sang dulunggan.
Ang mga kabataan nagaduaw sa ila mga maninoy kag maninay nga may ara-ara agud makabaton sing regalo. Ang mga indi makabaton sing pamaskwa kag kubos makabaton man sang pamaskwa halin sa gobyerno, mga humanitarian ukon charity group, kag sa mga indibidwal kag pamilya nga nakaluag-luag nga makahatag sing pamaskwa sa mga bululigan agud mapahalipay man sila sa ngalan ni Kristo.
Pati na ang dapat ulikdan sa ila masubo nga kahimtangan nga mga tigulang sa asilo, mga kabataan nga na-ilo sa pagtatap sang ila mga ginikanan, kag mga bilanggo nga wala man ginakalimtan ni Kristo sa iya pagpalangga kag handom nga magbag-o na sing ila kabuhi.
***
Ugaling tungod yara kita sa panahon sang COVID-19 sa karon, daku gid ang kakulangan sang aton selebrasyon sa Paskwa. Minilyon ang nagapabilin nga wala ubra kag palangitan-an tungod sa madamo nga ginadumilian nga panghulag.
Kon may nabulig man ang aton gobyerno ina lang ang masarangan man sini paagi sa Social Amelioration Program (SAP), cash-for-work, pautang, bulig sa padayon nga husto nga pagtalauma sa kaumhan, lakip na ang nahalitan sang sunod-sunod nga mga bagyo sang sining karon lang.
Nahibal-an sang gobyerno kag sang mga nasablagan nga pumuluyo nga indi sapat ining til-og nga bulig sa ila. Apang kon pang-survive man lang, kay amo lang ang masarangan ta, daw wala naman sang daku gid nga reklamo ang aton mga pumuluyo.
Isa pa, ang gina-selebrar naton amo ang pagkatawo sang aton Manunubos nga wala man sing ginapangayo kundi ang aton pagpalangga kay palangga man Niya kita.
In other words, ang pagselebrar sang Paskwa yara sa tagipusuon indi sa materyal nga bagay. Bisan diutay man lang ang aton handa para sa Iya upod sa aton pamilya, ikalipay na ina Niya. Indi ina Siya malipay sa grande nga handa kon pakulahaw man lang ang aton pagdumdum sa Iya.
***
Meantime, mag-selebrar na lang kita sa aton masarangan nga tutok sa aton panimalay, labi na gid kay kinahanglan man naton mag-amlig gihapon sa COVID-19.
Sa gihapon, ang panugyan sang Departmen of Health amo ang pagtuman sang minimum health protocol: pagsuksok sang face mask kag face shield, masami nga pagpanghugas sang kamot, kag physical distancing, kag ang paglikaw sa sobra nga gahod sa kadam-an, labi na gid ang kinanta sa karoake.
Pero, pwede bala ang pagtililipon nga malapitan ukon wala na gani sing face mask kag face shield?
Wala ini na-specify sang health authorities apang ginapahangop man sini nga pwede ini sa isa ka pamilya nga madugay na naga-upod nga wala man gapakita sang sintoma sang COVID-19 – at least sa sulod sang 14 ka adlaw nga pag-upod.
Ginapahangop man ini sang DOH sa mga nagaangkasanay sa motor nga mag-asawa ukon magkahagugma nga naga-upod sing madugay na nga wala nagapakita sing sintoma sang COVID-19.
Subong man sa kaso sang mga humalampang sa basketball sa Filipinas (PBA) kag sa US (NBA) nga ginatugtan nga wala face mask basta napamatud-an nga hilway sila sa COVID-19 sa sulod sang 14 ka adlaw sa tion sang paghampang.
Ang gina-istriktuhan lang amo ang mga bisita kag ang pwede makapalapit sa imo nga indi mo maseguro ang ila COVID-19 status, nga kinahanglan mo mag-atubang sa ila nga may distansya kag protektado ka.
Merry Christmas kag Happy New Year in advance sa tanan! Basi bala makadumduman man kamo sa akon ukon ako man makadumdum sa inyo. Bisan kalendaryo lang, a…he-he-he!/PN
