NAGSUNGAW ang kaugot sang mga pumuluyo sa ginahimo sang administrasyon sa mga nagasupak, sa mga nagapakamalaut, sa mga oposisyon.
Nabatygan sang tawo, kag para sa ila paglantaw, indi na husto ang ginahimo nga pagharog sang mga talatapan sang administrasyon batok sa mga masingki nga kritiko, sa mga nagapanguna sa pagbuyagyag, kag sa mga mahugod magtuad sang kamatuoran paagi sa imbestigasyon nga dapat mahisayran sang mga tawo.
Halos tanan nagakabati man sa panindugan ni sadto anay Justice Secretary Jesus Crispin Remulla kag karon Ombudsman Remulla nga para sa iya sarang matursi ang kasuguan ukon ‘bend the law.’
Sa pamatyag sang kadamuan, ginagamit ini karon nga armas kag ginpatalom sang ‘selective justice’ agud nga pahugon kag pahuyangon ang mga nagapamatok sa direksyon sang administrasyon.
Halos tanan nga ginapanglagas sang administrasyon, ginkasuhan agud nga indi makagwa sa karsel kag makabatu pa sa pwersa nga ginapatus-on sa ila.
Apang, si Senador Rodante Marcoleta nga wala kahilabtanan sa flood control scandal, wala sang kaso angot diri kag indi nila mahigot sa sini nga akusasyon, ginhampak nila sang kaso angot sa nag-amot sa iya kampanya sa eleksyon.
Masupog si Marcoleta sa iya imbestigasyon, luyag siya pahipuson, luyag siya nga ihawla sa selda agud indi na makapangusisa pa angot sa kagarukan nga nagakatabu sa pungsod.
Indi kita malipat nga ginsiling sadto ni Independent Commission for Infrastructure Commissioner Rogelio Singson nga kapin 1,200 ka tawo ang may salabton-kriminal sa pasuni nga kickbacks scheme, nga may 15 ka mga indibidwal sa kada ghost project.
Diin na ang mga tawo nga natukiban nga may kahilabtanan sa flood control scandal? Nasuguran man bala ang imbestigayon sa ila? May kaso man bala sila nga plunder? Ngaa wala gintutukan nga kasuhan ang mga namitlangan nga mga kong-traktor?
Ngaa mahipos ang Department of Justice kag Ombudsman sa kahimtangan sang ila pasuni nga kahilabtanan? May konklusyon na bala nga wala sila kahilabtanan sa anomaliya? May desisyon na bala nga hilway sila sa kaso? Ngaa ang sentro sang asunto amo ang mga nagasupak sa administrasyon? Ginapili lang bala sa kon sin-o ang kasuhan? Kon naga-ugyon sa administrasyon, hilway sa salabton?
apanas na bala sa salabton kag paminsaron ang ila mga ngalan kag mga hinimuan? Agud nga malipatan, ang pokus yara na karon sa impeachment trial? Dapat kusuan sing maayo ang bise presidente, siya ang tadtaron sing tuman ka pino, agud nga ang pokus yara sa iya, agud mangin halad siya sa altar sang balasulon?
Suno sa ginasiling sang tagpangaway sang korapsyon, apang sa subong daw naningkoy kag libagon ang iya huni, nga si Senador Panfilo Lacson, may 67 ka mga katapo sang House of Representatives sadtong 2022 nga ginapasuni mga kontraktor sang ila kaugalingon nga government-funded infrastructure projects.
Naglipas ang panahon, diin na ang imbestigasyon? Daw palupok lang apang amido? Wala sugpon, wala klaro?
Ngaa ang naga-imbestigar na ang ginalagas kag ginabakol sang kaso? Ngaa ang mga nagabuyagyag amo ang ginapahog?
Ngaa kon mag-upod sa administrasyon, ginapahinay-hinayan ang pag-ukay sang kaso batok sa ila, apang kon kasumpong ang kaso ginaserbe dayon?
Tuman ka athag nga may pinilian, tuman ka athag nga may ginapangapinan. Tuman ka athag nga ginapaduko nila ang kasuguan para sa ila benepisyo apang ginapatalom nila ang kuko kag bangkil sang layi para sa ila mga kasumpong.
Ngaa indi pagpadayunon ang imbestigasyon angot sa flood control scandal, ilabi na nga natumod na ang mastermind, suno sa ila si anay House Speaker Martin Romuladez. Ngaa nauna pa priso ang mga ultimo? Tungod nga kon si Romualdez ang magtuad, sigurado nga may marumpag?
Ginalisu sang administrasyon ang atensyon sang tawo pakadto sa impeachment trial. Ginahalad sa headline sang balita ang mga kausmpong nga nagasupak nga ginapahog nga kasuhan. Ang nagakutkot sa korapsyon amo ang ila una nga ginalubong.
Maathag nga mapintas ang ini nga admnistrasyon, ang kapintas yara sa iya mga talatapan nga mga masupog. Lantawa ang presidente, nagapabuot-buot, malagday maghambal, daw wala kahibalo sa kasakit nga ginahimo sang iya mga tinawo. Ginapakita niya nga indi siya mapintas, apang sa likod sina nagakatabu ang pagpangharog sang iya administrasyon.
Indi ninyo mabasol ang mga katapo sang Iglesia ni Cristo nga maggwa sa dalan kag magpahayag sang ila hibubun-ot. Posible nga indi na sila kaagwanta sa ila nakita kag nabatyagan nga ginahimo sang administrasyon.
Ang kasakit yara sa naipit, wala sa naga-ipit.
Indi na sila magwawaw kon wala sila nasakitan. Indi sila magtipon kag magprotesta nanamian sila sa sistema nga nagaluntad.
Tandaan lang naton nga nagatiyog ang kalibutan, ang nagahibi subong may tsansa nga sila naman ang magayuhom. Ang ginapaantus makaagom sang kasulhay kag ang nagapaantus amo naman ang magabahulay.
Indi man pagmarkahi ang inyo ngalan bilang mapintas nga tinuga sa sin inga kalibutan. Mangilo ang mangin balos sang mga naga-ugtom kag naga-antus. (bertladera@gmail.com/PN)
