Matuod kag prangka nga politiko

SA KONSEHO sang syudad, isa sya sa mga maalam kun kasuguan ang hambalan.

Apisar nga wala sya naka-practice sang abogasiya niya bangud nagserbisyo sya sa gobyerno kag nangin politiko, apang ang iya kaalam sa kasuguan, indi malipod.

Si Councilor Eduardo “Ed” Peñaredondo isa ka abogado, nangin opisyal sang Parole and Probation Board kag karon konsehal sang syudad sang Iloilo. Sa malawig niya nga pagserbisyo madamo sya sang mga nahimo nga wala lang masyado nahatagan sang atensyon.

Bilang isa ka naga-cover sang city hall sa malawig na nga panahon, indi ko mapunggan nga magsulat nahanungod sa isa ka opisyal sang syudad nga mahipos lang apang may maayo nga hinimuan kag may maayo nga kabubut-on pero prangka kun ano man ang iya tindog sa isyu.

Si Peñaredondo amo ang politiko nga masiling mo kun ano sya bilang isa ka tawo amo man sya sa iya pagkapolitiko. Nasaksihan ko kun ano sya ka prangka sa mga isyu kag kun ano sya ka matuod kun mag-atubang sa tawo. Wala sang kaplastikan; kun indi mabuligan ginaprangka ang tawo kag wala ginapasalig. Buot silingon wala nagaplastik lamang makakuha sang simpatiya.

Si Peñaredondo ang politiko nga wala ginapangabuhian ang iya posisyon. Ini bangud nga may negosyo   kag malapad nga kadutaan nga nagahatag sang trabaho sa madamo nga mga Ilonggo. May pwesto man ukon wala, padayun nga nagabulig sa mga Ilonggo.

Pero nahibaluan nyo bala nga kun ano ka progresibo ang syudad sang Iloilo subong bunga ini sang maayo nga pagplano halos isa ka dekada na ang nakaligad kun sa diin kabahin si Councilor Peñaredondo?

Ini ang ila gintukod nga master plan nga naghatag sang giya sang development subong sa syudad. Bangud sang master plan nabag-o ang klasipikasyon sang mga duta kag lugar nga nagganyat sa mga negosyo nga magbukas sa Iloilo. Ini nagapakita sang iya vision bilang isa ka lider sang syudad. Wala lamang natapos sa pagpungko sa pwesto ang pagkapolitiko, kundi may bunga kag kongkreto nga mehora para sa kaayuhan sang mga Ilonggo.

Ginapakita sang history sang iya pamolitika nga nagasakdag sya kun sin-o ang nagapungko nga alkalde. Panindugan niya, suportahan ang maayo nga programa sang alkalde kag pamatukan ang anomaliya.  Ang oposisyon indi para magpamatok kundi para magpasiguro nga matarong ang pagpadalagan sang gobyerno.

Si Ed Peñaredondo, matuod kag prangka nga politiko!

LEAVE A REPLY

Please enter your comment!
Please enter your name here