Mga bentaha sang telework sa empleyado kag kompaniya

NANGIN kasuguan na sadtong Disyembre 20, 2018 ang Republic Act 11165, nga gahingyo sa pribado nga mga kompaniya nga ipatuman – sing boluntaryo lang ( indi compulsory) – ang telecommuting, ukon telework, sa mga kwalipikado nga mga empleyado.

Ining kasuguan sa telecommuting nagapahanugot sa isa ka empleyado sa pribado nga sektor nga maka-ubra sa gwa sang iya upisina ukon regular nga worksite.

Diri puede magtrabaho ang isa ka empleyado sa iya puluy-an ukon diin man nga conveniente sa iya, samtang ga-enjoy sang tanan nga benepisyo nga gina-enjoy man sang mga empleyado nga naga-ubra full-time sa upisina ukon regular nila nga worksite. Pero, ngaa bala puede ini?

Puedeng-puede! Ina tungod yara na kita  sa Age of Telecomunication and  Computer Technology. Sa karon, puede kita makapadala sang aton luyag ipaabot sa bisan kon sin-o man, sa bisan diin nga bahin sang kalibutan, paagi sa internet sa bulig sang computer technology.

Lakip na gani ang pagbaton sing may bayad nga ubra paagi sa online (via internet) communication.

In fact, madamo na sa aton ang nakakita sing palangabuhian paagi sa internet nga indi kinahanglan magkadto gid sa upisina sang aton gina-ubrahan. Uso na gani sa karon ang tutoring sa internet sa mga foreigner nga luyag magtuon sing English kag iban pa nga lenggwahe.

Sadtong nagpahuway na ako sa pagka-editor sang pamantalaan, naka-trabaho ako sa isa ka monthly magazine sa Uropa sa diin nagapadala ako sang akon mga artikulo via internet kag ginabayran ako paagi lang sa money transfer. Isa ka gatos ka US dollar ($100) ang ginabayad sa akon sa kada artikulo nga magwa. Nag-untat ugaling ako sang gin-assign ako sa malayo nga lugar, katulad sang Antique kag Boracay, tungod indi pa ako sadto lubos maayo sa akon ginabatyag.

Naka-trabaho man ako bilang editor sang isa ka daily sa Negros, sa diin ang mga artikulo ginapadala lang sa akon sang publisher, sang sadto nag-resign ang iya editor, nga gina-edit ko sa akon computer kag gina-email pabalik sa internet.

Nagtrabaho ako diri sing mga duha ka bulan. Nag-untat lang ako sang nagmasakit ako. Sa karon, naga-edit ako online sang duha ka local weekly kag gasulat sang kolum – duha ka beses sa isa ka semana – sa Panay News.

***

Gina-welcome ta gid ang ining kasuguan – ang Telecommuting Act – tungod sa daku sini nga bentaha sa empleyado kag bisan sa employer.

Sa idalom sang ining kasuguan indi ka kinahanglan magtrabaho part-time, ukon pang-talent fee, kag mag-earn santu sa part-time ukon talent fee lang, samtang puede ka man maka-trabaho kag maka-earn sing lubos katulad sa mga full-time nga empleyado sa upisina ukon diin ang regular nga worksite.

Bentaha man sa employer ini kay makapa-uswag ini sang morale (enthusiasmo) kag productivity sang empleyado tungod sa sining pribilehiyo.

In fact, ining kasuguan nagahatag sing parehas nga oportunidad sa pag-ubra sa mga may kasablagan (PWDs) nga puede lang maka-ubra sa ila puluy-an.

Sa pagpatuman sining kasuguan, syempre dapat may piho nga polisa ang kompaniya parti sini. Dayon kilalahon sini kon sin-o gid sa ila mga empleyado ang puede maka-telework ukon maka-ubra sa gwa sang regular nga worksite. Kon mahibal-an na sang empleyado nga kwalipikado siya sa sini nga pribelihiyo kinahanglan lang niya magpahibalo sa iya employer sang iya interes sa pag-telework.

Ang mga kwalipikado mag-telework amo seguro yadtong mga empleyado nga makahimo sang ila trabaho online sa internet, kag mga hilimuon nga ma-ubra sa puluy-an kag i-report lang sa employer ang ila nahimo nga trabaho.

Tungod boluntaryo lang ang pagpatuman sining kasuguan, indi man ini seguro madali-dali ipatuman sang kompaniya.

Yara man ang problema nga gamiton sang empleyado ang iya panahon sa pag-ligoy ukon ang pag-gamit sang company computers sa indi bagay nga buluhaton katulad sa pag-chat sa kon sin-o lang, download sang kon ano lang, ukon ang paggamit sini sa mga ilegal nga mga hilimuon katulad sang pag-download sang porn kag i-share sa iban, kag bisan ang paggamit sini sa trafficking kag child pornography kasubong sang ginahimo sang pila ka sindikato.

Kon maseguro na sang kompaniya nga indi masaskuhan ang ila trabaho,  amo na seguro ang pag-authorize sining telework sa mga kwalipikado nga empleyado. (w_mateojr@yahoo.com/PN)

LEAVE A REPLY

Please enter your comment!
Please enter your name here