LUAS sa problema sang ill-gotten wealth sang mag-asawa Ferdinand kag Imelda Marcos – in fact, pati na sang mga kabataan nga Imee, Irene kag BongBong nga mga eredero nila – madamo pa nga problema nga ginaatubang ni BongBong sa iya pagdalagan sa pagka-Presidente.
Sa ill-gotten wealth nga P328 ka bilyon sang mga Marcos, sunu sa retired SC senior justice Antonio Carpio, may nabilin pa nga P125B ang wala ma-kolekta sang gobyerno, nga salabton pa ni BongBong Marcos, ukon BBM, kag sang ila pamilya sa mga pumuluyo.
Ginakahadlukan pa gani ni Carpio nga indi na gid ini mabayaran kon magdaug si BBM sa Mayo 9, 2022 nga eleksyon, kon matabo nga malimbungan nila ang mga botante parti sini tungod sang binutig nga propaganda.
Isa pa ka problem ni BBM ang madamo nga disqualification case nga gin-file batok sa iya sa Comelec, labi na gid ang kaso sang indi pagbayad sang iya income tax sadtong 1982 tubtub 1985, nga gin-confirm mismo sang korte.
Isa pa gid ka problema ni BBM ang kuno pag-suporta ni anay Presidente Fidel V. Ramos (1992-1998) sa iya kandidatura.
Sa nahibal-an na sang madamo, kandidato si Sara Dutere-Carpio sa pagka-Bise Presidente sang Lakas CMD, nga gintukod (founded) ni FVR.
Understandable nga suportado ni FVR si Sara bilang kandidato sang ila partido nga Lakas CMD sa iya pagdalagan sa pagka-Bise Presidente.
Si BBM kandidato sa pagka-Presidente sang Partido Federal ng Pilipinas (PFP).
Tungod bulag nga ginaboto sa Filipinas ang Presidente kag Bise Presidente, indi man katingalahan nga mag-tandem sa isa lang ka tiket si BBM kag Sara bisan indi pareho ang ila partido.
Tungod sini nahisugtan nanday BBM kag Sara nga mag-upod sa isa ka tiket.
Wala lang kita, ugaling, kahibalo kon sugot si FVR sa kay BBM bilang kandidato sa pagka-Presidente sang Lakas CMD kay wala man siya nagatugda parti sini.
Pero, kon sugot gid man si FVR kay BBM, basi balos lang ini sa kay President Duterte nga todo atake gid kay FVR sa diutay lang sini nga pagtugda batok sa iya administrasyon, bisan pa si FVR gid ang nag-endorso sa iya sa eleksyon sadtong 2016. Remember man nga wala gid luyag si Duterte sa kay BBM nga mangin Presidente.
Problema man ugaling ini ni FVR, nga mangin problem man ini ni BBM, kay indi maga-upod sa iya ang 23 niya anay myembro sang gabinete. In fact, nagpahayag gid sa publiko ini sila sa isa ka Statement of Support para kay VP Leni Robredo sa pagka-Presidente.
Isa pa ka problema ni BBM amo nga luyag na gid lang ni Sara nga pabay-an ang iya mga supporter nga magboto sa lain nga kandidato nga indi si BBM.
“I respect it…,” siling gani niya sa isa ka forum.
Ang malain pa kay may mga personal pa nga isyu sa “honesty” si BBM – nga kuno graduate sa Economics sa Harvard, nga indi man gali, kag may claim man siya nga author sang isa ka importante nga kasuguan nga indi man matuod.
Ang “About” page ni BBM sa iya campaign website, kag pati sa iya “senate biography page”, nagasiling nga siya ang author sang Republic Act (R.A.) 9522, ang Philippine Archipelagic Baseline Law. Apang ang mga record sang Senado kag House of Representatives ngasiling nga indi siya ang author sini.
Ang matuod nga author sini amo ang nagtaliwan na nga si Rep. Antonio Cuenco – isa sang mga kaupod ni Marcos sa 14th Congress, nga ang version amo ang gin-aktuhan gid sang bicameral committee sa panahon ni Presidente Arroyo.
Kon may amot man si BBM sa ining kasuguan, ina bilang kabulig lang sa pagdihon sang report sang bicameral committee, although ginsiling man niya nga suportado niya ang ining kasuguan.
Ining false claim ni BBM naggwa gani sadtong Setyembre 2016 pa sa Facebook page nga ginhingadlan “Filipino Fighting For Freedom of Information 4FoI” nga nagasiling nga si BBM ang author sang RA 9522 upod pa si nagtaliwan nga Senadora Miriam Defensor Santiago.
Ini nga artikulo na-edit, kon gin-koreheran, na. Nagasiling na ini nga ““As legislator, one of the most important pieces of legislation that BBM was a part of…” amo ang RA 9522, ukon ang Archipelagic Baseline Law, nga nagaathag kon ano ang dangat sang “Philippine territorial sea.”/PN
