INDI MALIPOD ang nagakahinabo sa karon nga ang mga kandidato lunsay nagagamit sang social media sa ila nga pagkampanya agud nga mas makilala sang mga botante kag agud nga mas makapalab-ot sila sang ila mga mensahe.
Tungod nga mas madamo sang nagagamit sang social media, mas madamo sang kandidato ang naga-usar tungod sang madulot sini nga bentaha sa ila kampanya.
Lantawa ang nagalabay sa imo nga social media account, mga kandidato nga nagapahayag sang ila tinutuyo kon ngaa sila nagapapili kag kon ngaa sila ang pilion.
May mga kandidato nga ginagamit ang social media agud nga makatipon sang mga sumulunod, sang madamo nga tagsakdag kag agud mahapos para sa ila ang makapalab-ot sang mensahe.
May mga kandidato nga nagasaot kag nagahatag sang kalingawan agud nga magpangibabaw ilabi na sa tagsa ka tion nga maglantaw kita sa social media. Sa masami, yara sila sa imo news feed ukon masami nga naga-ulhot bisan pa nga wala ka nagatukis sa ila account ukon page.
Tanan nga ginakadtuan sang mga kandidato, sa mga ginahimo nila ukon mga aktibidades sa tagsa ka adlaw sang kampanya, makita sa ila social media account.
Ang daku nga bahin sang ila badyet para sa pagpaalinton sa botante ang ginpain nila sa social media nga may mas masangkad, mas may target nga lugar kag kadamuon kag mas makatumod sa ila ginapatuhuyan nga mga tumalan-aw ukon ila mga botante.
Makita man naton ang pagkul-aw sang pasayod sa telebisyon kag sa radyo sa subong kon ikumparar sang nagliligad nga mga eleksyon.
Bisan ang dalagku nga mga media companies ukon mga network sang radyo kag telebisyon nagalagas sa pag-usar sang social media. May mga kaugalingon man sila nga social media account, may content creators, may writers kag iban pa nga nagatrabaho para sa sini nga sahi sang makabag-o nga media.
Nakita nila ang sitwasyon. Indi nila luyag nga mawigit ukon matabunan sang nagamuad nga mga social media account kag mas abilidaran nga mga content creator.
Matuod nga ang daku nga bahin sang masangkad nga kampanya yara na sa social media. Mahina na ang kita gikan sa political ads sang mga dalagku nga network tungod mas ginapasulabi sang mga kandidato ang social media.
Nagabag-o ang panahon. Nagaligwat ang mga pamaagi kag mas naga-moderno ang mga botante. Luyag sang tanan ang mas mahapos kag madasig nga sahi sang sistema.
Kon istoryahan ang pag-amlig sa palibot, ang pagpaiway sa paggamit sang mga tarpaulin kag iban pa nga sahi sang campaign materials nga makatuga sang halit sa palibot, posible nga konsiderahon ang pag-usar na lang sang social media.
Sa sini, malikawan ang pagtumpok sang pila ka tonelada nga basura gikan sa sini nga campaign materials. Malikawan nga mahalitan ang mga puno sang kahoy, kag ang mga makahalalit nga kemikal gikan pag-imprinta sini.
Panahon na nga konsiderahon ang ini nga bagay sang aton gobyerno agud nga mas makabulig kita sa pag-amlig sa aton palibot. Indi na ini mangin bag-o para sa tanan tungod may mga adbokasiya kag programa ang mga local government units, bisan pa ang national government, tuhoy sa paperless transaction kag paperless session.
Kon nahimo naton nga likawan ang pag-usar sang papel sa mga transaksyon agud nga makaamlig sa aton palibot, ngaa indi naton mahimo sa tion sang kampanya?
Makita man sang tanan ang tumpok sang basura pagkatapos sang eleksyon. Basura nga mga tarpaulin sang mga kandidato. May mga plastic streamer, sack streamer, kag iban pa.
Lauman naton nga sa masunod nga piniliay, mas mangin malapnagon ang social media bilang palaagyan sa pagkampanya.
Dapat antisiparon na sang gobyerno ang ini nga sahi sang pagkampanya kag maghimo na sang angay nga patakaran para sa moderno nga kampanya.
Indi na ini mapunggan. Regulasyon ang kinahanglan agud nga mangin alalangay ang pag-usar sang tanan.
Makita man naton nga ang kinakuhaan sang impormasyon sang mga pumuluyo amo ang social media nga mas madasig kaysa sa mainstream media. Kon ano ang nagakatabu amo man ang makita kag mabatian.
Mismo ang mga kandidato amo na ang content creators, nangin bloggers kag vloggers. Nakita nila nga mas direkta nila nga mapalab-ot sa pumuluyo ang ila panimuot kag balatyagon. Mas makapahayag sila nga wala sang limitasyon santu sa panahon kag indi sila magastuhan paagi sa pagbayad sa mahal nga airtime sang mga radyo kag telebisyon.
Magasto ang kampanya. Makaluluoy ka kon wala ka sang kwarta para igasto.
Sa sini, may patas nga higayon sa social media tungod bisan wala ka kwarta makapalayag ka sang imo plataporma kag makapalab-ot ka sang mensahe sa mga botante.
Ginalantaw naton nga ang moderno nga kampanya mangin uso kag magadominar sa masunod nga eleksyon.
Sa liwat, kabay nga antisiparon sang gobyerno kag dapat magpasad sang mga patakaran agud nga magiyahan ang tanan – botante kag kandidato, sa pag-usar sang social media bilang bag-o nga palaagyan sa pagkampanya. (bertladera@gmail.com/PN)
