NAGTUGA sang magkatuhay nga reaksyon sa mga nakabati ang ginaduso nga hagna ni First District Representative Janette Garin nga nagatuyo nga pasangkaron ang prangkisa sang More Electric and Power Corporation (More Power) sa mga banwa sang Igbaras, Tubungan, Oton, Tigbauan, Guimbal, Miag-ao, kag San Joaquin nga nasakpan sang iya distrito nga ginapangalagaran.
Ginpasaka ni Garin ang House Bill 6292 sadtong November 24, 2025, ginsumiter ini sa Bills and Index Service sang House of Representatives para marepaso kag matalakay.
Nakita sini nga may pinakanubo nga sukot sa kuryente ang MORE Power kag napadamo sini ang mga konsumidor nga naga-agom sang serbisyo.
Nabuhinan ang mga nagapangawat sang kuryente nga nagaresulta sa makahalanusbo nga sunog nga nagatuga sang huol sa komunidad.
Sa akon nga paglantaw, angay nga mahatagan sang higayon ang mga pumuluyo sang mas maayo nga serbisyo, nga makapili sila sang mas makahatag sa ila sang benepisyo kag sigurado, masaligan, kag barato nga suplay sang kuryente.
Nagatin-ad ang serbisyo paagi sa mga moderno nga teknolohiya, kagamitan, pamaagi kag pagdumala para sa kasulhay sang mga konsumidor. Mas abanse ang MORE Power sa iya istratehiya kag kagamitan rason nga mas tayuyon ang serbisyo nga ginahatag sa mga konsumidor.
May mga pamaagi sila kon paano mangin maabtik sa pagresponder sa mga problema nga ginapalab-ot sa ila kaangay sang hinali nga pag-brownout, paghilay ukon pagkatumba sang poste, kon nabungguan ukon nasagairan ang poste,kag kon nagawayway ang kable sang kuryente.
Importante sa pumuluyo nga marespondihan ang ila ginapalab-ot nga kabalaka ukon problema, kag mabalik sa madali nga panahon ang suplay sang kuryente.
Kahibalo man kita sa masami ginayamo sang mga pumuluyo sa primero distrito, kon ano ka dugay ang pagresponder sa ila reklamo, ang kamahal sang ila balayran, kag ang masami nga brownout. Matuod, gina-atipan man ini sang ila electrric cooperative apang mas nagakinahanglan pa gid sang mas labaw nga serbisyo.
Nakita sang mga pumuluyo sa primero distrito kon paano nagaserbisyo ang MORE Power sa syudad sang Iloilo. Indi ini mahinago tungod ang tanan makita sa social media, kag kalabanan sa ila ang diri man nagatenir sa syudad sang Iloilo kabangdanan nga sila mismo ang makahimo sang pagkumparar sa tunga sang duha ka electric power utility.
Mismo ang mga estudyante kag trabahante nga nagatenir sa syudad sang Iloilo ang makapamatuod kag buhi nga saksi sa serbisyo nga ginahatag sang MORE Power sa syudad sang Iloilo.
Kahibalo kita ang ang electric cooperative magapakigbatu kag ila ipabugal ang ila serbsiyo para sa ila konsumidor. Magapanagang ang mga nagadumala sa sini nga kooperatiba nga nagaplano kag nagapatuman sila sang maayo nga programa kag serbisyo para sa ila konsumidor. Indi naton ina mapunggan tungod para sa ila maayo ang ila serbisyo. Para sa ila pinasahi na ang ila pagdumala kag nasolusyunan nila ang mga problema sang mga konsumidor.
Apang, indi ang mga opisyales sang kooperatiba ang makapabakod sang ila punto kag argumento. Ang mga konsumidor nila nga nagabaton sang ila serbisyo kag nakatilaw sang serbisyo sang MORE Power amo ang mas may mabakod nga pahayag tuhoy diri tungod lunsay naeksperyensyahan nila ang magkatuhay nga serbisyo.
Indi man matago nga may mga pagpanghangkat man nga gina-atubang ang MORE Power sa tagsa ka adlaw nila nga operasyon. Padayon sila nga nagatuon, padayon sila nga nagahimakas, padayon sila nga nagatutok sa pagpaayo pa gid sang ila serbisyo para sa mga konsumidor sang Iloilo.
Padayon ang MORE Power sa pag-adoptar sa mga makabag-o nga teknolohiya, sa mas epektibo nga istratehiya, kag sa mas klaro nga mga plano para sa ila pinasahi nga serbisyo.
Tion na nga ikonsiderar sang mga pumuluyo sa primero distrito ang pag-agom sang mas maayo nga serbisyo para sa ila kinahanglanon. Indi sila dapat pagdalukan sang oportunidad ukon higayon nga maka-eksperyensya sang mas maayo nga serbisyo nga sibu sa ila ginalauman gikan sa isa ka electric power utility.
Ang pagsulod sang MORE Power sa primero distrito may legal nga balasihan kag gintugutan sang konstitusyon tungod nga para ini sa kaayuhan sang mga pumuluyo.
Nagakaangay nga pamatian ang mga konsumidor kon luyag nila nga magpabilin sa pag-antus sa namat-an nga serbisyo ukon maghakus sa mas bentaha, mas barato, mas masaligan nga serbisyo. Ang konsumidor amo ang magadesisyon kon luyag nila nga mag-antus sa gihapon ukon magtilaw sa mas maayo nga serbisyo nga ila ginalauman.
Ang tanan nagabag-o kag may pagbag-o, kag ini padulong sa kaayuhan kag mas masanag nga palaabuton.
Indi naton pagdalukan ang mga pumuluyo sang primero distrito sa pag-agom sang mas kalidad nga serbisyo sang MORE Power. (bertladera@gmail.com/PN)
