PALALIGBAN man bala sa inyo kon sa diin nagagikan ang minilyon nga balor sang ilegal nga druga nga narekober sang kapulisan sa bug-os nga Western Visayas, ilabi na diri sa syudad kag probinsya sang Iloilo?
Kinahanglan nga matumod kon sa diin gikan ang mga ilegal nga druga kag dira mismo dapat mautod na ang sirkulasyon agud nga indi na maglapta pa sa bug-os nga rehiyon.
Sadto pa, madamo na sang press release kag seremonya ang ginpatigayon tuhoy sa kon paano mabantayan ang mga pantalan, paluparan kag terminal sang mga salakyan agud nga indi makalusot ang mga kontrabando apang ang tanan lunsay wala sang epekto tungod nangin tahos kag padayon ang pagsulod sang mga kontrabando sa aton teritoryo.
Dapat nga tsekyaron kon guba, kon dapat kay-uhon ukon islan ang mga scanner ukon makina nga makatumod sa unod sang mga bagahe ukon kargamento.
Dapat mabantayan man kon diri bala sa aton ginaluto ang ilegal nga druga, kon ano ang iya mga panakot nga kemikal kag kon may nagasulod nga mga panakot diri sa aton.
Nalipay kita sa report sadtong Hunyo 2023 nga kapin sa 90.25 percent sa 4,051 ka mga barangay sa Western Visayas ang na-clear na sa ilegal nga druga kutob sang Mayo 2023, suno sa datus gikan sa Philippine Drug Enforcement Agency (PDEA) Barangay Drug Clearing Program (BDCP).
Sa Negros Occidental, 67.89 percent sang 601 ka mga barangay ang ginakabig nga drug-cleared samtang sa Bacolod City kapin sa 22.95 percent sa 61 ka mga barangay ang natinluan na sa ilegal nga druga.
Sa Antique nga may 590 ka mga barangay, 99.66 percent na ang drug-cleared; sa Iloilo Province nga may 1,721 ka mga barangay, 98.55 percent ang drug-cleared; sa Capiz nga may 473 ka mga barangay, 91.12 percent ang drug-cleared; kag Iloilo City nga may 180 ka mga barangay may 54.22 percent nga drug-cleared.
Lunsay 100 percent drug cleared ang 327 ka mga barangay sang Aklan kag 98 ka mga barangay sang Guimaras.
Maathag nga sa probinsya sang Iloilo may 98.55 percent nga drug-cleared apang kon lantawon naton ang nagakatabu, madamo sa gihapon ang nagakadakpan kag mas daku na ang kantidad sang narekober nga ilegal nga druga.
Yara lang sa 54.22 percent ang drug-cleared sa syudad sang Iloilo. Tuman ka budlay tinluan ang syudad? Diin na ang mga punong barangay nga nagapakig-away kag nagkomiter nga tinluan sa ilegal nga druga ang ila lugar?
Pila na ka kabuhi ang nauyang? Nagabalik kita sa sitwasyon sadto nga madamo sang mga kuging ang nagadayan sa mga dalan. Naga-amat-amat peligroso ang aton palibot. Dapat tingob kita liwat nga maghulag agud nga papason ang ilegal nga druga.
Lantawon naton ang sitwasyon sa bug-os nga rehiyon paagi sa mga datus.
Kabug-usan nga Php185,932,833.00 nga balor sang ilegal nga druga ang narekober umpisa Hunyo 1 tubtob Oktubre 31, 2023. Samtang, sadtong Enero 1 tubtob Mayo 23, 2023 may kabug-usan naman nga Php88,030,809.00 nga balor sang ilegal nga druga ang narekober sang Police Regional Office sa bug-os nga Rehiyon 6.
Agud mas maathag naton nga makita ang sitwasyon, yari ang larawan sang away sa ilegal nga druga sa sulod sang 10 ka adlaw, umpisa Nobyembre 1 tubtob Nobyembre 10, 2023.
Sang Nobyembre 1, 2023 may kabug-usan nga Php1,904,000.00 nga balor sang ilegal nga druga ang narekober sa isa ka operation nga may duha ka nagkaladakpan kag may kabug-usan nga 19 ka sachet sang suspected shabu.
Sang Nobyembre 2, 2023 may kabug-usan nga Php126,480.00 nga balor sang ilegal nga druga ang narekober sa tatlo ka operation nga may tatlo ka nagkaladakpan kag may kabug-usan nga 15 ka sachet sang suspected shabu.
Sang Nobyembre 3, 2023 may kabug-usan nga Php131,104.00 nga balor sang ilegal nga druga ang narekober sa tatlo ka operation nga may tatlo ka nagkaladakpan kag may kabug-usan nga 11 ka sachet sang suspected shabu.
Sang Nobyembre 4, 2023 may kabug-usan nga Php34,000.00 nga balor sang ilegal nga druga ang narekober sa tatlo ka operation nga may apat ka nagkaladakpan kag may kabug-usan nga 18 ka sachet sang suspected shabu.
Sang Nobyembre 5, 2023 may kabug-usan nga Php182,680.00 nga balor sang ilegal nga druga ang narekober sa pito ka operation nga may walo ka nagkaladakpan kag may kabug-usan nga 48 ka sachet sang suspected shabu.
Sang Nobyembre 6, 2023 may kabug-usan nga Php479,400.00 nga balor sang ilegal nga druga ang narekober sa duha ka operation nga may lima ka nagkaladakpan kag may kabug-usan nga 39 ka sachet sang suspected shabu.
Sang Nobyembre 7, 2023 may kabug-usan nga Php261,800.00 nga balor sang ilegal nga druga nga narekober sa tatlo ka operation nga may apat ka nagkaladakpan kag may kabug-usan nga 16 ka sachet sang suspected shabu.
Sang Nobyembre 8, 2023 may kabug-usan nga Php499,800.00 nga balor sang ilegal nga druga nga narekober sa anum ka operation nga may anum ka arestado kag may kabug-usan nga 42 ka sachet sang suspected shabu.
Sang Nobyembre 9, 2023 may kabug-usan nga Php286,960.00 nga balor sang ilegal nga druga ang narekober sa apat ka operation nga ginhiwat, may 12 ka nagkaladakpan kag may kabug-usan nga 42 ka sachet sang suspected shabu.
Sadtong Nobyembre 10, 2023 may kabug-usan nga Php20,901,500.00 nga balor sang ilegal nga druga ang narekober sa siyam ka operation nga ginhiwat, may 12 ka nagkaladakpan nga may kabug-usan nga 87 ka sachet sang suspected shabu.
Halos wala sang adlaw nga wala sang may madakpan. Sadto gagmay nga sachet lang ang marekober apang karon ordinaryo na lamang ang minilyon ka pesos nga balor sang ilegal nga druga ang marekober sang kapulisan.
Dapat atubangon ang realidad nga liwat nga nagadagya ang ilegal ng druga agud nga makapangita sang angay nga solusyon kag pagtalupangod agud nga mapapas kag indi makatuga sang halit kaangay sa mga sitwasyon sadto. (bertladera@gmail.com/PN)
