[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’PANUGDAON ROBERTO ‘BERT’ LADERA’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”][/av_heading]
[av_textblock size=” font_color=” color=”]
Sa dalayon nga kiskisanay sang duha ka kaging nga kahoy, nag-init kag nag-aso, hinali nga nag-igrab, nagtuga sang kalayo, nagmakot kag nasunog.
Kaangay sina ang natabu sa tunga nanday Mayor Jed Patrick Mabilog kag Councilor Plaridel Nava.
Mahirup sadto ang ila pagtamdanay, halos nagatimbangay sa tanan nga mga bagay, kag lunsay nagahandum sa kon ano ang mahatag nga serbisyo sa mga tawo.
Apang ang higayon, sa ila naghatag sang tion nga makatuon kag nagpaminsar nga ini gamiton para sa ila pagkamadinalag-on.
Nagplano sang lubos, ang kada isa may yara sang gintan-ay nga bagay nga iya mahatag bilang kabahin sa pagduso sang handum kag higayon nga makatipon sang manggad.
Matuod, wala sang likom nga indi mabuyagyag. Wala sang kadulom nga indi maghangad sang kasanag. Wala sang nauhaw nga indi magdimdim sang tubig agud malatayan sang kabugnaw ang iya tutunlan.
Nag-aslom ang matam-is, sa paglipas sang panahon. Kaangay sang man-og, naga-ilis ini sang iya panit kag nabulad ang kugalingon sa peligro gikan sa iya mga kasumpong.
Makahulubog ang gahum kag manggad, kag ang naga-uyat sini indi makabalibad sa tentasyon nga sa iya ginahumlad.
Bangid ayhan sa kadalok? Bangod ayhan sa pagka-poderoso? Bangud ayhan sa silaw sang pilak, ang ila mata nagapiyong sa kamatuoran kag sa tampad nga pagserbisyo sa tawo?
Nagtuhaw ang kontrobersiya angut sa 3L Clamping and Towing Services nga kuno gintukod lamang nga kompaniya agud nga mangin palaagyan sa paghatag sang katumanan sa gindihon nga ordinansa.
Madamo sang nagpamangkot, madamo ang nakasimhot, madamo man ang natingala sa mga padugi nga nagapalibot sa sini nga mga hitabu.
Ginpangitaan sang paagi, ginduso, ginhataga sang katumanan. Apang, ang malas-ay nga pagkaon, wala naluyagan sang nagakaon rason nga naghingyo sang dugang nga panakot agud masagamsaman sini ang sabor ang iya ginakaon.
Nalukmat ang mga padugi, nabuksan ang lata sang kontrobersiya kag sa hinali sila ang nag-eskrimahay sa kahanginan.
Sa dalayon nga pag-ayag sa ayagan, nagaseparar ang bato sa balas. Nagakahulog ang balas, nagakabilin ang dalagku nga bato.
Nagpasaka sang kaso si Councilor Plaridel Nava matapos mapalayag sa kahanginan kag mabantala sa mga pamantalaan ang kaundan sang kontrobersiya, kag sa ginalauman ang anay mahirup nga mag-abyan ginseparar sang hitabu.
Nangin pilason ang magtimbang nga tagipusoon, lunsay may ginaagunto nga kasakit sa ila balatyagon. Mahimu nga nagapaminsar man sila sang paghinulsol apang wala lamang ginabungat.
Naglipas ang panahon, lunsay nakamarasmas ang magtimbang ngab bahin. Nagtahaw ang ila balatyagon, nagpabugnaw sa bulig sang panahon. Nagpanghuna-huna sa kon ano ang angay nga himuon kag kon ano ang mangin akto sa palaabuton.
May bulig kag halit ang kalayo. Ang gamay nga igrab madasig nga maglaton kon ang iya ginadilaan kaging kag mahapos kaunon. Apang, ang indi makontrolar nga kalayo magahatag sang halit.
Sa ginasiling, kon ang kaugot nagdaku nga wala makontrolar, pagabalikan sang kaugot kag halitan ang naugot.
Lunsay sila may kaugot sa isa kag isa kag lunsay sila nagpangkuso sang ila trapo sa mata sang publiko.
Pareho sila nga kaging kag sa isa ka igrab sila ang nagmakot./PB
[/av_textblock]
[/av_one_full]
