NAKAPANGUMUSTA na ayhan ang mga abyan, kakilala, kag tagsakdag ukon sumulunod ni Uswag Party-list Representative Jojo Ang, ukon nagpalab-ot sa iya sang mensahe nga nagakabalaka sa iya kahimtangan sa karon?
Matingil pamatian nga ginhulugan siya sang arrest warrant angot sa reklamo nga ginpasaka sang Office of the Ombudsman. Gina-alegar nila nga may yara sang conflict of interest nga nakomiter.
Makapiyansa man siya, may ikasarang nga magpiyansa, ugaling may daku nga halit ang mantsa nga nalamhit sa iya nga ngalan bangud sa sini nga akusasyon. Ang indi mabayaran amo ang tublag nga matuga sa iya paminsaron kag balatyagon. Nagapalibog siya kon paano malampuwasan ang ini nga pagtilaw. Pila ka gab-i ayhan nga halos indi siya matulugan, mga tinion nga siya ang nagakaudungan? Indi mahinago nga makabatyag siya sang kulba kag kabalaka kon ano ang iya madangatan sa palaabuton.
Sa panahon sang kampanya, madamo ang nagapanawag sa iya. Madamo ang nagahulat sa iya presensya. Ginakabig nga importante ang iya panahon kag personalidad, kag luyag nga mangin kabahin sa tagsa ka okasyon.
Sa subong nga ginlawag na siya, sin-o ang naga-ugyon sa iya, sin-o ang nagapangapin sa iya? Sin-o ang nagabulig sa iya?
Madamo sang pamangkot nga nagapanigal-ot sa aton masibod nga pinsar. Madamo sang mga kongresista nga nalawagan sa imbukada sang sang kontrobersiya sa flood control issue. Ang iban nagapalipod pa? Ang iban nagamaniobra pa? Ang iban may mas masangkad nga impluwensya?
Sa madamo nga kongresista sa probinsya sang Iloilo, sa lima ka distrito, kag siya bilang tiglwas sang party-list, ngaa siya ang namukmukan? May bug-at bala ang alegasyon batok sa iya? Ukon basi mangin sikag siya sa tutunlan sang pulitika sa probinsya?
Ayhan bangud mangin potensyal siya nga kasumpong sa patag sang pulitika sa lokal nga piniliay? Nagadulot bala sa paminsaron sang mga kandidato ang lahog nga magapapili siya sa lokal nga piniliay kag magabiya sa party-list?
Nangin mahapos bala siya nga idispatsar kaysa sa iban nga pulitiko diri sa Iloilo? Kabangdanan bala ang iya tuman ka damo nga pondo nga makasarang magsumpong sa mga yara sa lokal nga pwesto?
Nakita ayhan sang anum ka kongresista sa Iloilo ang posibilidad nga pagsal-ot niya sa ila teritoryo?
Wala bala sang alegasyon nga napatuhoy sa iban agud nga makasuhan man?
Siya ayhan ang may pinakahuyang nga kaantanan sa tanan nga mga pulitiko sa Iloilo? Ukon siya ang may pinakadaku nga kapasidad nga posible makawahig sa iban nga kandidato kag makaguba sa ila plano nga makapabilin sa pwesto?
Ang kaso ni Rep. Jojo Ang iya atubangon sa korte. Pamatud-an niya ang iya ka-inosente. Madamo siya sang abogado nga magatindog para sa iya. Handa sila nga mangapin para sa iya.
Ang aton ginapaminsar kon may pwersa nga nagduso sa sini nga kaso nga dapat niya sabton.
Ang aton ginakabalak-an kon siya ang talikdan sang mga nakabenepisyo sa iya kaalwan. Kon ang masami nga nagapalapit sa iya magdistansya na.
Para sa akon paglantaw, madamo pa sang iban nga dapat kasuhan, dapat manabat, dapat magpaathag. Mas nalangsahan ako magsimhot sa garuk sang pulitika. Mas may nakita ako nga iban nga padihot kag padugi batok sa iya.
Samtang naga-atubang siya sang iya kaso, angay man nga balikdon niya ang iya palibot. Lantawon kon may yara sang nagahingabot, kon may yara sang mahigko nga kamot.
Makatilingala nga sa kadamuon, siya lang ang naga-isahanon.
Matuod ang ginasiling nga sa sobra kaalwan sang tawo, ang nagabaton nagakilala sa iya palad kag wala sa iya personalidad.
Tion na nga maminsar si Ang kon bala tampad ang yuhom kag tapik sa iya abaga sang mga tawo nga kaupod niya sa pagtikang padulong sa ganhaan sang kahamungayaan. Tion na nga usisaon kon sila ang may unay nga marikot nga landong.
Tubton nga indi maathagan ang tanan, magapabilin ang palamangkutanon kon ngaa siya ang namukmukan. (bertladera@gmail.com/PN)
