HILWAY NGA PANUGDAON NI MATT NI WENCESLAO “MATT” E. MATEO JR.
GINADUSO sadto ni Senador Rodante Marcoleta nga mangin State Witness ang mag-asawa nga Curlee kag Sarah Discaya sa multi-billion flood control project corruption nga nadiskubrihan ni PBBM sa iya 2025 SONA sadtong Hulyo 28, 2025.
Tungod kuno kay daku ang ila ihibalo sa isyu nga “malversation of public funds” angot sa pagpangayo sang kickback sang mga kongresista kag mga senador sa mga proyekto nga nadaug sa bidding sang at least mga kompaniya nila sa Bulacan.
May siyam (9) ka kompaniya ang mga Discaya nga nakakuha sang flood control project sang gobyerno sa bug-os nga pungsod, sunu sa 2025 SONA ni PBBM.
Pero, wala ini ginpasugtan sang Senate Blue Ribbon Committee sa pagpamuno ni Senador Ping Lacson.
Dira sa Bulacan, ginatudlo ang mga kompaniya nila nga nagapanguna nga bulugasan sang mga pulitiko kag kasosyo nga mga DPWH officials sa ila ginapangayo nga mga kickback.
Kag tungod sina indi sila maka-qualify mangin State Winess, sunu kay Lacson, kay sunu sa kasuguan dapat “least guilty” sila ikumparar sa iban nga mga akusado.
Kon maaprubahan ang ila aplikasyon agud mangin State Witness, malibre ang mag-asawa nga Discaya sa kon ano man nga akusasyon batok sa ila, nga indi mapasugtan ni Lacson.
Nadiskubrihan man ni Lacson nga kliyente gali sang asawa ni Marcoleta ang mga Discaya sa insurance bond sang ila mga proyekto, nga gapahuyang pa gid sang posiblidad nga mabaton sila nga State Witness.
Samtang, isa sa mga gina-konsiderar sang Ombudsman ang posibilidad nga mangin State Witness si DPWH 1st District (Bulacan) Engr. Henry Alcantara tungod kay gin-aku niya ang pagkalamita niya sa “malversation of public funds” kag gin-boluntad ang pagbalik sang mga P181 ka Milyon nga kickback nga nabaton man niya upod sa mga akusado nga mga kongresista kag mga senador nga nagpatigayon sang mga flood control project sa 1st District sang Bulacan. Nahatagan man siya sang iya ginapangayo nga proteksyon para sa iya pamilya.
Pero ano ining balita nga kuno nagbaliswa siya kag ginpanginwala ang iya sinumpaan nga deklarasyon sa Senate BRC nga nakaabot sa igdulungog ni Senador Ping Lacson, nga tsirman sang Senate BRC?
Kon matuod, ginpaandaman gid gani ni Lacson si Alcantara sa mahimo niya atubangon nga mga akusasyon bangod sini, katulad sang “perjury” kon diin pwede siya makulong tubtub anom (6) ka tuig.
Ang balita gasiling nga gin-deny na ni Alcantara ang iya involvement sa ghost flood control projects kag gintudlo ang iya mga subordinate nga sanday Engr. Brice Hernandez kag Engr. Jaypee Mendoza nga amo ang nag-engineer sining mga anomaliya nga transaksyon kon diin wala siya kuno kahilabtanan.
Kon nahimo ini ni Alcantara, indi ayhan kay nanalaw na siya sa sige pamahog sa iya sang mga poderoso nga na-involved sa anomaliya? Posible. Problema lang kay basi mag-backfire pa ini sa iya katulad sang ginapaandam ni Lacson batok sa iya.
Sining ulihi ugaling, ginpanginwala ini sang iya abogado. Ang Ombudsman nag-confirm man nga wala sila sing nabaton sang kasubong nga recantation nga gin-sumitir ni Alcantara sa Ombudsman.
***
Sadtong hearing sang Senate Blue Ribbon Committee sang Sept. 23, 2025, gin-akusar ni Alcantara sanday retired DPWH Usec. Roberto Bernardo, Sen. Jinggoy Estrada, Sen. Joel Villanueva, kag Ako Bicol Party-list Rep. Zaldy Co, lakip na si former Senator Bong Revilla, bilang tagpatigayon (proponents) sang ma-anomaliya nga flood control project.
Gin-claim niya nga si Bernardo, bilang iya “boss”, nag-release sang ginatos ka milyon ka pesos nga pondo para sa sining mga proyekto, nga 25% sini nagkadto, among others, kay Estrada kag Villanueva.
Si Estrada kag si Villanueva ginlamita man gani ni DPWH Engr. Brice Hernandez, nga subordinate ni Alcantara, sa House Inquiry.
Sa kaso ni Revilla, siling ni Alcantara nga may insertions sa 2024 budget para sa kandidatura ni Revilla para senador sadtong 2025 midterm elections.
“Ayon kay Usec. Bernardo,” siling ni Alcantara, “ang GAA insertions noong 2024 na nagkakahalaga ng P300 million, sabi niya po sa akin para kay Sen. Bong Revilla na noon ay kumandidato bilang senador sa 2025.”
Sa kaso ni Co, sunu kay Alcantara, may “direct transactions” sila. Siling niya nga may mga instansya nga ginadala niya ang kwarta mismo sa residensya ni Co sa Pasig. May drop-off man nga kwarta nga ginbaton sang mga tinawo ni Co.
Sunu pa kay Alcantara, ang ila komunikasyon ginpatigayon paagi sa Viber’s disappearing messages feature.
***
Meantime, nahulogan na sang nagligad lang semana sang warrant of arrest si Revilla upod ang anom (6) ka DPWH officials angot sa P91M nga ghost flood control project sa Bulacan. Gin-report ini nga “completed” pero indi ini matultulan kon diin nahamtang./PN
